Read Tedim Chin PAUNAK 14 Bible Online

PAUNAK 14 - Tedim Chin bible

PAUNAK 14

¹Numei pilte in innsung nuntakna khangsak a, numei haite in innsung susia hi.

²Thumanin a gamta mite in TOPA zahtak uh a, a sia-in a gamta mite in TOPA simmawh uh hi.

³Mihaite a pau ciangin siatna thuaklawh uh a, mipilte’ pauna in siatna ding pan pengsak hi.

⁴Bawngtal om kei leh lo panin an tawm bek kila a, bawngtal tha tawh an a kihau ahi hi.

⁵A citak teci in thuman bekbek gen tawntung a, a ginalo teci in zuau bekbek gen tawntung hi.

⁶Mi a simmawh theite in pilna a zon uh hangin ngah zo lo uh a, thungaihsun theite in olno takin ngah thei uh hi.

⁷Mihaite tawh kikhawl kei in; amau’ kiang pan pilna na ngah kei ding hi.

⁸Thungaihsun theite a pilna in lampi man musak a, mihaite a haina in lam khialsak hi.

⁹Mihaite in a khialh hangun phamawh sa lo uh a, mipilte a khialh ciangun mawhmaisak ding deih uh hi.

¹⁰Lungdamna le lungkhamna eimah bek in i theih hi a, midang kuamah in hong phawkpih kha lo hi.

¹¹Migilote’ inn kisusia ding a, thuman mite’ inn kipin gina semsem ding hi.

¹²Mihingte in thuman lampi hi, ci-in a ngaihsutte pen sihna lampi hikha thei hi.

¹³Nuihna pen cihmawh seelna zong hithei a, kigualnop sakna a ven’ ciangin dahna hong kilangkik hi.

¹⁴Misia in siatna thaman ngah a, mipha in phatna thaman ngah hi.

¹⁵Mihaite in a thuzak peuh um pahpah a, mipilte in a gamtatna ding ngaihsun cian hi.

¹⁶Mipilte kidawmin siatna panin kihem a, mihaite in thu ngaihsun masa loin gamta pahpah hi.

¹⁷A lungtom mite hai gamtat a, mipilte lungduai hi.

¹⁸Mihaite in haina bek mah ngah a, mipilte in pilna mah ngah thuah hi.

¹⁹Migilote in mihoihte mai-et uh a, maipha a piak ding uh a thum uh hi.

²⁰Kuamah in mizawngte ngai lo a, mihaute in lawm tampi nei hi.

²¹Mizawngte a simmawhte a khial hi a, mizawngte tungah a cinghte a lungdam hi.

²²Na a hoih a semte mite in muangin zahtak a, a sia gamtatna pen khialhna lianpi ahi hi.

²³Gimpi-a nasepna pen hauhna hi a, kam bek pau-in tutmawkna pen zawnna ahi hi.

²⁴Pilna pen mipilte’ minthanna lukhu hi a, haina pen mihaite’ kizepna bulpi ahi hi.

²⁵Thutak a gen teci in nuntakna huzo a, zuauthu a gen teci in mi lehhek hi.

²⁶TOPA a zahtak mi in lungmuanna nei a, a tate’ belhtheih ding mi kician ahi hi.

²⁷TOPA zahtakna pen nuntakna tuinak tawh kibang a, sihna thang tawh hong kipelhsak hi.

²⁸Mi tampi a uk kumpipa minthang a, a uk ding mi om kei leh a mawkna ahi hi.

²⁹A lungduaite mipil hi a, lungtomna pen haina kilatna ahi hi.

³⁰Lungnopna in pumpi cidamsak a, hazatna pen guh a muatsak natna ahi hi.

³¹Mizawngte bawlsiatna pen a piangsak Pasian simmawhna hi a, mizawngte tungah citna pen Pasian zahtakna ahi hi.

³²Migilo pa ama tatsiatna in puksak a, mihoih pa ama hoihtatna in hu hi.

³³Thungaihsun theite’ sungah pilna teng a, mihaite in pilna thei kha lo uh hi.

³⁴Thumanna in minam minthangsak a, mawhna in minam mindaisak hi.

³⁵A hoihin a gamta a mite tungah kumpipa lungdam a, a gina-in a gamta lote gim a pia hi.