Read Tedim Chin ISAIAH 34 Bible Online

ISAIAH 34 - Tedim Chin bible

ISAIAH 34

¹Minam khempeuhte aw, thu za dingin hong pai un. Mihingte aw, hong ngai un! Leitang le a tungah a om khempeuhte aw, ngai un. Leitung buppi le a tung panin a hong pai mi khempeuh in ngai un.

²Bang hang hiam cih leh minam khempeuh tungah TOPA lunghamin, amaute khempeuh tungah heh mahmah a, a simang dingin amaute koihin, thah dingin a pia khinta hi.

³A kithat amau’ mite kilawnkhia ding a, a siluang hawmte uih semsem ding hi. Amau’ sisan in mual khempeuh sansak ding hi.

⁴Vantunga a om khempeuh muatmang ding a, laidal bangin vantungte kizial ding hi. Leenggui panin a tehte pulhin, theikung panin a tehte a pulh bangin aksi hon khempeuh pulh ding uh hi.

⁵Bang hang hiam cih leh ka namsau in vantungah a sep ding khempeuh a zawh khit ciangin, en un, a siamang dinga ka sehsa Edom mite tungah thu a khen dingin hong kumsuk ding hi.

⁶TOPA in namsau khat nei hi. Sisan tawh kidim ding a, biakpiakna tuuno si le keel si, tuutalte’ kal thau tawh a kizolsak bang ding hi. Bang hang hiam cih leh TOPA in Bozrah khua-ah hih biakpiakna nei ding a, Edom gamah hih bang tampi thahna omsak ding hi.

⁷Gamsial talte amaute tawh tukkhawm ding a, bawngtalno gehsate le bawngtal hatte tukkhawm ding hi. Amau’ gam pen sisan tawh kidiah ding a, amau’ leitang pen sathau in nipsak ding hi.

⁸TOPA in Zion a hotkhiat ding, a galte a thuksak ding hun khat a nei hi.

⁹Luitui khempeuh kultaltui suak ding a, leitang pen kaat suak ding hi. Gam sung khempeuh pen a kuang kultaltui a suak ding hi.

¹⁰Sun le zanin mit lo ding a, vantung lamah a khu kahto ngitnget ding hi. Khang khat pan khang khat, a hawmguakin om ding a, kuamah in nawk ngei nawn het lo ding hi.

¹¹Ahih hangin mu le sakuh in gam sung teng luah ding uh a, keising le va-akte om ding uh hi. Tua gam pen gamsimtham suakin, hawmsuak ding hi.

¹²Kumpi om lo Gam, ci-in amaute in min phuak ding uh a, a ulian khempeuhte a mawkna hi ding uh hi.

¹³Kumpi inn liante sungah lingkung po ding a, kulh a nei khua sungah laho le thangling kungte a po ding hi. Ngiate’ an zonna mun suakin, vasa-kalaohte’ omna mun hi ding hi.

¹⁴Sangak le ngiate kikhawl ding uh a, keeldawi in a lawmte sam ding hi. Dawi zong hong tuaksukin ama omna ding mun a zong ding hi.

¹⁵Tua munah keising in bu tomin, tua lai-ah tui-in keuh ding a, ama liimah a note huai ding hi. Musite zong kikhawm tuahin a nupa ciat un om ding uh hi.

¹⁶TOPA’ laibu sung panin zong unla hih thu sim un. Hih ganhingte khempeuh khat beek zong mangthang lo ding a, lawm sam khat zong om lo ding hi. Bang hang hiam cih leh TOPA in thu pia khinzo a, amahmah in amaute kaikhawm ding hi.

¹⁷Amah in amaute a dingin leitang hawmsak ding a, amau’ tanh ding ciat a pia ding hi. Amaute in tua gam nei tawntung ding uh a, khang khat pan khang khat dongin teng paisuak ding uh hi.