Read Tedim Chin PAUNAK 30 Bible Online

PAUNAK 30 - Tedim Chin bible

PAUNAK 30

¹Jakeh’ tapa Agur’ thugente: Amah in, “Pasian aw, ka lunggim a, ka cih nading ka thei kei hi.

²Ka hai lua a, mihing ka sun kei hi. Mihing bangin ngaihsut siamna ka nei kei hi.

³Pilna thu ka thei kei a, Pasian’ thu ka theih om lo hi.

⁴Vantungah kua kahto a, leitungah kua hong kumsuk kik ahi hiam? Kua in a khut sungah huihte lomcip a, puan tawh tuite tuncip ahi hiam? Kua in leitung bulpite phut kip ahi hiam? Tua bang mi na theih ngei leh a tapa’ min bang ahi hiam?

⁵“Pasian in a thugen khempeuh a manna laktel a, amah a belte a dingin kidalna lum ahi hi.

⁶Ama gen lohpi behlapsak kei in; na tua cih leh amah in nang hong tai-in zuau thugen na hihna hong kilang ding hi,” a ci hi.

⁷Pasian aw, thu nih kong ngen hi. Ka sih ma-in tuate hong pia in.

⁸Zuauna le khemna ka zat loh nadingin hong huh inla, a haulua lo, a zawnglua loin hong bawl inla, ka khamkhop zah lian bek an hong pia in.

⁹Haulua leng nang hong nialin, “TOPA i cih kua ahi hiam?” kong ci kha ding a, zawnglua leuleu leng mi’ na guksakin ka Pasian’ min kong daisak khazel ding hi.

¹⁰Sila khat a topa kiangah gensia kei in; amah in nang hong gensia-in gimna na thuakkha ding hi.

¹¹A pate samsia-in a min a daisak, a nute a phat lo mi pawlkhat om hi.

¹²Amaute a nin mahmah hinapi-in amau’ muhna-ah siang a kisa mahmah mi pawlkhat om hi.

¹³Mihoih pha mahmahin a kingaihsun, a kiliansak mahmah mi pawlkhat om hi.

¹⁴A ha uh namsau tawh a kibang gam sung mizawngte a netum, mi cimawhte a liaktum mi pawlkhat om hi.

¹⁵Vot in tanu nih nei a, khat in, “Hong pia in,” ci a, a khat in zong, “Hong pia in,” mah ci veve hi. “Phazo ta,” a ci ngei lo nam thum om a, eh! li hi zaw:

¹⁶Han khuk, taciing numei, tui a deih tawntung lei keu, le a kisumit zo lo meikuang.

¹⁷A pa a simmawh mipa, a nu’ thu a mang nuam lo mipa, va-ak in a mittang khelkhiat sakin musanete in a sa ne ding uh hi.

¹⁸Ka theihzawh hetloh a lamdang mahmah thu thum om a, eh! li hi zaw:

¹⁹Vanah musane a leentheihna zia, suangpi tungah gul a pai theihna zia, tuipi tungah teembaw a pai theihna zia, le nungak tangval a kingaihna zia.

²⁰A citak lo zi hih bangin gamta hi: Midang tawh khialin tua ciangin kisilsiang a, “Khialhna bangmah gamta kei ing,” ci khem hi.

²¹Leitung mi khempeuh in a thuakzawh loh thu thum, eh! thu li om a,

²²sila khat kumpi a suah ciang, mihai khat in a duh bangbang a nek zawh ciang,

²³a muhthadahhuai numei khat in pasal a neih ciang, nasem numeino in a tonu’ za a suan ciang.

²⁴A neu mahmah ganhing nam li leitungah om a, ahi zongin a pil penpente ahi hi.

²⁵Miksite: A hat het lo ganhing hinapi-in khuakhal sungin a nek ding uh kholzo uh hi.

²⁶Ngalvangte: A thahat lo ganhing hinapi-in suang lakah a kua ding bawl uh hi.

²⁷Kauphete: Kumpi nei lo napi-in a kituak diamdiamin hontat thei uh hi.

²⁸Innhikte: Khut sunga tawizawh ganhing hilel napi-in kumpi inn sungah tengzo uh hi.

²⁹A gamtatna i et ciangin a thupi suak mahmah thum, eh! li om hi.

³⁰Humpinelkai: Ganhing lak pan a hatpen kuamah a kihta lo.

³¹Aklui: A kihisak pai kuankuan. Keeltal: A kihisak pai gangan. Kumpipa: A mite’ mai-ah a pai lanlan.

³²Kiphasakin na hai pau ngei a, thusia bawl ding na ngaihsut ngei khak leh limtakin thu ngaihsun pha in.

³³Bawngnawi toktok lehang thawhbat hong suak a, mi khat’ nak tupsak lehang si hong luang a, mi phin lehang kitotna hong piang hi.