Read Tedim Chin ISAIAH 18 Bible Online

ISAIAH 18 - Tedim Chin bible

ISAIAH 18

¹Ah, Ethiopia gunte’ galkhat, puankhai gunkuangpi a omna gamte in Nail gun tawnin tui tungah laisah tawh a kibawl gunkuangpite tungah tuangin taangmi hong sawl uh hi. No a zaptel makaite aw, amau’ gam gunpi in a phelkhap, a vanglian a gualzo minam, a nai a gamla-ah a kikihta mi, a tun sang mi, a cineel minamte kiangah va pai un.

³Leitung a teng mi khempeuh, leitung a om mi khempeuh aw, mualte tungah lim khat hong kilah ciangin en un! Peengkul hong kimut ciangin ngai un!

⁴Bang hang hiam cih leh TOPA in kei tungah, “Nitaang sunga nisa silsel, anlak nisat hun sunga meiizun bangin, ka omna panin daitakin ka en ding hi,” hong ci hi.

⁵Bang hang hiam cih leh leenggah lawh hun ma deuh, leenggui a pak khit, leenggah a puamcin laitakin, amah in singhiang heuhna temkawi tawh a selte atkhia ding a, a zaam zeizai a hiangte heuhkhia ding hi.

⁶Tuate khempeuh mualtung a om vasate’ nek ding le leitung a ganhingte’ nek dingin kinusia ding hi. Khuakhal ciangin vasate in ne ding a, phalbi ciangin leitung a ganhingte in ne ding uh hi.

⁷Tua hun ciangin, amau’ gam gunpi in a phelkhap, a vanglian a gualzo minam, a nai a gamla-ah a kikihta mi, a tun sang mi, a cineel mite kiang panin Vanglian TOPA’ min omna Zion mual, Vanglian TOPA’ tungah letsong hong kipuak ding hi.