Read Tedim Chin ISAIAH 9 Bible Online

ISAIAH 9 - Tedim Chin bible

ISAIAH 9

¹Zebulun minamte le Naftali minamte’ tenna gamte in mindaina thuak ngei uh a, ahi zongin mai lamah pahtawina ngahkik ding uh hi. Mediterranean tuipi a kipanin nisuahna lam Jordan gun gal, minam dangte’ tenna Galilee gam sung minthang kik ding hi.

²Khuamial sunga a pai mite in khuavak lianpi mu khinta a, khuamial thukna gam sungah a teng mite tungah khuavak taang khinzo hi.

³Nangmah in amaute na pungsak a, a lungdamna uh na khangsak hi. Anlak hun ciangin lungdamna le mite in vankisutte a hawm ciangun a lungdam bangun nangma mai-ah amaute lungdam uh hi.

⁴Bang hang hiam cih leh Midian-te a kizawh ni-a bangin nangmah in amau’ vangik puakna hakkol le amaute a kisatna ciangkhut na kuaihtansak a, nangma mi a bawlsia minamte na zogawp hi.

⁵Galkap hangte’ khedap khempeuh le si a baang puan khempeuh mei-in kicih ding hi.

⁶Bang hang hiam cih leh eite a dingin naungek khat hong suak a, eite’ tungah tapa khat hong kipia hi. Amah pen eite hong ukpa hi ding a, ama min pen “Lamdang Thulak pa, Vanglian Pasian, Tawntung Pa, Nopsakna Kumpi,” kici ding hi.

⁷Tuhun a kipanin a tawntungin David kumpi tokhom tung le ama gam sungah thutang le thuman phutin, a lian semsem ama ukna le nopsakna in mong nei lo ding hi. Vanglian TOPA’ deih luatna in hih thu hong tungsak ding hi.

⁸Topa in Jakob tungah thu khat khah a, Israel tungah thu hong tung ding hi.

⁹“Leiseekte kicim khin hi; ahih hangin suangseek tawh i lam ding hi. Theithek singte kisia khin hi; ahih hangin taamtak sing tawh i khek ding hi,” ci-a kiphasakin lungsim kihisak Efraim mite le Samaria gam sunga teng mi khempeuh in thei ding uh hi.

¹¹Tua ahih ciangin TOPA in amaute do-in a langpang ding bawl a, amau’ galte a hanthawn hi.

¹²Ama mai-a om Syria mite le a nunga om Filistia mite in kam ka-in Israel netum uh hi. Hih thute khempeuh hangin ama hehna damzo nai lo a, ama khut kizanlai hi.

¹³Amaute a satpa’ lamah Israel mite kihei lo a, Vanglian TOPA zong lo uh hi.

¹⁴Tua ahih ciangin TOPA in Israel sung panin a makaite le a mihonte, a lu panin a mei dongin ni khat thu-in a vatmai hi.

¹⁵Upa pa le a zahtakhuai mipa pen a lutang hi a, zuauthu a hilh kamsangpa pen a mei ahi hi.

¹⁶Bang hang hiam cih leh hih minam a makaihte in lam khialsak a, amau’ makaih mite in siatna ngah uh hi.

¹⁷Tua ahih ciangin amau’ tangvalte tungah Topa lungdam lo a, pa nei lote le a meigong numeite uh tungah hehpihna nei lo hi. Bang hang hiam cih leh mi khempeuh pen Pasian’ thu a khual om loin siatna a bawl vive hi a, kam khempeuh in haina thu a gen uh hi. Hih thute khempeuh hangin ama hehna damzo nai lo a, ama khut kizanlai hi.

¹⁸Bang hang hiam cih leh gitlohna mei bangin kuang a, lingkungte le lingte kangtum sak hi. Gamlak lopa phate kuangsak a, meikhu lomtangin van lamah kizialto uh hi.

¹⁹Vanglian TOPA’ hehna hangin meikuang bangin gam sung kang a, mite pen mei a kicih sing tawh kibang uh hi. Kuamah in a sanggampa nangawn zah tuan lo hi.

²⁰Amaute in a taklama omte ne uh a, ahih hangin a gil uh kiallai veve hi. A veilama omte ne uh a, ahih hangin kham nai lo uh hi. Mite in amau’ vengte’ sa ne ciat uh hi.

²¹Manasseh in Efraim, Efraim in Manasseh ne-in, tua tegel in Judah langpang khawm uh hi. Hih thute khempeuh hangin ama hehna damzo nai lo a, ama khut kizanlai hi.