Read Tedim Chin THUHILHNA 6 Bible Online

THUHILHNA 6 - Tedim Chin bible

THUHILHNA 6

¹Hih leitung a mihingte tungah a man hetloin hong kibawlna ka phawk hi.

²Pasian in mi khatpeuh tungah neihlelam, hauhna, le pahtawina pia-in, a deih khempeuh neisak napi-in, tua nate nuamtakin zangsak loin, midang khat in nopsaklawh laizang hi. Hih pen a mawknapi, a thuman het lo khat ahi hi.

³Mi khat in ta zakhat nei-in kum saupi zong nungta thei kha ding hi. Bangzahin sauveipi a nungta ahi zongin leitungah nopsakna ngah loin, limtak a vuina a ngah kei leh, a sisa-a suak naungek hoihzaw lai hi.

⁴A sisa-a suak naungek a kimanna om lo hi. Khuamial sungah suakin, khuamial sung mahah mangthangin kiphawk nawn lo hi.

⁵Sun khuavak mukha loin, nuntakna bangci hiam, cih a theihkhak loh hangin tawlngakna a ngah hi buang hi.

⁶Nuntakna-ah nopsakna a ngah lo mipa kum tulnih a hing zongin, a tawpna-ah a sisa-a suak naungek mah tawh a tunna mun kibang lel hi.

⁷Mihingte’ nasepna pen a nektawm ding bek a ngaihsutna hi lo napi-in, a khamkhop ngahzo tuan lo hi.

⁸Tua ahih manin mihai pa sangin mipil pa a hamphat zawkna bang om tuan ahi hiam? Mihai pa in nuntakna ding zia a theih hangin bang phatuam tuan ahi hiam?

⁹Na dangdang deihthuah ngitngetna sangin i neihsa teng tawh lungkimna hoihzaw hi. Hih zong a mawknapi, huihpi nungdelh mah tawh a kibang bek ahi hi.

¹⁰A piang thu khempeuh, a tuaci mahin tangtawnga kisehsa hi a, mi khat in amah sangin a thahatzaw mi khat a nial zawh lohna thu i vekpi-in i thei hi.

¹¹Sauvei kinial lehang a mawkna hi semsem a, a phattuamna om lo hi.

¹²Niliim bangin a pai hanhan, a mawknapi hih nuntak tom sungah mihing a’ ding a hoihpen kua in thei ding ahi hiam? Ama sih khit ciangin leitungah bang piang ding cih kua in gen thei ahi hiam?