Read Tedim Chin PAUNAK 31 Bible Online

PAUNAK 31 - Tedim Chin bible

PAUNAK 31

¹Kumpipa Lemuel, a nu in a thuhilhna:

²Kong it mahmah ka ta aw, thu ngenngenin kong neih ka tapa na hi hi. Nangma tungah bang teng hong gen ding ka hi hiam?

³Na thatang teng numei tungah beisak kei inla, na sum khempeuh numei tungah zang kei in. Numei in kumpipa siasak thei hi.

⁴Lemuel aw, ka thugen hong ngai in. Kumpite in zu nek huai lo a, mi ukte in khamtheihzu a duh ding hi lo hi.

⁵Zu ne le-uh, thukham mangngilh uh a, thukham hei-in mizawngte gim pia khathei uh hi.

⁶A si dekdekte, khamtheihzu pia inla, a lungkham mahmahte, leenggahzu pia in.

⁷Amaute nesak lecin a zawnna uh mangngilhin, a lungkhamna uh phawk nawn lo ding uh hi.

⁸Thu a gen thei lo mite a dingin thu gensak inla, a huh ding a om lo mite panpih in.

⁹Amau a’ ding thu genin thu a tangin khen inla, a zawng a cimawh mite amau a dingin a kilawm hamphatna ngahsak in.

¹⁰Zi hoih pen suangmanpha sangin manphazaw pek a, ahi zongin zi hoih ngah ding haksa mahmah hi.

¹¹A pasal in muang mahmah a, a innsung uhah annek kitasam ngei lo uh hi.

¹²Amah in a khan tawntungin a pasal tungah thupha bawl a, a pasal tungah thusia tun ngei lo hi.

¹³Amah in samul le khau zongin thanuam takin na sem hi.

¹⁴Amah in sumbukte’ van pua teembaw bangin gamlapi panin an hong ciahpih hi.

¹⁵Phalvak tungin zingtho a, annek ding teng limtakin bawlin a nasem numeite’ sep dingteng a vaihawmsak hi.

¹⁶Amah in leitang hoih penpen zong a, a thalawhsa sum tawh a leenggui lo ding a lei hi.

¹⁷A nik singtenin a puanban zial a, thalawp takin na a sem hi.

¹⁸Amah in a nasepte a manphatna thei a, zankim zankhang dongin nakpitakin na a sem hi.

¹⁹Amah in khau kheekin a puan ding gantawm hi.

²⁰A zawng mite tungah amah cingh mahmah a, a cimawh mite tungah huhna a pia hi.

²¹A innkuan buppi puanlum guanzo ahih manin phalbi tun ding lunghimawh lo hi.

²²Amah in a puan ding khuitawm a, saihadial puansan vive a silhzo hi.

²³Thukhen upate lakah a pasal a tut ciangin mite’ lakah a kitheikim mi khat ahi hi.

²⁴Amah in puan khui-in kawnggakte zong bawl a, sumbukte tungah tuate a zuak hi.

²⁵Amah a tha hatin zong kizahtak a, mailam hun ading a lung patau lo hi.

²⁶Amah in a pilna tawh thu gen a, kam khum takin pau hiathiat hi.

²⁷Amah in a innkuansung kisapna teng sem a, a tawntungin manlah den hi.

²⁸A tate in amah it mahmah uh a, a pasal in zong pakta mahmah a,

²⁹“Zi hoih tampi a om tei hangin nang kan-a hoih kuamah om kei,” ci-in a phat hi.

³⁰Ngaihbaanna pen zuaupi hithei a, melhoihna zong maimang thei hi. Ahi zongin TOPA a zahtak numei a phattaak ahi hi.

³¹A sepna khempeuh hangin amah phat un. Mi khempeuh in a zahtak dingin a kilawm ahi hi.