Read Tedim Chin SIAMPI LAIBU 14 Bible Online

SIAMPI LAIBU 14 - Tedim Chin bible

SIAMPI LAIBU 14

²“Hih pen amah a kisiansak ni-in mi phakpa’ zuih ding ngeina hi ding hi. Siampipa kiangah amah kipaipih ding a,

³giahphual pualamah siampipa paikhia-in vel ding hi. Tua ciangin a phaknatna pen a phakpa’ tung pan a dam leh,

⁴a kisiangsak ding mipa a dingin a hing vasa siang nih le taamtak sing le a ausan puan le puknah a la dingin siampipa in amaute sawl ding hi.

⁵Amaute in lei beel khat sunga kikoih tuiluang tungah a vasa khat a gawh ding uh siampipa in thu pia ding hi.

⁶Amah in a hing lai vasa pen taamtak sing le a ausan puan le puknah tawh la khawmin, tuate le a hing lai vasa pen tuiluang tunga kithat vasa’ si sungah diah ding hi.

⁷Amah in phaknatna panin a kisiangsak ding pa’ tungah sagihvei theh ding a, tua ciangin amah siang hi, ci-in gen ding a, a hing vasa pen gamlakah khah ding hi.

⁸A kisiangsak ding mipa in a puante sawpin, a mul khempeuh metkhia-in, tui sungah amahmah kisilin, amah a siang hi ding hi. Tua khit ciangin amah giahphual ah hong ciah ding a, ahih hangin ama puanbuk pualamah ni sagih sung om ding hi.

⁹A ni sagih ni-in amah in a sam, a khamul le a mitkhu mul, le a pum tungah a om a mul khempeuh metkhia ding hi. Tua ciangin amah in a puante sawpin, tui sungah a pumpi silin, amah a siang hi ding hi.

¹⁰“A ni giat ni-in amah in a sitbaang lo tuuno a pa nih, le a sitbaang lo kum khat a pha tuuno a nu khat, le an tawh biakna ahi sathau tawh annel lawh thum le sathau biingta khat la ding hi.

¹¹Amah a siangsak ding siampipa in a kisiangsak ding mipa le hih nate, kikhopna bukkong a TOPA’ mai-ah paipih ding hi.

¹²Siampipa in tuuno a pa khat la-in sathau biingta khat tawh mawhna hanga biakna-in pia-in, vei-a biakna-in TOPA’ mai-ah tuate vei ding hi.

¹³Amaute in khialhna hanga biakna le meihal biakna, siangtho mun sunga a gawhna mun uhah amah in tuuno go ding hi. Bang hang hiam cih leh mawhna hanga biakna pen khialhna hanga biakna mah bangin siampipa a’ hi a, tua pen a siangthopen ahi hi.

¹⁴Siampipa in mawhna hanga biakna si tawmkhat la-in, tua si pen a kisiangthosak ding mipa’ taklam bilteep, a taklam khutpi, le a taklam khepi nuh ding hi.

¹⁵Tua ciangin sathau biingta panin kimkhat la-in amahmah’ veilam khut sungah sungin,

¹⁶a veilam khutsunga om sathau sungah a taklam khutme diahin, a khutme tawh a sathau kimkhatte TOPA’ mai-ah sagihvei theh ding hi.

¹⁷Ama khut sungah a omlai sathau kimkhatte pen siampipa in a kisiangthosak ding mipa’ taklam bilteep, a taklam khutpi, le a taklam khepi nuhin, mawhna hanga biakna si tungah koih ding hi.

¹⁸Siampipa in a khutsunga sathau omlai teng a kisiangthosak ding mipa’ lu nilh ding hi. Tua ciangin siampipa in ama a dingin TOPA’ mai-ah kilemna bawlsak ding hi.

¹⁹“A nitna panin a kisiangthosak ding mipa a’ ding kilemna bawl nadingin siampipa in a khialhna hanga biakna pia ding hi. Tua khit ciangin amah in meihal biakna go ding a,

²⁰meihal biakna le an tawh biaknate, biakna tau tungah pia ding hi. Tua bangin siampipa in ama a dingin kilemna bawlsak ding a, amah a siang hi ding hi.

²¹“Ahih hangin amah zawngin tuazah a piakzawh kei leh, ama a’ ding kilemna bawl nadingin a kivei ding, mawhna hanga biakna-in tuuno a pa khat, an tawh biak nadingin sathau tawh a kibawl annel lawh khat le sathau biingta khat pia ding a,

²²vakhu nih ahi a, kawl vakhuno nih ahi zongin, a piakzawh bangbang pia ding hi. Khat pen khialhna hanga biak nading hi a, a khat pen meihal biak nading ahi hi.

²³A ni giat ni-in amah in TOPA’ mai, kikhopna bukkong, siampipa kiangah ama kisianthosak nadingin tuate paipih ding hi.

²⁴Siampipa in mawhna hanga biakna tuuno, le a sathau biingta khat la-in, vei-a biakna-in TOPA’ mai-ah tuate vei ding hi.

²⁵Amah in mawhna hanga biakna tuuno go ding hi. Siampipa in mawhna hanga biakna si tawmkhat la-in, a kisiangthosak ding mipa’ taklam bilteep, a taklam khutpi, le a taklam khepi nuh ding hi.

²⁶Siampipa in amahmah’ veilam khut sungah a sathau kimkhat sung ding a,

²⁷a veilam khutsunga a om sathau tawmkhat a taklam khutme tawh TOPA’ mai-ah sagihvei theh ding hi.

²⁸Siampipa in ama khutsunga a om sathau tawmkhat a kisiangthosak ding mipa’ taklam bilteep, taklam khutpi, le a taklam khepite, mawhna hanga biakna si a kikoihna munah va nuh ding hi.

²⁹Siampipa in a khutsunga a omlai sathau teng a kisiangthosak ding mipa a’ ding TOPA’ mai-ah kilemna bawl nadingin a lu nilhsak ding hi.

³⁰Amah in vakhu hitaleh kawl vakhuno hitaleh, a piakzawh bangbang pia-in,

³¹khat pen khialhna hanga biak nading, a khat pen meihal biak nadingin an-a biakna tawh pia khawm ding hi. Siampipa in a kisiangthosak pa a dingin TOPA’ mai-ah kilemna bawlsak ding hi.

³²Hih pen phaknatna a vei, a kisianthosak nadingin biakna a pia zo lopa a dingin ngeina ahi hi,” a ci hi.

³³TOPA in Moses le Aaron kiangah,

³⁴“Note a dingin kong piak Kanaan gamah na om ciangun note’ leitang a inn khat sungah phaknatna kong tunsak ciangin,

³⁵inn nei pa pai-in siampipa kiangah, ‘Ka inn sungah natna nam khat a om ding tawh kibang,’ ci ding hi.

³⁶Tua ciangin, inn sunga om na khempeuh a nin hi, a kicih khak loh nadingin a natna a vel dingin siampipa a pai ma-in amaute in tua inn a na hawmsak nading uh thu pia ding a, tua khit ciangin inn vel dingin siampipa pai ding hi.

³⁷Amah in a natna vel ding hi. A natna pen tua inn kawm tungah omin, a hing mel ahih kei leh a san mel na pua-in, tua natna kawm maitang sangin a thuk zawk tuak leh,

³⁸innsung panin innkongah siampipa paikhia ding a, ni sagih sung inn khakcip ding hi.

³⁹A ni sagih ni-in siampipa hong paikikin en ding hi. Tua inn kawm tungah a natna a kizelh leh,

⁴⁰natna a banna suang lakhia-in khuapi pualam a nin mun khatah a paipih nadingun siampipa in thu pia ding hi.

⁴¹Amah in a innsung kimkot kiatsakin, amaute in a kiatkhiat, a kizutna themte, khuapi pualam a nin mun khatah bua ding uh hi.

⁴²Tua ciangin amaute in suang dang la-in, tua suangte’ omna munah koihin, amah in zutna dang la-in tua inn zut ding hi.

⁴³“Amah in a suangte lakhia-in a inn kiatin a zut khit ciangin tua inn sungah natna hong suahkik leh,

⁴⁴siampipa pai-in en ding hi. Inn sungah a natna a kizelh leh, tua pen inn sunga om a lauhuai phaknatna hi a, tua inn a nin ahi hi.

⁴⁵Amah in tua inn, a sing a suang le inn a kizutnate khempeuh phel ding a, khuapi pualam a nin mun khatah tuate puakhia ding hi.

⁴⁶Tua tham loin tua inn a kikhakcip sungteng a sungah a lut mipa a nitak dong a nin hi ding hi.

⁴⁷Tua inn sungah a lum mipa le an a ne mipa in ama puante sawp ding hi.

⁴⁸“Ahih hangin siampipa hong pai-in a vel a, a inn a kizut khit ciangin inn sungah natna a kizelh kei leh, tua ciangin a natna dam ahih manin siampipa in tua inn siang hi, ci-in gen ding hi.

⁴⁹Tua inn siangthosak nadingin amah in vasa neu nih, taamtak sing le a ausan khau le puknah tawh la khawmin,

⁵⁰beel sunga kikoih tui luang tungah a vasa khat go ding a,

⁵¹taamtak sing le puknah le a ausan khau pen a vasa hing tawh la khawmin, tua pen a kigo vasa’ si le tuiluang sungah diahin, tua inn sagihvei theh ding hi.

⁵²Tua bangin amah in vasa si tawh, tuiluang tawh, a hing vasa tawh, taamtak sing le puknah le a ausan khau tawh a inn siangsak ding a,

⁵³vasa hing pen khuapi pualam gamlakah khahkhia ding hi. Tua bangin amah in tua inn a dingin kilemna bawlsak ding a, tua inn a siang hi ding hi,” a ci hi.

⁵⁴Hih pen phaknatna khat peuhpeuh tawh kisai-in ngeina ahi hi: Cithak tawh kisai,

⁵⁵puan tung hitaleh innsung hitaleh ah a om phaknatna tawh kisai,

⁵⁶a bawk hitaleh meima hitaleh a tuampian’ khat peuhpeuh tawh kisai-in,

⁵⁷bang hunin nin a, bang hunin siang hiam, ci-in lah nading ahi hi. Hih pen phaknatna tawh kisai ngeina ahi hi.