Read Tedim Chin THUHILHNA 9 Bible Online

THUHILHNA 9 - Tedim Chin bible

THUHILHNA 9

¹Nakpi takin sauveipi ngaihsunin ka phawk thu in: Mipilte le midikte’ gamtatna a vekpi-in Pasian in uk a, Pasian’ itna hang hizaw hiam, a muhdahna hang hizaw hiam kuamah in thei lo hi. Amau’ mailam thu khempeuh a mawkna ahi hi.

²Bang hang hiam cih leh mi khempeuh a thumong kibang a, midikte le migilote, mihoihte le misiate, mi siangte le mi ninte, biakna piate le a pia lote, a thutawpna uh a vekpi-in kibang lel hi. Mawhnei pa sangin mihoih pa hamphazaw tuan lo a, thuciamna a bawl lopa sangin a bawl pa hamphazaw tuan lo hi.

³Mi khempeuh’ thumong kibang kim a, hih pen leitung a thupiang lakah a man het lo khat ahi hi. Mihingte a nuntak laiteng gitlohna le a mawkna thu tawh a lungsim uh kidim a, theihkholh lohin mihingte sipak uh hi.

⁴Ahi zongin a hing laite a’ ding lametna om thei a, a sisa humpinelkai sangin a hinglai ui hoihzaw hi.

⁵A hing laite in a si ding ahihlam uh thei a, a sisate in bangmah thei nawn lo uh hi. A sisate in thaman bangmah nei nawn lo uh a, amaute kiphawkkha nawn lo hi.

⁶Amau a dingin itna, muhdahna, hanciamna cihte om nawn lo a, leitung a om nate khat beek theikha kik nawn lo ding uh hi.

⁷An ne-in lungdam inla, zu ne-in lungnuam in. Na gamtatna peuhpeuh Pasian in hoih a sa hi.

⁸Na puante siangsakin paaksak tawntung inla, na sam gumsak ngei kei in.

⁹Pasian in hih leitungah nang a hong piak, tomkha sung na nuntak laiteng, na it na zi tawh a nuam theithei-in om in. Leitung lungkhamna sungah na lawhtak, tua bek mah hi kha ding hi.

¹⁰Na mai-ah sep ding a om khempeuh, na tha neihzah tawh sem in. Bang hang hiam cih leh na zuat ding sihna gam sungah nasepna le thungaihsutna, pilna le theihna cihte om lo hi.

¹¹Hih leitungah ka phawk dang thu khat in: A taihat mite in tai kidemna-ah zo tawntung lo a, galhang thahatte in gal zo tawntung lo hi. A pilte in an a kham ngah tawntung lo a, a pilte hau tawntung lo hi. Hih theih siamna a neite milian suak tawntung lo hi. Mi khempeuh tungah kamsiatna vive tung hi.

¹²Mihing in ama hun ding thei ngei lo hi. Thangah a awk vasate le ngen-ah a awk ngasate tawh i kibang hi. Lamet loh hun laitak keekin hunsia sungah mihingte i tung hi.

¹³Thudang khat zong ka mukhia hi: Hih leitungah pilna a hoihna gentehna a hoih khat om hi.

¹⁴Mi tawmno bek a omna khua khat om a, a vanglian kumpi khat in tua khua a sim hi. Amah in tua khua umcihin a khuasung luhgawp dingin a ngaihsun hi.

¹⁵Tua khua sungah a zawng mipil khat om a, ama pilna tawh tua khua a huzo hi. Ahi zongin kuamah in tua mizawng pa phawkkha lo hi.

¹⁶Thahatna sangin pilna hoihzaw ka ci hi; ahi zongin kuamah in mizawngte a pil dingin ngaihsun lo a, mizawngte’ thugen kuamah in thudonin nei lo hi.

¹⁷Mihai hon lakah gam ukpa in thu a gen lualua sangin mipil pa in damtakin a gen hiathiat ngaihhuai zaw hi.

¹⁸Galhiamte sangin pilna hoihzaw a, ahi zongin khialhna khat in a hoih tampi susia thei hi.