Read Tedim Chin ISAIAH 16 Bible Online

ISAIAH 16 - Tedim Chin bible

ISAIAH 16

¹Moab mite in Jerusalem-a om gam ukpa tungah sehnel gam Sela khua panin tuunote a puak uh hi.

²A bu a kipaih khiatsak ciangin a cih nading thei loin a leng kawikawi vasate bangin Arnon guntui ngahmunah Moab mite om uh hi.

³Amaute in Judah mite kiangah, “Kote tungah thuhoih hong lak unla, thutangin hong gamta un. Sunkim laitak a singliim bangin kote hong liah un. A kihawlkhia kote hong seel unla, galtai kote hong heek kei un.

⁴A kihawlkhia ko Moab mite note lakah hong tengsak unla, kote hong susiate’ kiang panin kote’ belh hong hi un. A nengniam pa om nawn loin siatna hun beita a, a khe tawh a sik mipa gam sung panin a manthan ciangin,

⁵itna kip tawh kumpi tokhom khat kiphut ding a, thuman sep ding a manlang, thutang zongin thu a khen mipa pen David’ buk sunga om tua tokhom tungah thuman tawh tu ding hi,” a ci uh hi.

⁶Tua ciangin Judah mite in, “Moab’ kiphatsakna thu i za khinta hi. Amah kiphasak mahmah hi. A kiliatsakna, a kiphatsakna, a kihihsakna, ama kisialhnate khempeuh a mawkna ahi hi,” a ci uh hi.

⁷Tua ahih ciangin a thuakna uh hangin Moab mite kap hen la, mi khempeuh zong Moab mite’ hangin kap ta uh hen. Nakpi takin gimna a thuak laitakun Kirhareseth khua-ah a anlim nekte uh a phawkkhak uh ciangin khasia-in a kap uh hi.

⁸Bang hang hiam cih leh a hiang zaai-in tuipi kantan a, Jazer khua banin sehnel gam dongah a zaam ama hiangte, minam dangte’ tote in sattan ahih manin Heshbon lolaite le Sibmah leengguite vul ta uh hi.

⁹Tua ahih ciangin Jazer khua mite a kah bangin Sibmah leengguite’ hangin kei ka kap hi. Heshbon le Elealeh khuamite aw, ka khitui tawh note kong kawtsak hi. Bang hang hiam cih leh galkidona in note’ singgah le ante hong banzo hi.

¹⁰An tampi a pian’ ngeina lolai-ah lungdamna le nuamna om nawn lo hi. Leenggui lote-ah lasakna om lo a, lungdam a kikona om nawn lo hi. Leenggah cilna-ah kuamah in leengtui suk nawn lo a, leenggah lawh cianga kikona aw kidaisak ta hi.

¹¹Tua ahih ciangin Moab gam hangin laiza lasakna bangin ka lungsim kisat gaihgaih a, Kirhareseth khuapi hangin kei mahmah zong ka kisat gaihgaih hi.

¹²Moab amahmah hong kilaakin, a sangna munah lungkhamin hong pai a, ama siangtho munah thu a nget ciangin bangmah ngah lo ding hi.

¹³Hih bang thu pen TOPA in a beisa hun lai-in Moab tawh kisai-in a gensa thu ahi hi.

¹⁴Ahih hangin tu-in TOPA in, “Nasem dingin a kicial kum hunte sung bangin, kum thum sungin, ama mihon tampite om taseleh Moab’ minthanna in simmawhna thuak ding a, a suakta lai mite pen tawm mahmahin, thaneem ding uh hi,” a ci hi.