Read Tedim Chin PAUNAK 24 Bible Online

PAUNAK 24 - Tedim Chin bible

PAUNAK 24

¹Migilote eng kei inla, amaute tawh kikhawl kei in.

²Amaute in tatsiat ding bek ngaihsun uh a, thusia bekbek genin nei uh hi.

³Pilna tawh inn kilam a, ngaihsut siamna tawh inn kip hi.

⁴Thungaihsut theihna inn sungah a hoih a manpha nate a dimtakin om hi.

⁵Thahatna sangin pilna hoihzaw a, thakhauhna sangin thutheihna hoihzaw hi.

⁶Geel siamna tawh galte kizo a, ngaihsut siamna tawh gualzawhna kingah hi.

⁷Pil kampauna pen mihaite’ theihzawh dingin thuk lua mahmah a, mihaite in mihon lakah thu gen ngam lo uh hi.

⁸Thusia lamsang a deih mite thusia bawl mi kici hi.

⁹Mihaite’ vaihawmna in khialhna bek piangsak lel a, mi a simmawh theite midangte in mudah uh hi.

¹⁰Haksatna na tuah ciangin na lung a kiat leh a ginalo mi na hi hi.

¹¹Thah dinga a kikaikhia mipa honkhia inla, sih nading mun a zuan mipa lehkaih kik in.

¹²Ke’n theikha kei ing, na cihnop hangin lungsim a thei Pasian in theitel veve hi; nang hong encik Pasian in hong teltheihna phawk in. Mi khempeuh a gamtatna bangin a thukkik ding hi.

¹³Ka ta aw, khuaizu khum ahih manin ne in. I kamah khuailuzu khum mahmah hi.

¹⁴Pilna pen i nuntakna-ah khuaizu tawh kibang a, pilna nei lecin mai lamah lametna om a, na khan hong sausak ding hi.

¹⁵Migilote’ gamtat bangin thuman mite’ omna sugawp kei inla, amau’ tenna inn luhgawp kei in.

¹⁶Mihoihte sagihvei dong a puk hangin tho kikkik thei a, migilote ahihleh tuahsiatna thuakin kithallot hi.

¹⁷Na galte in gimna a ngah ciangin lungdam kei inla, a puk ciangin kipak kei in.

¹⁸Bang hang hiam cih leh TOPA in hong thei-in nang tungah lungkim lo ding a, na galte tungah heh nawn loin gim pia lo kha ding hi.

¹⁹Migilote’ hangin lung nuammawh kei inla, amaute eng kei in.

²⁰Amaute in mai lamah lamet ding bangmah nei lo a, amaute’ meivak kisukmitsak ding hi.

²¹Ka ta aw, TOPA le kumpipa zahtak khawm inla, amau a langpangte tawh kipawlkha kei in.

²²Tua bang mite thakhatthu-in kisugawp thei ding hi. Pasian le kumpipa’ piansak theih ding gimna kuamah in genkhol thei lo hi.

²³Mipil dangte in zong hih bangin thu gen uh hi: Mi lang muhin thukhenna hoih lo hi.

²⁴Mimawh kimlai a diksak thukhen pa leitung a mi khempeuh in mudahin phuisam ding hi.

²⁵A mawh mi gim a pia thukhen pa ahihleh thupha kipia-in daupai ding hi.

²⁶A mantakin dawnkikna pen lawm taktak hihna lim ahi hi.

²⁷Na nuntakna ding zong masa inla, na an nek ding a kicin ciang bekin na inn ding lamin zi le ta nei pan in.

²⁸Thu kician om lopi-in na vengpa’ langkhatah teci pang kei inla, amau’ siat nadingin zuauthu gen kei in.

²⁹Kei tungah hong bawl bangin kei zong ka bawl ding a, ama hong hihna bangin ka thuk ding hi, cikha kei in.

³⁰Mi thadahpa’ lo gei-ah ka va pai a, mihai pa’ leenggui lo ka va nawkkha hi.

³¹Limtakin ka et ciangin a lo ciing bupah kiak dim a, a leitang khempeuh lopa in khuhcip a, a umna a phungcian suangte kicim khin hi.

³²Tua bang ka muh ciangin thu ka lungngaingai a, thu manpha khat ka mukhia hi.

³³Tawmkhat ihmutna, tawmkhat lusukna, tawmkhat sung na sep lohna, khutzepin ommawkna hangin

³⁴i tungah zawnna hong tung a, cihmawhna in hong khuhcip hi.