Read Tedim Chin SIAMPI LAIBU 17 Bible Online

SIAMPI LAIBU 17 - Tedim Chin bible

SIAMPI LAIBU 17

¹TOPA in Moses kiangah,

²“Aaron, ama tapate, le Israel mite khempeuh tungah hih bangin gen in. Hih pen TOPA’ thupiaksa thu ahi hi.

³Israel mi khatpeuh in bawngtal ahi a, tuuno ahi a, keel ahi zongin giahphual sung ahi a, giahphual pua-ah ahi zongin go a,

⁴TOPA’ biakbuk mai, TOPA’ tungah letsongin piak dingin kikhopna bukkongah a gawh kei leh, tua mipa thu palsat hi ding hi. Amah in sisan luangsak ahih manin ama mite’ lak panin tua mipa kihawlkhia ding hi.

⁵Hih pen, gamlakah Israel mite in a gawh uh amau’ biakpiaknate hong paipih theih nading, kikhopna buk kongkhak-a siampipa’ kiang, TOPA’ tungah amaute in tuate hong paipih theih nading, le thunuama biakpiakna-in TOPA tungah sa hong gawh theih nading uh deihna ahi hi.

⁶Siampipa in kikhopna buk kong-a TOPA’ biakna tau tungah a si thehin, TOPA’ tungah a gim namtui dingin a thau hal ding hi.

⁷Tua ahih ciangin amaute in a biak uh keeldawite a dingin amau’ biakpiaknate go nawn lo ding uh hi. Hih pen amau’ khang tawntungin amaute’ tungah ngeina kip khat hi ding hi.

⁸“Nangmah in amaute tungah hih bangin na gen ding hi: Israel mite sung pan hitaleh, amaute lakah a peem khualmite sung panin hitaleh meihal biakna ahi a, biakpiakna ahi zongin a pia mipa in

⁹TOPA’ tungah piak dingin kikhopna bukkongah a paipih kei leh, ama mipihte kiang panin tua mipa kihawlkhia ding hi.

¹⁰“Israel mite sung pan hitaleh amau’ lakah a peem khualmite sung pan hitaleh mi khat in si khat peuhpeuh a nek leh, si a ne mipa ka maisiat ding a, ama mite lak panin amah ka khenkhia ding hi.

¹¹Bang hang hiam cih leh pumpi nuntakna pen si sungah om hi. Note a’ ding kilemna bawl nadingin note a dingin biakna tau tungah tua si ka piazo hi. Si pen nuntakna ahih manin kilemna a piangsak na ahi hi.

¹²Tua ahih ciangin keimah in Israel mite tungah hih bangin ka ci khin hi: Note lakah kuamah in si ne lo ding a, note lakah a hong peem khualmi khatpeuh in zong si ne lo ding hi.

¹³“Israel mite khatpeuh hitaleh, amaute lakah a peem khualmi khatpeuh hitaleh in zong, sabetna-ah, a kine thei ding gamsa khatpeuh hitaleh vasa hitaleh a man pa in a si buakhia-in leivui tawh vuk ding hi.

¹⁴Ganhing khempeuh’ nuntakna pen a si ahih manin Israel mite tungah hih bangin ka ci khinzo hi: Ganhing khat peuhpeuh si na ne kei ding uh hi. Bang hang hiam cih leh ganhing khempeuh’ nuntakna pen a si ahi hi. Si a ne mi peuhmah a mipihte kiang panin kihawlkhia ding hi.

¹⁵“A mawk sih hitaleh gamsate in a balgawp hitaleh a ne mi peuhmah, tualsung mi hitaleh peemta hitaleh tua mi in a puante sawp ding a, amahmah tui sungah kisilin, a nitak mateng a nin hi ding a, tua khit ciangin amah siang ding hi.

¹⁶Ahih hangin amah in tuate sawp loin ahi zongin, kisil loin ahi zongin a om leh, amah in ama mawhna pua ding hi,” a ci hi.