Read Tedim Chin PAUNAK 5 Bible Online

PAUNAK 5 - Tedim Chin bible

PAUNAK 5

¹Ka ta aw, ka pilna le ka thumuhnate, limtakin ngai-in hong za in.

²Tua hileh a kilawmin na gamtatzia ding na thei ding a, na kampaunate in na pil lamtak hong kilangsak ding hi.

³Numei paktatte’ kampau khuaizu bangin khum mahmahin a thugente uh a neel dakdak hangin,

⁴a tawpna-ah lungkhamna le natna simloh nangma tungah bangmah dang hong guan lo hi.

⁵Amah in sihna gamah nang hong paipih ding a, ama tot lampi pen sihna mun tunna lampi ahi hi.

⁶Nuntakna lampi-ah amah om lo a, nang na phawk loh hangin amah lam pialin a vakvai ahi hi.

⁷Tate aw, tu-in ka thugente limtakin hong ngai unla, ka thugente mangngilh kei un.

⁸Tua bang numei tawh kinehkha kei unla, a inn gei nangawnah paikha kei un.

⁹Tua bang na hih kei uhleh na min hoihna teng uh midang tungah tung ding a, hehpihna a nei lo mite’ khutlum tawh na khansih ding uh hi.

¹⁰Khualmite in na neihsa teng uh la ding a, na sepsa khempeuh uh midangte in ngah ding uh hi.

¹¹Na sih kuan uh ciangin thumin na tau ding uh a, gawngin na guhguak bekun na om ding uh hi.

¹²Tua ciangin, “Bang hangin thu thei hoh lo a, hong kihilhna mang hoh lo ka hi hiam?

¹³Kei hong hilh siate’ thu ka mang nuam kei a, amau’ hong hilhnate ka don keikha hi.

¹⁴Tua ahih manin tu-in ka cimawh vat a, mi’ mai-ah ka min a sia hi,” na ci ciat ding uh hi.

¹⁵Na zi’ tungah citak inla, amah bek itin nei in.

¹⁶Pasal dang tawh va vakzau-in kongzing lakah va mawhkha ding hi.

¹⁷Na zi pen nangma a’ ding bek hi a, midangte tawh na neihkhawm ding hi lo hi.

¹⁸Tua ahih ciangin na zi tawh lungkim inla, na tenpih numei tawh lungdam in.

¹⁹A it-huai a ngaihbaangin ngaihsun tawntung inla, ama ngaihbaanna tawh lungdamin, ama hong itna tawh lungkim in.

²⁰Ka ta aw, bang hangin numei dang lunggulh ding a, numei dangte’ ngaihbaanna iplah ding na hi hiam?

²¹Bang hang hiam cih leh Pasian in na gamtatna khempeuh hong mu a, na paina khempeuhah nang hong en kawikawi hi.

²²Migilo pa’ mawhna thangzak bang hi a, ama mawhna thang sung mahah amah a awk hi.

²³Ama pumpi ki-uk zo lo ahih manin amah in sihlawh a, ama hailuatna in hankhuk sung a tun hi.