Read Tedim Chin SIAMPI LAIBU 10 Bible Online

SIAMPI LAIBU 10 - Tedim Chin bible

SIAMPI LAIBU 10

¹Tu-in Aaron’ tapate Nadab le Abihu in amau’ paknamtui beel tuak la-in, a sungah mei koih uh a, a tungah paknamtui koihin, TOPA in amau’ tungah tua banga thu a piak ngei loh a siang lo mei, TOPA’ mai-ah a pia uh hi.

²TOPA’ omna mun panin mei hong paikhia-in amaute kang a, TOPA’ mai-ah a si uh hi.

³Tua ciangin Moses in Aaron’ kiangah, “TOPA in, ‘Ka kiang nai-a a omte kiangah keimah a siangtho-in ka kilak ding a, mi khempeuh’ mai-ah keimah hong kiminthangsak ding hi,’ ci hi,” ci-in a gen hi. Aaron pau loin a om hi.

⁴Moses in Aaron’ pa’ sanggampa Uzziel’ tapate Mishael le Elizafan samin amaute kiangah, “Hong pai unla biakbuk panin giahphual pualamah na sanggamte uh puakhia un,” a ci hi.

⁵Tua ahih ciangin amaute in hong naihin, Moses’ sawl bangin giahphual pualamah amau’ puantungsilh mah uh tawh amaute a puakhia uh hi.

⁶Tua ciangin Moses in Aaron le a tapate Eleazar le Ithamar kiangah, “Na lu uha na sam uh phiahsak kei unla, na puante uh balkek kei un. Tua bangin na hih uhleh note si-in, mihon khempeuh tungah TOPA’ hehna hong tung ding hi. Ahih hangin na mipih uh, Israel mihon buppi pen, TOPA’ mei in a katlup mite’ hangin dahin kap thei ding uh hi.

⁷Kikhopna buk kong panin a pualamah paikhia kei un. Na pai uhleh na si ding uh hi. Bang hang hiam cih leh TOPA’ nilh sathau note’ tungah om hi,” a ci hi. Moses’ gen bangin amaute a gamta uh hi.

⁸TOPA in Aaron kiangah,

⁹“Nang hitaleh na tapate hitaleh kikhopna bukah na pai uh ciangin leenggahzu hitaleh khamtheih zu hitaleh ne kei un. Na nek uhleh na si ding uh hi. Tua pen na suan na khakte uh tungah khang tawntungin ngeina kip khat hi ding hi.

¹⁰Note in a siangtho le a mawkmawk, le a nin le a siang na khen ding uh hi.

¹¹TOPA in Moses tungtawnin amaute’ tunga a gensa thukhamte khempeuh note in Israel mite a hilh ding na hi uh hi,” a ci hi.

¹²Moses in Aaron le a omlai a tapate Eleazar le Ithamar kiangah, “TOPA’ tungah meihal biakna sung panin a vallai ahi an tawh biakna la unla, tua pen a siangtho pen ahih manin silngo sawh lohin biakna tau gei-ah ne un.

¹³Tua an pen TOPA’ tungah meihal biaknate lak panin nang le na tapate’ kaih ding ahih manin a siangtho mun khatah na ne ding uh hi. Tua bang ding mahin kei’ tungah thu hong kipia hi.

¹⁴Ahih hangin a kivei a iik le a kipia a pheite pen nang le na tapate le na tanute in a siangtho mun khatpeuhah ne ding uh hi. Bang hang hiam cih leh tua pen Israel mite in thunuama a biakpiakna panun nang le na tapate’ kaih dinga hong kipia ahi hi.

¹⁵TOPA in a thupiaksa bangin a kipia a phei le a kivei a iikte ahihleh TOPA’ mai-ah vei-a biakna-in vei dingin amaute in meihal biakna sathau tawh hong paipih ding uh a, tua pen nang le na tapate in a tawntungin na kaih ding uh ahi hi,” a ci hi.

¹⁶Tu-in Moses in khialhna hanga biakna keel tawh kisai thu limtakin kan a, na kihal khin mawk hi. Aaron’ tapa a omlai Eleazar le Ithamar-te’ tungah amah heh a,

¹⁷“Note in mihonte a dingin TOPA’ mai-ah kilemna bawlin, amau’ mawhna a kilakkhiat theih nadingin note’ tungah hong kipiasa a siangtho sa pen khialhna hanga biakna hi napi, bang hangin a siangtho mun khatah ne lo na hi uh hiam?

¹⁸En un, biakbuk sungah a sisan kipaipih lo hi. Ka thupiaksa bangin note in biakbuk sungah na nek dingun a kilawm ahi hi,” a ci hi.

¹⁹Tua ciangin Aaron in Moses kiangah, “En in, tuni-in amaute in TOPA’ mai-ah amau’ khialhna hanga biakna le amau’ meihal biakna pia khinzo uh hi. Tua bang hinapi hih bang thute kei’ tungah hong tung veve hi. Khialhna hanga biakna tuni-in a ne hi leng, TOPA’ muhna-ah sanhuai ding ka hi hiam?” a ci hi.

²⁰Moses in tua thu a zak ciangin a lungkim hi.