Read Tedim Chin SOLOMON LA 4 Bible Online

SOLOMON LA 4 - Tedim Chin bible

SOLOMON LA 4

¹Itluat aw, na ngaihbaang a, na lu khuhna puan vang panin a ngaihbaang na mit hong tee kelkel hi. Gilead mual tunga keelhon diang leklek bangin na samphekte phe velvel hi.

²Na ha pak singsengte zong a mul a kimet khin phet, a kisawpsiang tuute tawh kibang hi. Na ha khat zong tok lo a, a vekpi-in kituak dimdiam hi.

³Na mukte puansan tawh kibang a, na kampau ngaihnop-huai hi. Na lu khuhna puan sung panin na kho hong san lihleh hi.

⁴Na ngawng pen galhangte’ zat lum tangzang tulkhat a kikhai zeizaina David’ tausang tawh kibang hi.

⁵Na nawite unok pak lakah a ta khawm helhel sanang nih tawh ahi a, a ta khawm hialhial sakhi peeng tawh ahi zongin a kibang hi.

⁶Zingsang huih vot a nun’ mateng, zingsang khuavak hong tun mateng, myrrh paknamtui a omna mualtungah omsuakin, saledi paknamtui lakah ka bual ding hi.

⁷Ngaihno aw, na ngaihbaang mahmah a, kawkbaanna ding na nei kei hi.

⁸Ka lawm ngaih aw, Lebanon Mual-ah hong pai inla, Lebanon Mual panin kei hong zui in. Humpinelkaite le kamkeite a tenna, Amana Mual dawn panin hong taisuk inla, Senir Mual le Hermon Mual panin hong paisuk in.

⁹Itluat ka lawm ngaih aw, na mit hah in ka lung hong kuai a, na khi awh in ka lungsim hong zo hi.

¹⁰Itluat ka lawm ngaih aw, nang tawh kingaih nuam mahmah hi. Na itna leenggahzu sangin khumzaw a, na paknamtui paknamtui dang khempeuh sangin namtui zaw hi.

¹¹Lawm aw, na muk, khuaizu bangin khum a, na leii, bawngnawi le khuaizu bang hi. Na puante Lebanon Mual tunga paknamtui namkim a nam hi.

¹²Ka lawmnu, ka naunu, a ki-umcip huan hi a, a kinei tuam tuinak ahi hi.

¹³Tua huan sungah singkungte hoihtakin khang a, mang kawlsing cinna huan tawh kibang hi. Singgah limci pente tua lai-ah gah a, henna leh nard sing namtuite tua lai-ah a po hi.

¹⁴Nard sing le saffron sing, thalsing le sinnamon kung, a namtui a gah namkim kung po a, myrrh le aloes, a namtui namkim om hi.

¹⁵Lebanon Mual tung panin tui hong luangsuk a, ciktui luangte, luitui luangte, tua huan sungah a tungsuk hi.

¹⁶Saklam huih aw, hong nungsuk inla, khanglam huih aw, hong nungto in. Ka huan sungteng hong namtuisak un. Ka ngaihno, ka huanah hong paisak unla, a gah limci pente hong nesak un.