Read Tedim Chin SIAMPI LAIBU 16 Bible Online

SIAMPI LAIBU 16 - Tedim Chin bible

SIAMPI LAIBU 16

¹Aaron’ tapa nihte in ngeina lopi-in TOPA’ mai-ah mei tawh va pai-in a sihlawh khit uh ciangin TOPA in Moses kiangah thu a gen hi.

²TOPA in Moses kiangah, “Thuciamna singkuang tunga om hehpihna tokhom mai, dalna puan sunglam a siangtho munah a hunlopi-in hong pai nawn loh nadingin na sanggampa Aaron kiangah gen in. A hunlopi-in hong pai leh amah si ding hi. Bang hang hiam cih leh tua mun pen hehpihna tokhom tunga meii sungah kei ka kilatna mun ahi hi.

³Ahih hangin siangtho munah Aaron hong pai ding zia in: Khialhna hanga biak nadingin bawngtalno khat le meihal biak nadingin tuutal khat hong paipih ding hi.

⁴“Amah in a siangtho saihadial puantungsilh silhin, saihadial pheituam teengin, saihadial kawnggak tawh kigakin, saihadial dialpi khim ding hi. Hihte pen a siangtho puan ahi hi. Amah in tui sungah a pumpi sil ding a, tua ciangin tua puante silh ding hi.

⁵“Amah in Israel mihonte tung panin khialhna hanga biak nadingin keeltal nih le meihal biak nadingin tuutal khat la ding hi.

⁶Aaron in amahmah a dingin khialhna hanga biakna-in a bawngtal pia-in, amah le a innkuanpihte a dingin kilemna bawl ding hi.

⁷Tua ciangin amah in keeltal nih la-in, TOPA’ mai kikhopna bukkongah tuate koih ding hi.

⁸Aaron in tua keel nihte tungah ai saanin, khat pen TOPA a’ ding, adang khat pen Azazel a’ ding ahi hi.

⁹Aaron in TOPA a’ ding ai a pha keel paipihin, khialhna hanga biakna-in pia ding hi.

¹⁰Ahih hangin Azazel a dingin ai a pha keel pen gamlakah Azazel’ kiangah a kipuak theih nadingin kilemna bawl nadingin a hingin TOPA’ mai-ah kipaipih ding hi.

¹¹“Aaron in amahmah a dingin khialhna hanga biakna-in a bawngtal pia-in, amah le a innkuanpihte a dingin kilemna bawl ding a, amahmah a dingin khialhna hanga biakna-in a bawngtal go ding hi.

¹²Amah in TOPA’ biakna tau panin mei-am a dim paknamtui beel khat le a kisunen paknamtui khut nih dim la ding hi. Amah in dalna puan sungah paipihin

¹³thuciamna singkuang tungah a om hehpihna tokhom pen paknamtui khu in a tuam theih nadingin TOPA’ mai-ah a om mei tungah a paknamtui koih ding hi. Tua hi kei leh amah si ding hi.

¹⁴Amah in bawngtal si tawmkhat la-in, a khutme tawh hehpihna tokhom a mailam tungah thehin, hehpihna tokhom mai-ah a khutme tawh a si sagihvei theh ding hi.

¹⁵“Tua ciangin amah in mite a’ ding ahi khialhna hanga biakna keel go-in, dalna puan sungah a si paipih ding a, bawngtal si a theh mah bangin a si thehin, hehpihna tokhom tung le hehpihna tokhom mai-ah theh ding hi.

¹⁶Amah in tua bangin Israel mite’ nitna hang, amau’ thu palsatna hang, le amau’ khialhna khempeuh hangin siangtho mun adingin kilemna bawl ding hi. Amah in amau’ nitna sungah amau tawh a omkhawm kikhopna buk a dingin tua mah bangin a bawl ding hi.

¹⁷Siangtho munah kilemna bawl dingin amah tumin ama a’ ding, a innkuanpihte a’ ding, le Israel mihonte khempeuh a dingin kilemna a bawl khit hong paikhiat matengin kikhopna buk sungah kuamah om lo ding hi.

¹⁸Tua ciangin TOPA’ mai-ah a om biakna tau-ah amah va pai-in, biakna tau siansuahna bawl ding a, bawngtal si le keel si tawmkhat la-in, biakna tau kimkota a kite nuh ding hi.

¹⁹Amah in a khutme tawh a si tawmkhat biakna tau tungah sagihvei thehin, siangsakin, Israel mite’ nitsakna panin biakna tau siangthosak ding hi.

²⁰“Amah in siangtho mun, kikhopna buk, le biakna tau siansuahna a bawl khit ciangin, keel hing pen paipih ding hi.

²¹Aaron in keel hing lu tungah a khut tegel nga-in, Israel mite’ mawhna, amau’ thu palsatna, le amau’ khialhnate khempeuh, keel tungah pulak ding hi. Amah in keel lu tungah tuate suanin, a paikhiatpih dingin a kithawisa mipa tawh sehnel gamah sawlkhia ding hi.

²²Keel in amau’ mawhnate khempeuh pua-in gam daihna-ah a pai dingin a keel khah ding hi.

²³“Tua ciangin kikhopna bukah Aaron hong pai-in, siangtho munah a tum hunin a silh saihadial puante suahin, tua lai-ah a puante nusia ding hi.

²⁴Amah in a siangtho mun khatah, a pumpi tui sungah silin, a puante silh ding a, hong paikhia-in, ama meihal biakna le mite’ meihal biakna pia-in, ama a’ ding le mite a dingin kilemna bawl ding hi.

²⁵Amah in biakna tau tungah khialhna hanga biakna sathau hal ding hi.

²⁶Azazel’ kiangah keel a paisak pa in a puante sawpin, a pumpi tui sungah sil ding a, tua khit ciangin giahphual ah hong ciah thei ding hi.

²⁷Siangtho munah kilemna bawl nadingin hong kipaipih si a kilakna, khialhna hanga biakna bawngtal le keel pen giahphual pualamah kipuakhia ding a, a vun, a sa, le a ekte, mei tawh kihal ding hi.

²⁸Tuate a hal pa in ama puante sawpin, tui sungah a pumpi sil ding a, tua khit ciangin giahphual ah hong ciah thei ding hi.

²⁹“Hih pen, a kha sagihna, a ni sawm ni-in note a dingin a tawntungin thukham hi ding a, tualsung mi hitaleh note lakah a hong peem khualmi hitaleh in an tangin, na na sem kei ding uh hi.

³⁰Bang hang hiam cih leh hih ni-in note siansak nadingin note-a’ ding kilemna kibawl ding a, na khialhna khempeuh panun TOPA’ mai-ah na siang ding uh hi.

³¹Tua pen note a dingin a thupi tawlngakna Sabbath hi a, an na tang ding uh hi. Tua pen a tawntung a thukham ahi hi.

³²A pa’ tanga siampi dingin sathau a kinilh a ki-ap siampipa in kilemna bawlin, a siangtho saihadial puante silh ding hi.

³³Amah in biakbuk siansuahna bawlin, kikhopna buk le biakna tau siansuah ding a, siampite le mihonte khempeuh a dingin kilemna a bawl ding hi.

³⁴Hih pen Israel mite a dingin amau’ khialhnate khempeuh hangin kum khatin khatvei kilemna a kibawlsak theih nadingin note a dingin a om tawntung ngeina kip khat hi ding hi,” a ci hi. TOPA in amah a thupiak bangin Moses a gamta hi.