Read Tedim Chin SIAMPI LAIBU 1 Bible Online

SIAMPI LAIBU 1 - Tedim Chin bible

SIAMPI LAIBU 1

¹TOPA in Moses sam a, kikhopna buk panin amah hopihin hih bangin ci hi:

²“Israel mite tungah gen inla, amaute tungah hih bangin ci in: Note khatpeuh in TOPA’ tungah biakna na paipih uh ciangin, ganhing tawh na biakna pen bawnghon panin hitaleh tuuhon panin hitaleh na paipih ding uh hi.

³“Ama biakna pen bawnghon panin meihal biakna ahihleh, amah in a sitbaang lo a pa khat pia ding a, TOPA’ mai-ah a kisan’ theih nadingin kikhopna bukkongah pia ding hi.

⁴Amah in meihal biakna ganhing lu tungah a khut nga ding a, ama a dingin kilemna bawl nadingin kisang ding hi.

⁵Tua ciangin amah in TOPA’ mai-ah a bawngtal go ding hi. Aaron’ suan siampite in a si hong paipihin, kikhopna buk kong-a biakna tau kimkotah a si theh ding hi.

⁶Tua ciangin amah in meihal biakna ganhing a vun hawkin semnen ding a,

⁷Aaron’ suan siampite in biakna tau tungah mei koihin, mei tungah a ngeina bangin sing koih ding hi.

⁸Tua ciangin Aaron’ suan siampite in a sanente, a lutang le a thaute, biakna tau tunga om mei tunga sing tungah a ngeina bangin koih ding a,

⁹ahih hangin a sungkuate le a khete tui tawh sil ding hi. Tua ciangin siampipa in mei tawh kihal biakna, TOPA a dingin a gim namtui, meihal biakna-in biakna tau tungah a vekpi-in hal ding hi.

¹⁰“Meihal biak nadingin ama letsong pen tuu hitaleh keel hitaleh a hon lak panin ahihleh, amah in a sitbaang lo a pa khat pia ding hi.

¹¹Amah in TOPA’ mai biakna tau tung leilu lampangah go ding a, Aaron’ suan siampite in biakna tau tung kimkotah a si theh ding hi.

¹²Tua ciangin amah in semnen ding a, biakna tau tunga om mei tunga sing tungah a ngeina bangin siampipa in a lutang le a thau tawh koih khawm ding a,

¹³ahih hangin a sungkuate le a khete amah in tui tawh sil ding hi. Siampipa in a vekpi-in pia-in, biakna tau tungah hal ding hi. Tua pen TOPA a dingin a gim namtui, mei tawh kihal biakna, meihal biakpiakna ahi hi.

¹⁴“TOPA’ tungah ama biakna pen vasa tawh meihal biakna ahihleh, amah in vakhu tawh ahi zongin, kawl vakhuno tawh ahi zongin, a biakna hong paipih ding hi.

¹⁵Tua ciangin siampipa in biakna tau-ah paipihin a lu heektat ding a, biakna tau tungah hal ding hi. Biakna tau pangah a si taakkhiasak ding hi.

¹⁶Amah in a tangkhai le a multe bot khia-in, vut koihna, biakna tau pang nisuahna lamah lawnkhia ding hi.

¹⁷Amah in a khate-in balkek ding a, ahih hangin baltat lo ding hi. Tua ciangin siampipa in mei tunga om sing tung, biakna tau tungah hal ding hi. Tua pen TOPA a dingin a gim namtui, mei tawh kihal biakna, meihal biakna ahi hi.