Read Tedim Chin ISAIAH 10 Bible Online

ISAIAH 10 - Tedim Chin bible

ISAIAH 10

¹A cimawhte’ thutang kimlai hei khiatsakin, keima mite sungah a zawngte’ thuman sutkhia-in, meigong numeite’ neihsa amau a’ ding a suahtheihna ding le pa nei lote’ neihsa amau’ nek dingin a bawl theih nadingun a man lo thukhensatna pia a, nenniamna thu a gelhte in gimna ngah ta uh hen!

³Gimpiak ni hun, gamlapi panin huihpi hong nun’ ciangin note in bangcih ding na hi uh hiam? Huhna ngenin kua kiangah tai ding a, na neihsa uh koi lai-ah koih ding na hi uh hiam?

⁴Thongkiate’ lakah tonbucipin om ding le a kithat mite lakah sih ding bek a om hi. Hih thute khempeuh hangin ama hehna damzo nai lo a, ama khut kizanlai hi.

⁵Assiria-te pen ka hehna mite gimpiak nadingin molhtum le ciangkhutin ka zat ahi hi.

⁶Keima thu a ngaihsun lo minam le kei a hong hehsak mite’ neihsa sutin laksakin, amaute pen konglak buannawng bangin a tuancil dingin amaute sawlin thu ka pia hi.

⁷Ahih hangin a kumpipa in tua bang bek sawm lo a, a lungsim in zong tua bang bek ngaihsun lo hi. Ama lungsim sungah minam tampi suksiat nopna thu om hi.

⁸Bang hang hiam cih leh amah in, “Ka galkapmangte, kumpi vive hikhin hi lo ahi hiam?

⁹Kalno khuapi pen Karkhemish khuapi tawh kibang hi lo ahi hiam? Hamath khuapi pen Arpad khuapi tawh kibang hi lo ahi hiam? Samaria khuapi pen Damaskas khuapi tawh kibang hi lo ahi hiam?

¹⁰Jerusalem le Samaria milimte sangin milim lianzaw a nei milim kumpi gamte ka khut in ban khin ahih ciangin

¹¹Samaria le a milimte tungah ka bawl bangin Jerusalem le a milimte tungah bawl lo ding ka hi hiam?” ci hi.

¹²Topa in Zion Mual le Jerusalem khua-ah ama nasep dingteng a zawh khit ciangin Assiria kumpipa kiphasakin a kisialhna le a kiphatsakna hangin gim a pia ding hi.

¹³Bang hang hiam cih leh amah in, “Keimah in thu theihtelna nei ka hih manin keima thahatna le keima pilna tawh ka hih khin hi. Mihingte’ gamgite lakhia-in amau’ sumte ka sut khin a, keimah in bawngtal bangin a gammite ka sugawp hi.

¹⁴Vasa bumek bangin mihingte’ hauhna ka la ziau hi. A kinusia vasa tuite mite in a lak bangin leitung khempeuh ka la khin hi. A kha a zap, a kam a ka, a ham khat beek om lo hi,” a ci hi.

¹⁵Amah a likto pa pen molhtumin a zang ding bangkeek, sing ahi lo mipa pen ciangkhut bangin a likto ding bang keekin, phuk nadingin amah a zang pa tungah, hei, kihisak thei ding ahi hiam? Singat tem zong amah a zang pa tungah kiliansak thei ding ahi hiam?

¹⁶Tua ahih ciangin Topa, Vanglian TOPA in ama mi thaute lakah natna lianpi tungsak ding a, tua natna pen amaute sungah mei bangin kuang niloh ding hi.

¹⁷Israel-te’ khuavak pen mei suakin, Israel-te’ Siangtho Pa pen meikuang suak ding hi. Ni khat sungin ama lingkungte le lingte kangin beitum ding hi.

¹⁸Gah tampi a piangsak ama leitang le ama gamlak a minthanna pen nuntakna le pumpi dong takin TOPA in susia ding a, mi cina khat a si tawh kibang ding hi.

¹⁹A omlai gamlak singkungte tawm mahmah ta a, naupang khat nangawn in khat khatin sim khin thei hi.

²⁰Tua ni a kipan Israel a omlaite, Jakob innkuan a suakta laite in amau a sugawp pa suang nawn loin, TOPA ahi, Israel Siangtho Pa pen thuman tawh suanin nei ding uh hi.

²¹Jakob innkuan a omlaite a vanglian Pasian kiangah ciahkik ding hi.

²²Na mi Israel-te, tuipi sehnel zah a phak hangin amaute tawmkhat bek hong ciahkik ding hi. Amaute’ thuak dingin a kilawm bangin thu a kikhen ahi hi.

²³Bang hang hiam cih leh Topa, Vanglian TOPA in a thukhennasa bangin leitung khempeuhah beisiangna a bawl ding hi.

²⁴Tua ahih ciangin Topa, Vanglian TOPA in thu gen a, “Zion-ah a teng ka mihingte aw, Egypt mite’ hih bangin amaute in molhtum tawh hong satin a ciangkhut uh hong liik ciangin Assiria mite kihta kei un.

²⁵Bang hang hiam cih leh a sawt loin note tungah ka thangpaihna bei ding a, ka hehna amaute’ tung tu-in, amaute sia ding uh hi.

²⁶Vanglian TOPA in Oreb suangpi-ah Midian mite a sukgawp bangin, amah in amaute tungah gimpiakna zang ding a, Egypt mite a thuaksak bangin Assiria mite thuaksak ding hi.

²⁷Tua ni ciangin na liangko panun ama vangikpi kinkhia ding a, ama hakkol pen na ngawng panun bei ding hi,” a ci hi.

²⁸Rimmon gam pan galte hong kipanin Aiath khua hong tung uh a, Migron khua kantanin hong pai uh a, Mikmash khua-ah a van uh hong seng uh hi.

²⁹Amaute in mualciang kantanin Geba khua-ah zan khat giak uh hi. Rama khuamite lau-in ling uh a, Saul’ tenna Gibeah khuamite a tai uh hi.

³⁰Gallim khuamite aw, nakpitakin kiko un! Laisah khuamite aw ngai un! Anathoth khuamite aw, amah dawng un!

³¹Madmenah khuamite taikhia a, Gebim khua-a a teng mite a suakta dingin a tai uh hi.

³²Tuni mahmahin Nob khua-ah galte tungin khawl uh a, Zion Mual ahi Jerusalem khuapi a khuttum uh sinsan uh hi.

³³En un, Topa, Vanglian TOPA in a kihtakhuai vangliatna tawh singhiangte heuh ding hi. A kung sangte kiphuk ding a, a kisangsakte a niamin kikoih ding hi.

³⁴Amah in tulak singte hei tawh phuk ding a, Lebanon mual a singkung liante tawh pukkhawm ding hi.