Read Tedim Chin THUHILHNA 5 Bible Online

THUHILHNA 5 - Tedim Chin bible

THUHILHNA 5

¹Biakinn-ah na pai ciangin limtakin kingaihsun in. A man le a man lo a khen thei lo mihaite’ biakpiaknate tawh a kibang piakna sangin thu ngai dingin biakinn-a paina hoihzaw hi.

²Thu ngaihsun masa-in pau inla, Pasian’ tungah thu mawk ciampak kei in. Vantungah Pasian om a, leitungah nang om na hih manin na pau ding a kilawm zahval pau kei in.

³Lunghimawh semsem lecin na mang sia semsem ding a, tam pau semsem lecin na haina kilang semsem ding hi.

⁴Pasian’ tungah thu na ciam ciangin manlangin tungsak pah in. Amah in mihaite diksa lo hi. Na thuciamna bangin tungsak in.

⁵Na thuciamna bangin na tunsak kei ding le thu ciam vet kei zaw in.

⁶Khialkha ing, ci-in Pasian’ siampipa’ mai-ah na gen ding kisam kha ding ahih manin na kampauna hangin khialkha kei in. Tua bangin gamta khial lecin nangma tungah Pasian heh ding a, na sepsa khempeuh hong suksiatsak ding hi.

⁷Mang tam man leeng a mawkna mah tam a, kam tam pau leeng zong a kituak mahin a mawkna thu mah kibehlap hi; bangbang ahi zongin Pasian zahtak lai veve in.

⁸Kumpite in mizawngte gim ngahsakin, thuman thutangin na a kisep kei leh lamdang sa kei in. Uliante pen amau’ tunga uliante in en uh a, tuate’ tungah a ensawn a lianzaw khat omlai hi.

⁹Gam khat peuhpeuh in lo khawhna lamsang a lunghimawh kumpi khat kisam hi.

¹⁰Sum deihna lungsim na neih leh lungkim hun cih na nei ngei kei ding hi. Na hauhnop hangin na deih khempeuh na ngah ngei kei ding hi. Hih pen a mawknapi ahi hi.

¹¹Hau semsem lecin na vak ding mi tam semsem a, a hau zaw hi’ng, ci-a na theih bek cih simloh bangmah phattuamna na ngah kei hi.

¹²Na a sem mipa pen a nek ding nei taleh nei ta kei leh lungnuam takin ihmu thei a, a haute ahihleh lungnuam takin ihmu thei lo uh hi.

¹³A hoih het lo na khat hih leitungah ka mu hi: Mite amau’ lunggim nadingin hau uh hi.

¹⁴Na a sep khialh manun a neihsa teng uh suplawh uh a, a tu a tate’ luah ding bangmah om nawn lo hi.

¹⁵I nute’ sung panin bangmah nei loin guaktangin i suah mah bangin guaktang mahin i ciahkik hi. I sepsate i ciahpihkik theih bangmah om lo hi.

¹⁶A dahhuai mahmah thu in: I suah hun lai-a mah bang teekteekin i ciahkik ding hi. A mawknapi ding a i sepna-ah bang phattuamna ngah ihi hiam?

¹⁷I nuntak sungteng lungzinna, dahna, lunghihmawhna, natna satna le hehna bek tawh hun bei lel hi.

¹⁸Keimah in ka phawkkhiat thu in: Pasian in tomkha nuntak hih leitungah hong piak sungin, i sep thaman ne-in dawnin i om ding a hoihpen ahi hi. Hih pen mihingte’ thumong ahi hi.

¹⁹Pasian in mi khat neihlelam guanin, a hauhna nuamtakin a neksak leh, amah lungdamin a sepna thaman ne-in a om ding hi. Tua nopsakna pen Pasian’ kiang pan ahi hi.

²⁰Pasian in lungdamin omsak ahih manin a nuntak tomlam phawkin nei kha lo ding hi.