Read Tedim Chin SOLOMON LA 6 Bible Online

SOLOMON LA 6 - Tedim Chin bible

SOLOMON LA 6

¹Nungak lak a hoihpen nu aw, na ngaihno, koi-ah pai hiam? Na ngaihno koi lam pai hiam? Amah hong zonpih nung.

²Ka ngaihno, paknamtui kung a pona, a huan sungah pai hi. A huan sungah a tuu cing a, unok paakte a lo hi.

³Ka ngaihno kei a’ hi a, kei zong ama a’ hi’ng. Amah in unok pak lakah a tuute gamtasak hi.

⁴Ngaihno aw, Jerusalem khuapi bangin na etlawm mahmah a, Tirzah khuapi bangin na hoih mahmah a, vantung aksi bangin na deihhuai hi.

⁵Keima lam hong nga kei in. Na mai in hong leng lua hi. Gilead mual tunga keelhon diang leklek bangin na samphekte phe velvel hi.

⁶Na hate zong, a kisil khin phet tuuhon bangin pak singseng hi. A tok khat zong om lo a, a vekpi-in kituak dimdiam hi.

⁷Na lu khuhna puan sung panin na kho hong san lihleh hi.

⁸Kumpi-zi sawmguk, kumpi zineu sawmgiat, simzawh lohin nungak tampi om kha ding a,

⁹ahi zongin khat bek ka ngai a, amah pen vahui bangin it-huai hi. Amah pen a nu’ tanu neihsun hi a, a nu’ ta it pen khat ahi hi.

¹⁰Zing khuavak tawh a kibang hih nungak kua ahi hiam? Amah melhoih mahmah a, nitaang, khataang, a bang hi.

¹¹Kuam sunga om singkungnote a en ding, leengguite a pak nai hiam a en ding, mang kawlsing a pak nai hiam a en dingin singno huanah ka paisuk hi.

¹²Galdo dingin a kipan sakol hawlpa a lin’ bangin nang kong ngaihna hangin ka lingling hi.

¹³Hong ciahkik in, hong ciahkik in, Shulam numei aw. Nang kong muh theih nadingun hong ciahkik in, hong ciahkik in. Shulam nungak, khanglui lai-a a lamte bangin bang hangin hong mu nuam na hi uh hiam?