Read Tedim Chin THUHILHNA 4 Bible Online

THUHILHNA 4 - Tedim Chin bible

THUHILHNA 4

¹Tua ciangin leitungah thuman loin a kigamtatnate khempeuh ka ngaihsun kik leuleu hi. Nenniamna a thuak mite kap uh a, ahi zongin kuamah in amaute hehnem lo uh hi. A nengniam mite thahat lua uh ahih manin kuamah in thuk ngam lo hi.

²A hinglai mite sangin a si khinsa mite hamphazaw ka sa hi.

³Mihing a hong piang nai lo, hih leitung gitlohna teng a mu nai lote hamphazaw lai sawnsawn uh hi.

⁴Mi khatlekhat, hauhnop mana kidemna hangin nakpi taka na kisem ahihna ka mu hi. Hih zong a mawknapi hi a, huihpi nungdelh mah tawh kibang bek hi.

⁵Mihaite in na sem loin a khut zepin om uh a, a tawpna-ah gilkialin sihlawh uh hi.

⁶Nakpi takin na sem a, a mawknapi ahi ding, khut nih dim sangin lungsim nuamin khut khat dim neihna hoihzaw hi.

⁷Nuntakna sungah a mawknapi ahi thudang khat ka mu leuleu hi.

⁸Mi khat in tapa ahi a, sanggam ahi zongin nei lo napi-in, a tawntungin na semin a neihsa tawh lungkim hun nei thei lo hi. Kua a dingin gimpi-in na sem a, a ututin ta hoh lo ahi hiam? Hih zong a mawknapi mah, a dahhuai nuntakna khat ahi hi.

⁹Mi khat sangin mi nih hoihzaw hi; amau’ sepna thaman a tamzaw ngah uh hi.

¹⁰Bang hang hiam cih leh khat cimawh leh a khat in huh a, mi khat guak pen cimawh zenzen leh a huh ding om lo ahih manin a dahhuai pha mahmah ahi hi.

¹¹Khua a dam ciangin mi nih lumkhawm leh khua lum hi; khat guak bangci khualum theih ding ahi hiam?

¹²Mi khat bek hileh zawhnop kisa a, nih pha leh kizo zo lo hi. Zang thum a kiheek khauhual bawhsat hak hi.

¹³Mi’ thugen a sang thei nawn lo, teek leh hai a thuah kumpipa sangin zawng napi-in a pil tangval khat hoihzaw hi.

¹⁴Mi khat pen thong panin suakta-in kumpi suak thei a, zawng napi-in ama gam sungah kumpi suak thei hi.

¹⁵Hih leitungah mi khempeuh’ thu ka ngaihsun a, tua mite lak panin kumpipa’ za a luah ding khangno mi khat a omlam ka phawk hi.

¹⁶Kumpipa’ uk ding mite simzawh lohin tam a, ahi zongin amah a sih ciangin ama nasepna hangin a lungdam khat beek om lo hi. Hih pen a mawkna taktak, huihpi nungdelh bang bek ahi hi.