Read Tedim Chin THUHILHNA 11 Bible Online

THUHILHNA 11 - Tedim Chin bible

THUHILHNA 11

¹Sumbawl nadingin na sumte zang in. Ni khat ni peuh teh a meet na ngah ding hi.

²Na sumbuk vante mun sagih-ah ahi a, mun giat-ah ahi zongin khen kawikawi in. Hih leitungah bang thusia hong piang ding cih na theikhol kei hi.

³Meii sungah tui a tamluat ciangin leitungah guahin hong zusuk a, singkung khatpeuh a puk ciangin a pukna san sanah om paisuak hi.

⁴Huih le guah ngakin khuahun hoih dong a ngak mi in khaici tuh ngei lo ding a, an zong la ngei lo ding hi.

⁵Nupi gai khat sungah nuntakna thak bangci kipat hiam, ci-in na theihzawh loh mah bangin na khempeuh a bawl Pasian’ nasepna na theizo ngei kei ding hi.

⁶Zingsang a kipan khaici tuh inla, nitak dong mateng khawl kei in. A vekpi-in a po kim ding ahi a, a khat sia-in, a khat a po ding ahi zongin na theihkholh bangmah om lo hi.

⁷Khuavak hoih mahmah a, i mit in nitaang a muh ciangin nuam mahmah hi.

⁸Mi khat sauveipi a nuntak le a nuntak sung nuamtakin om tahen. Sauveipi tak a hing zongin a sih khit hun a sauvei zawkna phawk tahen. Mailamah a lamethuai bangmah a om kei hi.

⁹Khangnote aw, na khangnona uh nuamsa unla, na khangno lai-un lungdam un. Na hihnop peuhpeuh uh hih unla, na ut bangbangun gamta un. Ahi zongin na gamtatna uh tawh kizui-in Pasian in thu hong khen ding phawk gige un.

¹⁰Note kilunggimsak kei unla, na pumpi uh gentheisak kei un. Bang hang hiam cih leh na khangno hunsung uh sauvei lo ding hi.