Read Tedim Chin ISAIAH 60 Bible Online

ISAIAH 60 - Tedim Chin bible

ISAIAH 60

¹Jerusalem khuapi aw, tho-in sun nitaang bang in! TOPA’ minthanna in nangmah hong taanzo hi.

²Minam dangte khuamial in tuamcip ding a, ahi zongin nangma tungah TOPA’ khuavak hong taang ding hi. Ama minthanna in nang hong ompih ding hi.

³Nangma khuavak sungah minam dangte hong pai ding uh a, nangma taankhiatna sungah kumpite hong pai ding uh hi.

⁴Na kimkotah khuadak inla mu in. Na mite kikaikhawmin nang kiangah a ciah dingin hong pai uh hi. Na tapate gamlapi panin hong ciah ding uh a, na tanute naungek bangin hong kipua ding hi.

⁵Tua ciangin nangmah in mu-in na maitai ding a, na lungsim lingin na lungdam ding hi. Bang hang hiam cih leh tuipi tawnin nangma kiangah van hong kipuak ding a, minamte’ hauhna khempeuh nangma kiangah hong tung ding hi.

⁶Midian mite le Efah mite’ kalaoh note, kalaoh honpite in nang hong tuam ding uh a, Sheba gam sunga om khempeuh hong pai ding uh hi. Amaute in kham le paknamtui hong paipih ding uh a, TOPA phatna a taangko ding uh hi.

⁷Kedar gam tuuhonte khempeuh nang kiangah hong kipua ding a, Nebaioth mite’ tuutalte nangma deih nana-ah kizang ding hi. Ka biakna tau tungah piak dingin tuate hong kipaipih ding a, keimah in a minthang ka biakinn ka minthangsak semsem ding hi.

⁸Meiipi leeng bangin hong pai henhan hih teembawte, vakhute a bukah a leeng bangin a hong leeng henhante kuate ahi hiam?

⁹Hih teembawte pen tuipi gei le tuikulh-ah a om teembawte hi a, Tarshish teembaw lianpite in hong makaih hi. TOPA in nangmah a minthang mahmahin hong bawlkhin ahih manin gamlapi panin tua teembawte in nangma mite hong puak uh a, a ngun a khamte uh tawh hong puakkhawm uh hi. TOPA, na Pasian, Israel-te’ Siangtho Pa a pahtawina-in a hong puak uh ahi hi.

¹⁰Gamdang mite in na kulhte ciangkik ding uh a, amau’ kumpite in nangma na hong sem ding uh hi. Bang hang hiam cih leh ka hehna tawh nang kong vatgawp khin a, ahih hangin tu-in keima maipha tawh nang tungah hehpihna kong nei khin hi.

¹¹Kigual deudau-in a hong paina uhah a kumpite uh hong makai-in, mite in minamte’ hauhna na kiang hong tuttheih nadingin na kulhkongpite kihong tawntung ding a, a sun a zanin kikhak ngei lo ding hi.

¹²Bang hang hiam cih leh nangma na hong sem lo minam le kumpi gam beimang ding a, tua minamte kisia-maimang ding hi.

¹³Keima biakinn mun a mel a hoihsak dingin Lebanon mual minthanna ahi taaksan sing, hiangpa sing le taksingte na kiangah hong tung ding a, keima khengakna mun ka minthangsak ding hi.

¹⁴Nang hong nengniamte’ tate na mai-ah a kunsa-in hong pai ding uh a, nang hong simmawh mi khempeuh na khe mai-ah hong bok ding uh hi. Amaute in nang pen TOPA’ khuapi, Israel-te’ Siangtho Pa’ Zion, hong ci ding uh hi.

¹⁵Hong kinusia, hong kimudah, kuama hong nawk loh nang pen a tawntungin lianin, khang khat pan khang khat lungdamna ahi dingin ka hong bawl ding hi.

¹⁶Nupi khat in a ta nawi pia-in limtakin a kep bangin, minamte le kumpite in nang hong vakin hong kem ding uh hi. Tua ciangin kei pen TOPA, nangmah a hong Honpa, nangmah a hong Tankhiapa, Jakob’ Vanglian Pa ka hihna na thei ding hi.

¹⁷Sumngo tangin kham kong puak ding a, sik tangin ngun kong paipih ding hi. Sing tangin sumngo, suang tangin sik kong puak ding hi. Nuam na sak nadingin na mang liante uh bawlin na nasem ukte uh thuman thutang tawh na ka semsak ding hi.

¹⁸Na gam sungah ngongtatna thu kiza nawn lo ding a, na gam sungah siatmaina le suksiatna om nawn lo ding hi. Nangmah in na kulhte pen Hotkhiatna, na kulhkongpite pen Phatna, na ci ding hi.

¹⁹Sun hunin ni pen nangma khuavak hi lo ding a, zan hunin kha pen na khuavak hi nawn lo ding hi. TOPA pen a tawntung nangma khuavak hi ding a, na Pasian pen na minthanna hi ding hi.

²⁰Na ni tum nawn lo ding a, na kha zong tumkik nawn lo ding hi. Bang hang hiam cih leh TOPA pen nangma khuavak hi tawntung ding a, na thumna hunte beita ding hi.

²¹Na mihingte khempeuh thuman ding uh hi. Keima min a than nadingin keima suansa kung, ka khut tawh ka sepsa gam pen amaute in nei paisuak ding uh hi.

²²A ngekpen mipa minam khat suak ding a, a neupente milianpi suak ding hi. Kei pen TOPA ka hi hi. A hun a tun ciangin keimah in thakhatin hih thu ka tungsak ding hi.