Read Tedim Chin ISAIAH 54 Bible Online

ISAIAH 54 - Tedim Chin bible

ISAIAH 54

¹Ta a nei lo, a ciing mi aw, lungdamin la sa in. Nausuak natna a thuak ngei lo mi aw, la sa khia inla, a gingin kiko in! Bang hang hiam cih leh a kinusia numei’ tate pen a kitenpih numeite’ tate sangin tamzaw ding hi, TOPA in ci hi.

²Na bukmun khan inla, na tenna puanbukte kizalsak in. Cil bawl kei in. Na khaute sausak inla, na khetphimte khenkip in.

³Bang hang hiam cih leh taklam le veilamah nangmah kizelin, na suanlekhakte in minam dangte’ leitang luah ding uh a, a kinusia khuapite mi tawh dimsak ding uh hi.

⁴Lau kei in, maizumna na thuak kei ding hi. Cihna ding thei loin om kei in; maizumin nang hong kikoih lo ding hi. Bang hang hiam cih leh na khangno lai-in na zulhtatna le na meigonna hangin hong kikonate na phawkkha nawn kei ding hi.

⁵Bang hang hiam cih leh nangmah hong Bawlpa pen nang a dingin na pasal bang hi ding a, ama min pen Vanglian TOPA ahi hi. Israel-te’ Siangtho Pa pen nang hong honkhia pa hi a, amah pen leitung buppi’ Pasian a kici hi.

⁶Khangno lai-a zineih a kima, kinusia-in a dah mahmah zi a kisamkik bangin TOPA in nang hong samkik hi, na Pasian in ci hi.

⁷Tomno sung nang kong nusia pak a, ahih hangin hehpihna lianpi tawh nang kong lakik ding hi.

⁸Hehluatna hangin tomno sung nang kiang panin ka maitang ka seel a, ahih hangin tawntung itna tawh nang kong hehpih kik ding hi, nangmah a hong honkhia TOPA in ci hi.

⁹Bang hang hiam cih leh hih pen kei a dingin Noah’ hun mah tawh a kibang hi. Noah tuite leitungah hong pai nawn lo ding, ci-in ka kiciam mah bangin nang tungah heh nawn loin nang a hong tai nawn lo dingin ka kiciam hi.

¹⁰Bang hang hiam cih leh mual liante kihemin, mual neute a kikhin zongin nang kiang panin ka itna kip paikhia ngei lo ding a, na nopsakna ding ka thuciamna kinlo ding hi, nang a hong hehpih TOPA in ci hi.

¹¹“Gimna a thuak, huihpi’ nawkgawp, hehnepna a ngah lo khuapi aw, en in, na suangte, suangvui hoih tawh ka ciang ding a, na bulpite suangmanpha tawh ka hih ding hi.

¹²Na khumdawnte suangmanpha tawh, na kulhkongpite suangsan tawh, na kulh khempeuh a manpha suang tawh ka bawl ding hi.

¹³“TOPA in na tapate khempeuh hoihtakin hilh ding a, na tapate daupai mahmah ding uh hi.

¹⁴Thuman le thutang in nang hong thahatsak ding hi. Nenniamna tawh na kigamla ding a, nang na lau kei ding hi. Kihtakna tawh na kigamla ding a, nangma nai-ah tuate hong pai lo ding hi.

¹⁵Mi khatpeuh in note tawh kidona a piansak leh tua pen keima kiang pan hi lo hi. Note tawh kidona a piangsak peuhmah note’ hangin puk ding uh hi.

¹⁶“En un, pum zapin ama kizatna ding ciatin a seek dingin hiam a bawl sikseekpa ka piangsak khin hi. A susia dingin a susia gawp thei pa zong ka piangsak khin hi.

¹⁷Nangmah do nadingin a kibawl hiam peuhmah maavang lo ding a, thukhenna sungah na langah a pang mi khempeuh na nialgawpzo ding hi. Hih thu pen TOPA’ nasemte’ gamhluah le keima kiang panin amaute’ dikna a kilahna ahi hi, TOPA in ci hi,” a ci hi.