Read Tedim Chin ISAIAH 21 Bible Online

ISAIAH 21 - Tedim Chin bible

ISAIAH 21

¹Babylon gam tawh kisai thu hih bangin gen hi: Leitaw lam panin pingpei hong kipat mah bangin, a lauhuai gam panin siatna hong pai hi.

²A kihtakhuai maangmuhna khat kei tungah hong kigen hi. A sutzo mipa in sut a, a susiazo mipa in susia hi. Elam galkapte aw, kuanto un. Media galkapte aw, umcih un. Babylon’ piansak khuisatnate khempeuh Pasian in beisak ta hi.

³Tua ahih ciangin ka kawng na a, nausuak numei in na a sak bangin na ka sa hi. Khua a za thei lo zah dongin a kuncipin ka om a, khua a mu thei lo zah dongin lungkia-in ka om hi.

⁴Ka lung vai a, launa in hong sidaangsak hi. Keima lunggulh zan khuamial pen keima linna a suak hi.

⁵Amaute in sabuai phahin, sualpuante phah uh a, an ne-in tui dawn uh hi. Uliante aw, tho un; lum, sathau nuh un!

⁶Bang hang hiam cih leh Topa in kei tungah: “Pai in; galvil khat koih inla, ama muh bangbang gensak in.

⁷Amah in a kopkopin sakol tung tuang mite, la tunga a tuangte, kalaoh tunga a tuangte a muh ciangin limtak, phatakin encik hen,” hong ci hi.

⁸Tua ciangin a mu pa kiko a, “Topa aw, tausang tungah sun tawntung ka ding a, ka vilna munah zan khuavak ka om hi.

⁹En in, sakol tung tuangte a kopkopin hong pai!” a ci hi. Adang khat in, “Babylon cim hi, cim hi. A milim pasian-te khempeuh leilak dongah amah in suksiatsak hi,” ci-in a dawng hi.

¹⁰A kicilsa, a kiseepsa keima mite aw, Israel-te’ Pasian, Vanglian TOPA’ tung panin ka zaksa thu teng note tungah ka hong gen hi.

¹¹Edom gam tawh kisai thu hih bangin gen hi: Seir mual tung panin khat in kei hong sam a, “Galvil pa aw, tuzan bangci hiam? Galvil pa aw, tuzan bangci hiam?” hong ci hi.

¹²Galvil pa keimah in, “Zing ni hong suak a, zan khua zong hong mial hi. Thukan nuam na hih leh hong paikik inla hong kan in,” ka ci hi.

¹³Arabia gam tawh kisai thu hih bangin gen hi: Dedan mi khualzin honte aw, Arabia gamlakah na giak ding uh hi.

¹⁴Tema gam a teng mite aw, a dangtakte tui puak unla, galtaite an tawh dawn un.

¹⁵Bang hang hiam cih leh amaute, namsau, a kidoksa namsau, a kikeek thal le gal in a phutna panin a hong tai uh ahi hi.

¹⁶Bang hang hiam cih leh Topa in keima tungah, “Thacial kum hunte mah bangin kum khat sungin Kedar mite’ minthanna khempeuh bei ding hi.

¹⁷Kedar mi thaltawi siam a omlaite tawm ding hi. Bang hang hiam cih leh TOPA, Israel Pasian in hih thu gen khinzo hi,” hong ci hi.