Read Tedim Chin ISAIAH 57 Bible Online

ISAIAH 57 - Tedim Chin bible

ISAIAH 57

¹Thuman mipa si a, kuamah in tua thu ngaihsutin nei nawn lo hi. Kuamah in a theih loh kalin thutak mite si uh hi. Bang hang hiam cih leh tuahsiatna panin thuman mipa kilakhia a, nopsakna sungah amah tum hi.

²Thutangin a gamta mite in a sihna uhah nopna ngahin tawlnga uh hi.

³No, aisan numeite’ tapate, numei tawh a mawh mite le numei pangtatte’ tuletate aw, hih lai-ah hong pai un.

⁴Note in kua mawlpih gawpgawp na hi uh hiam? Kua’ tungah na kam uh ka beba-in na leii uh phen na hi uh hiam? Tawsaw kung lak singkung hing khempeuh nuai-ah pasian biakna-in nulepa mawhna a bawl, kuamsung, suanghawm sungah na tate uh a that note pen khialhna tate, zuauna’ tuletate hi lo na hi uh hiam?

⁶Kuam sunga om suangmaite na la uh a, tua suangmaite na bia uh hi. Tuate tungah tui tawh biakpiakna sungin, an tawh biakpiakna na paipih uh hi. Hih thute’ hangin kei lungdam ding ka hi hiam?

⁷A lian a sang mual tungah nulepa mawhna na bawl uh a, tua munah biakna pia dingin na paito uh hi.

⁸Kongkhak le kongkhakmung nungah nangmah in na milimte na suang hi. Nangmah in kei hong nusia-in na puante na suah a, nang hong luppih dingin na cial mite tawh na lupna zai deda tungah kahto-in, tua lai-ah na hukna teng na kamsak hi.

⁹Molek pasian kiangah a pai dingin sathau tawh khual na zin a, na paknamtuite tawh na siam tawpin na kipuah hi. Nang in gamlapi-ah na tangmite na sawl a, Leinuai dong nangawnah na paisak hi.

¹⁰A gamla na khualzinna hangin nang na gim mahmah a, ahih hangin nangmah in, “Lametna om kei,” na ci kei hi.

¹¹Nang zuautatin kei na hong phawk kei hi. Kei na hong ngaihsut loh nading a piangsak zah dingin hih pasian-te bang hi leltak ahi hiam? Sauveipi sung pau loin ka om hithiat manin kei hong zahtak lo na hi hiam?

¹²Nangma gamtatna a manin na ngaihsunkha hi. Ahih hangin na gamtatnate ka pholak ding a, na milimte in nang hong huh zo lo ding hi.

¹³Nang cimawhin na kiko ciangin na milim kaihkhopte kihonsak in! Huih in amaute mutkhia-in, husanna in amaute seemkhia ding hi. Ahih hangin kei hong beel mi in leitang ngah ding a, ka mual siangtho a luah ding hi.

¹⁴“Zik un, zik un, lampi bawl un; ka mite’ lampi a dongkhak thei ding na khempeuh lakhia un,” kici ding hi.

¹⁵Bang hang hiam cih leh a sang, a lian, a nungta tawntung Pa, ama min Siangtho ahipa in hih bangin ci hi: “Kei pen a sangna mun le a siangtho munah ka om a, a kiniamkhiat mite’ lungsim le a kisik mite’ lungsim a thakhauhsakkik dingin kisikna le kiniamkhiatna lungsim a neite tawh zong kei ka omkhawm hi.

¹⁶Ka mite tungah nuntakna ka pia hi. Amaute ka mawhsak paisuak kei ding a, amaute tungah ka heh tawntung kei ding hi.

¹⁷Amau’ huaiham-mawhna hangin ka heh mahmah a, ka hehna lungsim tawh amaute gim pia-in ka nusia hi. Ahih hangin amaute a lungsim uh khauhin, a gamtat ngei bangun gamta lai veve uh hi.

¹⁸“Amau’ mawh gamtatnate a vekin ka mu khin a, ahih hangin amaute ka damsak ding hi. Amaute makaihin ka hehnem ding a, a dah a kapte hehnemin ka lungdamsak ding hi.

¹⁹Nopsakna, nopsakna, a gamla le a nai mi khempeuh tungah om tahen. Keimah in amaute ka damsak ding hi, TOPA in ci hi.

²⁰Ahih hangin migilote pen a kilok tui tawh kibang uh hi. Bang hang hiam cih leh tuipi khawlcip thei lo a, a tuite in buan le ninte laamto uh hi.

²¹Migilote a dingin nopsakna om lo hi,” ka Pasian in a ci hi.