Read Tedim Chin ISAIAH 31 Bible Online

ISAIAH 31 - Tedim Chin bible

ISAIAH 31

¹Egypt gamah huhna ngen dingin paisuk a, sakol suanin nei-in leengte a tam manin muang a, sakol tung tuangte a hat mahmah manin muang napi-in Israel-te’ Siangtho Pa a suang lo, TOPA thu a dong lote in gimna ngah ta hen!

²Ahih hangin amah pilin gimna tungsak a, thu a gensate dokkik loin, siatna a bawl mite le mawhna nasep a seppihte gim a pia hi.

³Egypt mite mihing hi a, Pasian hi lo hi. Amau’ sakolte sa hi a, kha hi lo hi. TOPA in a khut a zan ciangin a huhpa pukin, huhna a ngah pa tuk ding a, amaute khempeuh siakhawm ding uh hi.

⁴Bang hang hiam cih leh TOPA in keima tungah hih bangin hong ci hi: Humpinelkai ahi a, humpinelkai khanglai a hat mahmah in ahi zongin a sa nek ding a ngik ciangin tua humpi a do dingin tuucing honpi khat kikaikhawmin, amaute’ otna hangin lau tuan hetloin, amaute’ gamlumna hangin a sin a dawi tuan loh mah bangin Vanglian TOPA zong Zion Mual tungah galdo dingin kuansuk ding hi.

⁵A bu a hongin, a kot lamlam vasate bangin Vanglian TOPA in Jerusalem dal ding hi. Amah in dalin khahkhia ding a, amah susia loin suaktasak ding hi.

⁶Israel mite aw, nakpitakin na do pa uh’ lamah kihei kik un.

⁷Bang hang hiam cih leh a kuamah peuh in no a dingin na bawlsa uh, mawhna ahi na ngun milimte uh na paihkhiat hun uh hong tung ding hi.

⁸“Assiria pen mihing’ namsau ahi lo, namsau khat tawh puk ding a, mihing’ namsau ahi lo, namsau khat in susia ding hi. Namsau panin tai ding uh a, a tangvalte uh zawhthawh thu tawh nasem dingin kikoih ding hi.

⁹Amau’ belh a kumpipa uh a launa hangin tai ding a, buaina hangin a uliante in a dialkhai uh taisan ding uh hi,” ama meikuang Zion-ah a om, ama meikhuk Jerusalem khua-ah a om TOPA in ci hi.