Read Tedim Chin PAUNAK 6 Bible Online

PAUNAK 6 - Tedim Chin bible

PAUNAK 6

¹Ka ta aw, na lawmte khatpeuh in sum leitawi a lak ciangin a lohzawh kei leh ama tangin a lohsak dingin kam na ciamkha hiam?

²Na kampauna hangin nang hong kimanin, na thuciamna hangin na awkkha hiam?

³Ka ta aw, tua bang na hih khak leh, tua mipa’ khut sungah a om na hi hi. Na suahtak theih nadingin manlangin a kiangah pai inla, hong khah nadingin ama kiangah thum in.

⁴Ihmumu kei inla, om mawkmawk kei in.

⁵Sabeng pa’ kiang panin a suahtak nadingin sakhi a tai bangin, thangah a awk vasa a kitom bangin na suahtak nadingin hanciam in.

⁶Thadahpa aw, miksite kiangah pai inla, amau’ nuntakzia va en in.

⁷Amaute in a uk ding le a makai ding kuamah nei lo napi-in,

⁸khuakhal sungin a nek ding uh, tuk hun sungin kaikhawm khol uh hi.

⁹Thadahpa aw, bang tanvei lumlum ding a, cik ciangin thokhia ding na hi hiam?

¹⁰Tawmkhat sung mengme lai ning, na cih kikalin

¹¹zawnna le cihmawhna in migilo gutate bangin nang hong sugawp pak ding hi.

¹²Miginalo pa, a gilo pa, thuzuau genin vak kawikawi a,

¹³nang hong khemnop manin a mitheek hong pia-in, a khe tawh hong su-in a khut tawh hong khoih hi.

¹⁴A lungsimah thusia bekbek ngaihsun niloh a, a omna peuhah buaina a piangsak hi.

¹⁵Tua ahih manin theihkholh lohin ama tungah lungkhamna tung ding a, bawlkikzawh nawn loh dongin siatna ngah ding hi.

¹⁶TOPA in a muhdah, a khahkhong ngei loh ding, thu guk, tua zah bek hi lo, thu sagih tak om a, tuate pen

¹⁷kihihsakna, zuauthu genna, mawhnei lo mi thahna,

¹⁸thusia bawl ding ngaihsutna, gamtatsiat ding a manlangte,

¹⁹zuauthu gen teci man lote, le kitotna a piangsakte ahi hi.

²⁰Ka ta aw, na pa’ hong gen bangin gamta inla, na nu’ hong thuhilhnate mangngilh kei in.

²¹Amau’ hong thugente phawk tawntung inla, na lungsimah ciamteh niloh in.

²²Tua thute in na paina peuhah lam hong lak ding a, zanin na ihmut kalin nang hong cing ding a, sunin na hah sungin na gamtatna ding hong hilh ding hi.

²³Bang hang hiam cih leh thukham le a hilhnate pen a taang mahmah khuavak bang hi a, khalna le hilhnate pen nuntakna ding lampi hi a,

²⁴mi’ zi tawh na mawh loh nadingin nang hong kemin, kam khum zangin a hong zol numei ginalote kiang panin nang hong hu ding hi.

²⁵Amau’ melhoihna iplahkha kei inla, amau’ hong zawlmitna khenglahkha kei in.

²⁶Bang hang hiam cih leh anlum khat tawh numei paktat khat kingahzo a, ahi zongin numei tawh mawhna in nuntakna bup siasak hi.

²⁷Na ang sungah meikuang pom lecin na puan kang loin om ding ahi hiam?

²⁸Mei-am tungtawnin pai lecin na khe kang loin om ding ahi hiam?

²⁹Tua mah bangin mi’ zi tawh a mawhte in gimna thuak ding uh a, tua bang a gamta peuhmah in gimna thuak ding uh hi.

³⁰A gilkial a cimawh mi khat in na a guk ciangin, midangte in mawhsak lua lo napi,

³¹amah kiman leh a zah sagihin kilohsak a, a neih khempeuh a piak kul hi.

³²Ahi zongin numei tawh a mawhte pen thu ngaihsun thei lo mi hi a, amau le amau a kisusiatawm ahi uh hi.

³³Mawhna a bawl mi in satgawpna thuak ding a, a min sia-in mindai paisuak ding hi.

³⁴A numei’ pasal a hehzawk theih nading thudang om nawn lo a, a heh thukna-ah khawl hun cih nei thei lo hi.

³⁵Amah in sumlepai sang nuam vet lo a, letsong tampi piakna in a hehna damsak zo lo hi.