Read Tedim Chin ISAIAH 30 Bible Online

ISAIAH 30 - Tedim Chin bible

ISAIAH 30

¹TOPA in, “Kei’ ngimna hilopi-in thu vaihawmna a semkhia, kei’ lungsim lopi-in kipawlna dang a bawl manun khialhna a bawl thuahthuah; keimah thu hong dong lopi-in Faro’ hutna sung a bel ding le Egypt’ liahna a zong dingin Egypt gamah paisuk dingin a kuankhia, a lehdo mite in gimna ngah tahen.

³Tua ahih ciangin Faro’ hutna pen na maizumna uh hi ding a, Egypt liahna sungah na bukna uh nomau’ zahhuaina hi ding hi.

⁴Bang hang hiam cih leh amau’ uliante Zoan khua-ah va tung uh a, amau’ tangmite in Hanes khua a va phak uh hangin,

⁵amaute tungah phattuamna a pia thei lo, maizumna le mindaina cih loh buang huhna le phattuamna bangmah a pia thei lo Egypt mite’ hangin Judah mi khempeuh in maizumna ngah ding uh hi,” a ci hi.

⁶Negeb gam a om ganhingte tawh kisai thu hih bangin gen hi: Amaute in humpinelkai nu le humpinelkai pa, gul gunei le a leeng thei gulpi a omna, lungkhamna le gimna gam nawkin, amau’ hauhnate la nungzangah amau’ sumte kalaoh tungah suanin, amaute tungah phattuamna bangmah a pia thei lo mite tungah a puak uh hi.

⁷Bang hang hiam cih leh Egypt’ huhna bangmah man loin a hawmpi ahi hi. Tua ahih manin, “Taang loin a tu hithiat Egypt,” ci-in min ka phuah hi.

⁸Tu-in pai inla, hong tung lai ding hunte-ah teci ahi ngitnget dingin amaute’ mai-ah suangpek tungah gelh inla, laibu khat sungah at in.

⁹Bang hang hiam cih leh amaute pen a lehdo mite, a zuauthei tapate, TOPA’ thuhilhna a ngai nuam lo mite ahi uh hi.

¹⁰Amaute in thu mutheite tungah, “Mu kei un,” ci uh a, kamsangte tungah, “Kote’ tungah thuman hong gen kei un. Kote tungah thuzol bek hong gen unla, thutak ahi lote hong gen un.

¹¹Lampi nusia-in, lamzin panin pial unla, Israel-te’ Siangtho Pa’ thu hong zasak kei un,” a ci uh hi.

¹²Tua ahih ciangin Israel-te’ Siangtho Pa in, “Note in hih thu simmawhin, zawhthawhna le khemna suangin, tuate muang na hih manun,

¹³hih mawhna pen note a dingin kulh sangpi khat khangkham a, lawtkhia-in a cim dektak, theihkholh lohin a cim vat tawh kibang ding hi.

¹⁴Tua cipna pen iplah ding om nawn loin a kidengkham beelseek pa’ beel themte meikhuka om meilakna ding ahi zongin, tuikhuka om tui dipna ding ahi zongin a om nawn het lo tawh kibang ding hi,” a ci hi.

¹⁵Bang hang hiam cih leh Israel-te’ Siangtho Pa, Topa PASIAN in, “Kihei kikna le khawlna bek tawh note in suahtakna na ngah ding uh hi. Daitakin omna le muanna pen nomau’ thahatna hi ding hi,” a ci hi. Ahih hangin note na tuaci kei uh a,

¹⁶“Hilo! Sakol tung tuangin manlang takin i tai ding hi,” ci na hih uh ciangin note na taikhia ding uh hi. “Sakol zaptel tungah i tuang ding hi,” ci na hih uh ciangin note hong delh mite zong zaptel ding hi.

¹⁷Mual sang dawna om dial khuam ahi a, mualtung a limlahna tawh a kibangin ahi zongin, note hong kinusiat dong matengin, mi khat’ tawnna tawh mi tulkhat tai-in, mihing nga’ tawnna tawh note khempeuh na taimang ding uh hi.

¹⁸Tua ahih ciangin note hong hehpih nuamin TOPA in hong ngak a, note tungah hehpihna hong lah ding amah kipakta hi. Bang hang hiam cih leh TOPA pen a thutang Pasian hi a, amah a muangte khempeuh thupha ngah ahi hi.

¹⁹Jerusalem khuasunga a teng, Zion sunga om mite aw, note na kap nawn kei ding uh hi. Note’ kahna aw hangin TOPA in hong hehpih taktak ding a, amah in a zak ciangin note hong dawng ding hi.

²⁰Topa in note tungah cihmawhna le gimna hong tunsak hangin amahmah in note hong hilh ding a, note in amah na mu ding uh hi.

²¹Taklamah na kihei ciang uh ahi a, veilamah na kihei ciang uh ahi zongin, “Hih pen lampi hi, hih tawn un,” cihna aw, na nunglam panun na bil un a za ding hi.

²²Tua ciangin note in ngun tawh a kizut na milimte uh le kham a kiluan, a kisung na milimte uh na ninsak ding uh hi. Nin bangin tuate na thehthang ding uh a, tuate tungah, “Beimang ta un!” na ci ding uh hi.

²³Khaici na tuh nadingun amah in guah hong zusak ding a, lei panin a piang an hoih tampi tak hong pia ding hi. Tua ni ciangin gankhahna, mun zaina-ah na ganhingte un lopa ne ding uh hi.

²⁴Lo a kho bawngtalte le late in kawbia le tu-ka tawh a kitoksa an al ne ding uh hi.

²⁵Na galte uh’ tausangte pukin mi tampi a sih ni-in, mual sang le mual neute tung khempeuhah luitui luang ding hi.

²⁶Tua tham loin, TOPA in ama mite’ liamma tuamin ama satna meimate a damsak ni ciangin, khataang pen nitaang bang ding a, nitaang pen ni sagih sunga taangzah bangin a zah sagihin a taang ding hi.

²⁷En un, TOPA’ vangliatna le a minthanna vang, gamlapi panin kimu thei hi. Meikuang le meikhu in ama hehna hong kilangsak a, ama kampaunate, mei bangin a kuang hi.

²⁸Na khempeuh a tai tuikhang bangin ama mai-ah huihpi nungsak a, minam dangte nawtin sugawp a, amau’ gitloh vaihawmnate a suksiatsak hi.

²⁹Ahi zongin no Pasian’ mite in ahihleh biakna pawi a kikham ni zan a bangin la na sa ding uh hi. Israel-te a hu TOPA’ biakinn-ah a pai dingin tamngai aw ginna zui-in a kuankhiate bangin na lungdam ding uh hi.

³⁰TOPA in heh mahmahna le a kangtum thei meikuang sung panin vanging, huihpi, le gialpi tawh, ama liatna minthanna aw kizasakin, ama khut a vik sukna kimusak ding hi.

³¹Amah in a ciangkhut tawh a sat ciangin, Assiria mite in TOPA’ aw kihta mahmah ding uh hi.

³²TOPA in amaute gim pia-in ciang tawh a satna a gingte tawh kituakin khuang le laiza lasaknate tumin na gingsak ding uh hi. Amah in a khut vikin amaute a do ding hi.

³³Assiria kumpipa a kihalna ding mei phualpi mun, sawtpekin kibawl khinzo hi. Kumpipa a dingin a baihsa-in kikoih a, a mi halna pen lianin kisangsak a, sing a sangpi-in vum venvan hi. TOPA in kaat kuang hu sangkhia ding a, tua mei phualpi tawhkuang ding hi.