Read Tedim Chin SOLOMON LA 5 Bible Online

SOLOMON LA 5 - Tedim Chin bible

SOLOMON LA 5

¹Itluat ka lawmnu aw, ka huansung hong tungzo ing. Ka paknamtuite ka kaikhawm hi. Ka khuaizu le ka khuailuzu ka ne a, ka leenggahzu le ka bawngnawite ka dawn hi. Nungak le tangval aw, na lungkim piikpeek dongun ne-in dawnin nuamsa un.

²Ka lup hangin ka lungsim ihmu lo a, ka ngaihno in ka kong hong kiuh ka za hi. Itluat ngaihno ka lungtup aw, kei hong tumsak in. Ka lu tungah daingo kia a, meiizun in ka sam kawtsak hi.

³Ka puante suah khinzo ing. Ka puante silhkik ding ka hi hiam? Ka khete sil khinzo ing; ninsakkik ding ka hi hiam?

⁴Ka ngaihno in kongkhak hong len khin napi hong taisan kik hi.

⁵Ka ngaihno tumsak dingin ka kithawi a, ka khutte myrrh paknamtui tawh ka zut a, ka khutmete myrrh paknamtui ka nuh a, kong a hong dingin a honna ka len hi.

⁶Ka ngaihno a lutsak dingin kong ka hon a, amah na taikhia khinta hi. Amah a taikhiat manin ka dah lua a, amah ka zon hangin ka mu kei a, amah ka sap hangin hong dawng lo hi.

⁷Khuasung a cing mite tawh ka kituak a, kei hong satin hong liamsak uh a, kulhzang a a kileh den khuacingte in ka puantungsilh hawkkhia uh hi.

⁸Kong thum hi, Jerusalem nungakte aw, ka ngaihno na muh uhleh lungzuangin ka sih dekna na gensak un.

⁹Nungak lak a a hoihpen aw, na ngaihno a bangci hiam, hong gen dih in. Tua bangin kong gen liang ding uh bangzahtakin lamdang ahi hiam?

¹⁰Ka ngaihno a melhoih a, a thahat hi. Mi tul sawm lakah tehpih ding dang om lo hi.

¹¹A sam sau-in kil thiuhtheuh a, a sam hoihin vom dikdek a, kham sangin zong deihhuai zaw hi.

¹²A mittangte ahihleh tuisiang phuan lakah a kisil siang kiuhkeuh, luitui luang gei-a a om vahuite tawh kibang hi.

¹³A biangte pen paknamtui a dimin a kithun thawl san kiuhkeuh tawh a kibang hi. A mukte pen myrrh paknamtui tawh a kidim unok pak tawh kibang hi.

¹⁴A khutte etlawmin hi linlian a, suangmanpha a kiphut zungbuhte a bulh hi. A pumpi pen suangmanpha a kiphut dimdiam saiha pak tawh kibang hi.

¹⁵A khete pen kham citak a kiphuh dimdiamna suangngo khuamte tawh kibang a, ama duang pen Lebanon mual sang, taamtak kung hoih bangin thupi suak mahmah hi.

¹⁶A kampaute khum zungzung a, a vekin, deih loh ding khat zong om lo hi. Ka ngaihno, hih bang teng hi, Jerusalem nungakte aw.