Read Tedim Chin ISAIAH 17 Bible Online

ISAIAH 17 - Tedim Chin bible

ISAIAH 17

¹Damaskas tawh kisai thu hih bangin gen hi: En un, Damaskas pen khuapi hi nawn loin ninbulomtang suak ding hi.

²Ama khuapite kinusiacip paisuak ding hi. Tuuhonte’ omna mun suak ding a, tua tuuhonte lum hithiatin bangmah in lausak lo ding hi.

³Efraim gam panin kulhpi bei-in, Damaskas khua panin kumpi gam mangthang ding hi. Syria mi a suakta laite pen Israel mite mah bangin mindai ding uh hi, Vanglian TOPA in ci hi.

⁴Tua ni ciangin Jakob’ liatna bei ding a, ama hauhna khempeuh mangthang ding hi.

⁵An a la mi in ankung ding laite kaikhawmin ante a kilak khit ciangin leitang a hawm guakin a om tawh kibang ding a, mi khat in Refaim Kuam sungah ansang a kaihkhop khit ciangin lolai a hawm guakin a om tawh zong kibang ding hi.

⁶Oliv kung a kisin’ khit ciangin a hiang sangpen dawnah pum nih pum thum singkung hiang dawnah pum li pum nga a omlai tawh kibang lel ding hi, Israel-te’ TOPA Pasian in ci hi.

⁷Tua ni ciangin mite in amaute a Bawlpa pi ngaihsut ding uh a, amaute’ mit in Israel-te’ Siangtho Pa en ding uh hi.

⁸Amaute in amau khut tawh a bawlsa uh biakna taute don lo ding uh a, amau’ bawlsa Asherah milimte hitaleh paknamtui halna biakna taute hitaleh muanin nei nawn lo ding uh hi.

⁹Tua ni ciangin amau’ khuapi muanhuaite pen Hiv mite le Amor mite in Israel mite’ hangin a nusiat uh munte tawh kibang ding a, gamkhing a suak ding hi.

¹⁰Nomau hong honkhia Pasian note in mangngilhin, nomau’ belh Suangpi phawk lo na hih manun note in biakna huan bawlin kung hoihte suan a, kung namdangte tawh pehin,

¹¹tuate na suan ni mahun thakhatin khang a, na tuh ni uh a zing ciang mahin a hong pak hangin note in a gah na lokha kei ding uh hi. Gimna le lungkhamna hong tun ni-in tuate maimang ding hi.

¹²Ah, mi tampite’ kikona, tuipi ging bang! Ah, minamte’ otna, tui lianpi ging bang!

¹³Tui lianpi a ging bangin minamte awng uh hi. Ahih hangin amah in amaute tai ding a, gamlapi pekah amaute taikhia ding uh hi. Mualtung a huih mai-ah ansi leeng bang leh huihpi mai-a pingpei bangin leengkhia mang ding uh hi.

¹⁴En un, nitakin hong lausak a, zingsang ma-in amaute beita! Hih bang thute pen eite hong susia-in eite a hong luhgawpte in a thuak ding uh ahi hi.