Read Tedim Chin THUHILHNA 3 Bible Online

THUHILHNA 3 - Tedim Chin bible

THUHILHNA 3

¹Hih leitungah a piang thu khempeuh, Pasian in ama pian’ hun dinga a sehsa hunin a piansak ahi hi.

²Suah hun om a, sih hun om hi. Suan hun om a, bawhkhiat hun om hi.

³Gawh hun om a, khoi hun om hi. Phel hun om a, lam hun om hi.

⁴Kah hun om a, nuih hun om hi. Dah hun om a, laam hun om hi.

⁵Lupkhawm hun om a, tuamlup hun om hi. Kikawi hun om a, kikhah hun om hi.

⁶Zon’ hun om a, mansuah hun om hi. Kep hun om a, paihkhiat hun om hi.

⁷Balkek hun om a, phop hun om hi. Daih hun om a, pau hun om hi.

⁸It hun om a, muhdah hun om hi. Kido hun om a, kilem hun om hi.

⁹Na a sem mipa in a sepsa khempeuh thamanin bang ngah ahi hiam?

¹⁰Pasian in eite’ manlahpih dingin hong piak nasep ka thei hi.

¹¹Amah in na khempeuh amau’ hun ciat tawh a kituak dingin a bawl hi. Amah in mailam thu theihnopna lungsim eite tungah hong guan a, ahi zongin ama sepnate a cing a theihzawhna ding hong guan lo hi.

¹²Tua ahih ciangin mihingte in a nuntak laiteng a siam tawpun gamta-in lungdamin a om ding a thupi pen ahihna ka phawk hi.

¹³Eite khempeuh in an ne tui dawnin i sepna thaman tawh lungdamin i om ding kilawm a, tua pen Pasian’ hong piak letsong ahi hi.

¹⁴Pasian’ sep khempeuh a kip tawntung ding ahihna ka thei hi. I behlap theih ding om lo a, i paihkhiat ding zong om lo hi. Amah i zahtak theih nadingin Pasian in tua bang ding mahin a bawl ahi hi.

¹⁵A piang khat peuhpeuh pen a piang ngeisa mah na hi a, a piang lai ding khat peuhpeuh zong a piang ngeisa mah na hi lel hi. Pasian in ama hun hunin a piang ngeisa mah piangsakkik zelzel hi.

¹⁶Tua tham loin, hih leitungah gitlohna in thuman thutang a suankhiatna zong ka mu hi.

¹⁷Pasian in sepna bawlna le na khempeuh ama hun ding sehkhol khin ahih manin, midikte le migilote thu khen ding hi.

¹⁸Mihingte pen ganhing bang lel ahihna uh a lahtel nadingin Pasian in mihingte ze-et hi, ci-in ka lungsimah ka ngaihsun hi.

¹⁹A tawpna-ah ci lehang, mihingte le ganhingte in a tuah ding uh kibang a, ganhing mah bangin mihing zong a si ahi hi. Mihing le ganhing in a kibangin nuntakna hu nei a, mihing le ganhing nuntakna a kimanna bangmah om lo ahih manin, mihing pen ganhing sangin a hoihzawkna bangmah om tuan lo hi.

²⁰A nih tuakun mun khatah tung khawm ding uh a, leivui panin a piang uh ahih mah bangin leivui mah suakkik ding uh hi.

²¹Mihingte’ kha vanah kahto-in ganhingte’ kha lei-ah lutsuk hi, cih a thei zong kuamah om lo hi.

²²Tua ahih ciangin mihingte in a sep thaman uh ne-in nuamsa-in a om ding uh a hoihpen ahihna ka phawk hi. Tua lo a hih theih ding uh bangmah dang om lo hi. I sih khit ciangin bang piang ding cih theihtheihna bangmah om lo hi.