Read Tedim Chin SIAMPI LAIBU 11 Bible Online

SIAMPI LAIBU 11 - Tedim Chin bible

SIAMPI LAIBU 11

¹TOPA in Moses le Aaron tungah,

²“Israel mite kiangah hih bangin gen un: Hihte pen leitung a om ganhing khempeuh lak panin na nek theih ding uh a nungta ganhing ahi hi.

³Ganhingte lak panin a khecin a ka, eknel a hai peuhmah na ne thei ding uh hi.

⁴Ahi zongin eknel haite lak pan hitaleh khecin kate lak pan hitaleh, note in na nek theih loh dingte uh: Kalaoh in eknel a hai hangin a khecin ka lo ahih ciangin note a dingin a nin ahi hi.

⁵Sakikh ganhing in eknel a hai hangin a khecin ka lo ahih ciangin note a dingin a nin ahi hi.

⁶Bilpi in eknel a hai hangin a khecin ka lo ahih ciangin note a dingin a nin ahi hi.

⁷Vok pen khecin ka ahih hangin eknel hai lo ahih ciangin note a dingin a nin ahi hi.

⁸Note in tuate’ sa na ne kei ding uh a, a sisate zong na lawng kei ding uh hi. Tuate pen note a dingin a nin ahi hi.

⁹“Tui sunga omte sung panin nek theih dingte: Tuipi sung hitaleh gun sung hitaleh tui sungah a om phe le lip a neite peuhmah na ne thei ding uh hi.

¹⁰Ahih hangin tuipi sung, gun sunga om phe le lip a nei lo, tui sunga a hontat ganhingte le tui sunga a nungta ganhingte pen note a dingin a kihhuai ahi hi.

¹¹Tuate pen note a dingin a kihhuai hi ding hi. Note in tuate’ sa na ne kei ding uh a, a sisate zong na kih ding uh hi.

¹²Tui sunga a omte sung panin phe le lip a nei lo peuhmah note a dingin a kihhuai ahi hi.

¹³“Vasate lak panin note in na kih ding uh, a kine lo ding, a kihhuaite: Muvanlai, mupi, luimu,

¹⁴mumeika, musan nam khempeuh,

¹⁵va-ak nam khempeuh,

¹⁶vasa-kalaoh, pengpelep, vatawt, musi nam khempeuh,

¹⁷keising, tuimu, gun vakang,

¹⁸gam vatawt, tui vatawt, musane,

¹⁹gun vapi, gun vazonei nam khempeuh, huihtun, le bak ahi hi.

²⁰“Khe li tawh a pai, kha a nei ganhing khempeuhte, note a dingin a kihhuai ahi hi.

²¹Ahi zongin khe li tawh a pai, kha a nei ganhingte khempeuh lak panin leitungah a tuan nadingun a khepek uh tawh kizom ngaltak tawn a neite na ne thei ding uh hi.

²²Tuate lak panin na nek theih dingte uh: Kauphe kitom nam khempeuh, kauphe zol nam khempeuh, khuangbai nam khempeuh, le kauphe kisau nam khempeuh ahi hi.

²³Ahih hangin khe li nei-in kha a nei ganhing dangte khempeuh note a dingin a kihhuai ahi hi.

²⁴“Hihte tawh note a nin na suak ding uh hi. A sisa a lawng peuhmahte a nitak mateng a nin hi ding a,

²⁵a sisa themkhat a pua peuhmah in a puan sawpin, a nitak mateng a nin hi ding hi.

²⁶A khecin a ka ahih hangin eknel a hai lo ganhing peuhmah note a dingin a nin ahi hi. Tuate a lawng peuhmah a nin hi ding hi.

²⁷Khe li tawh a pai ganhingte khempeuh lak panin amau’ khebom tawh a paite khempeuh note a dingin a nin ahi hi. Tuate a sisa a lawngkha peuhmahte a nitak dong a nin hi ding a,

²⁸a sisa a puapa in a puan sawpin, a nitak mateng a nin hi ding hi. Tuate note a dingin a nin ahi hi.

²⁹“Leitungah a vak kawikawi, a pai thei ganhingte lak panin note a dingin a ninte: Savokphual, zusa, innhikpi nam khempeuh,

³⁰tawlbawkpi, tang, tangteuh, le sehnel gam thankik ahi hi.

³¹A hontat ganhing khempeuhte lak panin hihte pen note a dingin a nin ahi hi. Tuate a sisa a lawng peuhmah a nitak mateng a nin hi ding hi.

³²Tuate a sisa khat peuhpeuh a tukna nate, sing nazat, puan, savun, ippi le na khat peuhpeuhin a kizang beel khat peuhpeuh hitaleh a nin hi ding hi. Tuate pen tui sungah kidiah ding a, a nitak mateng a nin hi ding hi. Tua khit ciangin a siang hi ding hi.

³³Tuate khat peuhpeuh lei beel khat peuhpeuh sungah a kiat leh, tua sunga om khempeuh a nin hi ding a, note in tua beel na sukham ding uh hi.

³⁴Tua lei beel sungah a om a kine thei ding an tungah tua bang tui a tuk leh a nin hi ding hi. Tua bang beel sunga om dawn theih ding peuhmah a nin hi ding hi.

³⁵Tua bang a sisa themkhat a tukna peuhmah a nin hi ding hi. Meibung hitaleh beelpei hitaleh kisuzan ding hi. Tuate a nin hi a, note a dingin a kihhuai ahi hi.

³⁶Ahi zongin tuinak le tuibeem ahihleh a siang hi ding a, ahih hangin a sisate a lawng peuhmah a nin hi ding hi.

³⁷A kivawh ding khaici tungah tua a sisate themkhat a tuk leh, tua khaici a siang hi ding hi.

³⁸Ahih hangin khaici tui kidiah a, tua a sisate themkhat tua khaici tungah a tuk leh, note a dingin tua khaici a nin ahi hi.

³⁹“Note’ nek theih ding ganhing khat peuhpeuh a sih leh a sisa a lawng pa pen a nitak mateng a nin hi ding a,

⁴⁰a sisa a ne pa in ama puante sawpin a nitak mateng a nin hi ding hi. A sisa a puapa in zong ama puante sawpin a nitak mateng a nin hi ding hi.

⁴¹“Leitungah a hontat ganhing peuhmah a kihhuai hi a, tuate kine lo ding hi.

⁴²A awmtal peuhmah leh khe li-a a pai peuhmah, ahih kei leh khe tampi a nei, leitungah a pai a hontat ganhing khempeuh, note in na ne kei ding uh hi. Bang hang hiam cih leh tuate pen a kihhuai ahi hi.

⁴³A hontat ganhing khat peuhpeuh tawh nomau mah a kihhuai-in na kibawltawm kei ding uh a, tuate tawh nomau na kininsak tawm kei ding uh hi. Na kinitsak tawm uhleh a nin na suak ding uh hi.

⁴⁴Kei pen TOPA na Pasian uh ka hi hi. Tua ahih ciangin note ki-ap unla, kei siangtho ka hih manin note zong siangtho un. Leitungah a bokvak a hontat ganhing khat peuhpeuh tawh note na kininsak tawm kei ding uh hi.

⁴⁵Bang hang hiam cih leh note’ Pasian ahi dingin Egypt gam panin note a hong pai khiatpih pa pen keimah TOPA ka hi hi. Tua ahih ciangin kei siangtho ka hih manin note na siangtho ding uh hi,” a ci hi.

⁴⁶Hih pen a nin le a siang, a nungta ganhing nek theih ding le nek theih loh ding khen nadingin ganhing le vasa, tui sunga a pai a nungta ganhing khempeuh, le leitungah a hontat ganhing khempeuh tawh kisai-in ngeina ahi hi.