Read Tedim Chin SIAMPI LAIBU 13 Bible Online

SIAMPI LAIBU 13 - Tedim Chin bible

SIAMPI LAIBU 13

²“Mi khat in ama pumpi vun tungah a bawk ahi a, meima ahi a, a mel tuampian ahi zongin a neih a, tua pen ama pumpi vun tungah phaknatna a suah leh, tua pa pen siampipa kiang ahi a, ama tapa siampi khat peuhpeuh kiangah ahi zongin kipaipih ding hi.

³Siampipa in ama pumpi vun tunga natna mun vel ding hi. A natna munah a om a multe kangin ama vun sangin a natna thuktum zaw-in a kimuh leh, tua pen phaknatna hi a, siampipa in a vel khit ciangin amah a nin hi, ci-in gen ding hi.

⁴Ahih hangin ama pumpi vun sungah a natna mun kang napi-in, a vun sangin a thuk lozaw bangin omin, tua sungah a multe kang loin a om leh, siampipa in ni sagih sung cina pa khumcip ding hi.

⁵Siampipa in a ni sagih ni-in amah vel ding a, a natna noptuamin, a natna in a vun sung lawh lo hi ci-in a muh leh, siampipa in ni sagih sung mah khumcip lai ding hi.

⁶Siampipa in a ni sagih ni-in amah vel kik ding a, a natna mun mualin, a vun sung a lawh kei leh, siang hi, ci-in siampipa in gen ding hi. Tua pen meima mawkmawk hi lel a, amah in a puante sawpin a siang hi ding hi.

⁷Ahih hangin amah a sian nadingin siampipa kiangah a kilah khit ciangin a meima in a vun sung a lawh leh siampipa mai-ah kilak kik ding hi.

⁸Siampipa in vel ding a, a meima in a vun sung a lawh leh phaknatna hi a, siampipa in amah a nin hi, ci-in gen ding hi.

⁹“Mi khat in meima a neih ciangin siampipa kiangah kipaipih ding hi.

¹⁰Siampipa in vel ding a, a vun sungah a bawk kang omin, tua in a multe kangsakin a bawk sungah ma thak a om leh,

¹¹tua pen ama pumpi vun sungah a om luisa phaknatna hi a, siampipa in amah a nin hi, ci-in gen ding hi. Amah a nin ahih manin khumcip lo ding hi.

¹²Siampipa’ muh theihna ciangah tua natna in a vun phukhamin, tua natna a veipa’ vun khempeuh a lutang panin a khe dongin a lawh khit leh,

¹³siampipa in vel ding a, a natna in a pumpi khempeuh a lawh khit leh siampipa in tua natna tawh kisai-in amah siang hi, ci-in gen ding hi. A pumpi-in kang khin ahih manin amah a siang ahi hi.

¹⁴Ahih hangin ama tungah ma thak a kilat ciangin amah a nin hi ding hi.

¹⁵Siampipa in a ma thak velin, amah a nin hi, ci-in gen ding hi. Bang hang hiam cih leh a ma thak pen phaknatna ahih manin a nin ahi hi.

¹⁶Ahih hangin a ma thak pen kikheel kikin a kang a suah leh, siampipa kiangah pai ding a,

¹⁷siampipa in amah velin a natna pen a kang a suah leh, siampipa in natna a veipa siang hi, ci-in gen ding a, amah a siang hi ding hi.

¹⁸“Mi khatpeuh’ pumpi vun sungah a damsa meimatum khat om a,

¹⁹a meimatum munah a bawk kang ahi a, a san kang mun ahi zongin a om leh, siampipa kiangah kilak ding hi.

²⁰Siampipa in vel ding a, tua pen a vun sangin thukzaw-in a multe a kang a suah leh, siampipa in amah nin hi, ci-in gen ding hi. Tua pen phaknatna hi a, meimatum sung tawnin hong phukhia ahi hi.

²¹Ahih hangin siampipa in velin, tua tunga a multe kang loin a vun sangin a thukzawk kei a, mualin a om leh, siampipa in ni sagih sung khumcip ding hi.

²²Tua in a vun sung a lawh leh phaknatna hi a, siampipa in amah nin hi, ci-in gen ding hi.

²³Ahih hangin a natna mun pen mun khat bekah omin a kilawh kei leh meimatum pawn hi a, siampipa in amah a siang hi, ci-in gen ding hi.

²⁴“Tua ahih kei leh, pumpi in a vun tungah meikangma khat nei-in tua meikangma a thak mun pen a san kang ahi a, a kang ahi zongin hong suah leh,

²⁵siampipa in vel ding hi. Tua mun a om a multe kangin a vun sangin a natna a thukzawk leh, tua pen phaknatna ahi hi. Tua pen meikangma tawnin hong phukhia hi a, phaknatna ahih manin siampipa in amah a nin hi, ci-in gen ding hi.

²⁶Ahih hangin siampipa in velin, tua mun a multe kang loin a vun sangin a thukzawk kei a, mualin a om leh, siampipa in ni sagih sung khumcip ding hi.

²⁷Siampipa in a ni sagih ni-in amah vel ding hi. Tua in a vun sung a lawh leh phaknatna hi a, siampipa in amah nin hi, ci-in gen ding hi.

²⁸Ahih hangin a natna mun pen mun khat bekah omin a vun sung lawh loin mualin a om leh, tua pen meikangma pana bawk hi a, meikangma pawn ahih manin siampipa in amah siang hi, ci-in gen ding hi.

²⁹“Numei ahi a, pasal ahi zongin a lutang tung ahih kei leh a kha-ah meima khatpeuh a neih ciangin,

³⁰siampipa in tua natna vel ding hi. Tua natna pen a vun sangin thukzaw-in a kimuh a, a sunga a multe eng-in a mal a neu leh, siampipa in amah a nin hi, ci-in gen ding hi. Tua pen cithak ahi, lu-phak ahih kei leh kha-phak natna ahi hi.

³¹Siampipa in cithak natna velin, a vun sangin thukzaw lo bangin kimu-in tua sungah mul vom a om kei leh, siampipa in ni sagih sung cithak natna tawh tua pa khumcip ding a,

³²a ni sagih ni-in siampipa in a natna vel ding hi. A cithak kilawh loin, a sungah mul eng om loin, a cithak pen a vun sangin thukzaw loin a kimuh leh,

³³amah le amah a mul kikiat ding a, ahih hangin a cithak san kiat lo ding hi. Siampipa in adang ni sagih sung mah cithak natna tawh tua pa khum ding hi.

³⁴A ni sagih ni-in siampipa in a cithak vel ding a, a cithak in a vun sung lawh loin, a vun sangin a thuk lo zaw-in a kimuh leh, siampipa in amah a siang hi, ci-in gen ding hi. Amah in ama puante sawp ding a, a siang hi ding hi.

³⁵Ahih hangin amah a kisiansak khit ciangin a cithak in a vun sung a lawh leh,

³⁶siampipa in vel ding a, a cithak in a vun sung a lawh takpi leh, siampipa in mul eng a zon ding kisam lo hi; amah a nin ahi hi.

³⁷Ahih hangin ama mitah, cithak noptuam zo hi, ci-in mu a, a sungah mul vom po-in a cithak a dam leh, amah a siang hi a, siampipa in amah a siang hi, ci-in gen ding hi.

³⁸“Numei ahi a, pasal ahi zongin, a pumpi vun tungah a mel tuampian a kang mun a neih leh,

³⁹siampipa in vel ding a, a pumpi vun tunga om a tuampian munte pen a kang milmial ahihleh, tua pen vun a phukham meima hi a, amah a siang hi ding hi.

⁴⁰“Mi khat a sam pulh a, a lu a tol hangin amah a siang ahi hi.

⁴¹Mi khat a taltang le a paang panin a sam le a mul a pulh leh, amah a talkolh hi lel a, amah a siang ahi hi.

⁴²Ahih hangin a lutol tung hitaleh a talkolh tung hitaleh ah a san kang meima a om leh, tua pen a lutol tung ahih kei leh a talkolh tunga a suakkhia phaknatna ahi hi.

⁴³Tua ciangin siampipa in amah vel ding a, a bawk natna pen a lutol tung hitaleh a talkolh tung hitaleh ah, pumpi vun tunga phak om tawh kibangin a san kang ahihleh,

⁴⁴amah pen miphak hi a, a nin ahih manin siampipa in amah a nin hi, ci-in a gen kul hi; a lutang tungah ama natna a om ahi hi.

⁴⁵“Tua natna a nei mi phakpa in puankekte silhin a sam phiahsak ding a, amah in a muk humin, ‘Nin, nin!,’ ci-in kiko ding hi.

⁴⁶Amah in a natna a neih laiteng a nin hi ding hi. Amah a nin ahih manin giahphual pualam mun khatah amah guak teng ding hi.

⁴⁷“Samul puan hitaleh saihadial puan hitaleh, puan khat peuhpeuh tungah phaknatna a om ciang,

⁴⁸tua saihadial puan, samul puante, a tung le a pheite’ tung hitaleh, savun le savun tawh a kibawl na khat peuhpeuh tungah a om ciangin,

⁴⁹tua natna pen a hing melin ahi a, a san melin ahi zongin puan tungah a kilat ciang, puan a tung a phei tung hitaleh savun le savun tawh a kibawl na khat peuhpeuh tungah a om ciangin, tua pen phaknatna hi a, siampipa kiangah kilak ding hi.

⁵⁰Siampipa in a natna vel ding a, tua natna a banna na pen ni sagih sung koihcip ding hi.

⁵¹Tua ciangin amah in a ni sagih ni-in a natna velkik ding hi. A natna pen puan tungah kizelin, puan a tung a phei-ah hitaleh, savun le savun a kizatna na khat peuhpeuh tungah a om leh, tua natna pen a lauhuai phaknatna hi a, a nin ahi hi.

⁵²Amah in a puan hal ding hi. Tua natna pen puan a tung a phei-ah hitaleh, samul puan saihadial puan hitaleh savun tawh a kibawl na khat peuhpeuh tungah a om leh hal ding hi. Bang hang hiam cih leh tua pen a lauhuai phaknatna ahih manin mei sungah kihal ding hi.

⁵³“Siampipa in velin, a natna pen puan tung, a tung a phei-ah hitaleh, savun tawh a kibawl na khat peuhpeuh tungah a kizelh kei leh,

⁵⁴siampipa in tua natna a banna pen amaute in a sawp ding uh thu pia ding a, amah in adang ni sagih sung mah tua na koihcip ding hi.

⁵⁵Siampipa in tua natna a banna pen a kisawp khit ciangin vel ding hi. Tua natna a banna mun a mel a kikheel kei leh, a natna a kizelh loh hangin tua pen a nin mah ahi hi. Tua natna pen a sunglamah ahi a, a pualamah ahi zongin a baan leh mei sungah tua puan na hal ding uh hi.

⁵⁶Ahih hangin siampipa in vel a, a kisawp khit ciangin a meima a mualh leh, amah in a puan tung pan hitaleh savun tung pan hitaleh a puan a tung a phei tung pan hitaleh natna a banna mun balkhia ding hi.

⁵⁷Tua ciangin a puan tung hitaleh puan a tung a phei tungah hitaleh savun tawh a kibawl na khat peuhpeuh tungah a kilatkik leh, tua natna a kizel ahih manin natna a banna pen mei tawh na hal ding uh hi.

⁵⁸Ahih hangin a puan hitaleh puan a tung a phei hitaleh savun tawh a kibawl na khat peuhpeuh a kisawp khit ciangin tua natna a paikhiatna na pen, a nih veina kisawp kikin a siang hi ding hi,” a ci hi.

⁵⁹Hih pen samul puan hitaleh saihadial puan hitaleh puan a tung hitaleh a phei hitaleh, savun tawh a kibawl na khat peuhpeuh tungah a om phaknatna tawh kisai-in siang hiam, nin hiam, ci-in khen nading ahi hi.