Read Tedim Chin SIAMPI LAIBU 18 Bible Online

SIAMPI LAIBU 18 - Tedim Chin bible

SIAMPI LAIBU 18

¹TOPA in Moses kiangah,

²“Israel mite tungah hih bangin gen in: Kei pen TOPA na Pasian uh ka hi hi.

³Note na tenna uh Egypt gamah amaute a gamtat bangin note na gamta kei ding uh a, note kong paipihna Kanaan gamah zong amaute a gamtat bangin note na gamta kei ding uh hi. Note in amau’ gamtatnate na zui kei ding uh hi.

⁴Note in keima biakna ngeina kipte semin ka thukhamte lenin tuate na zui ding uh hi. Kei pen TOPA na Pasian uh ka hi hi.

⁵Tua ahih ciangin note in ka thukhamte le ka biakna ngeina kipte na zui ding uh hi. Tuate a zui mi peuhpeuh nungta ding hi. Kei pen TOPA ka hi hi.

⁶“Note kuamah in na kinaipih na behte uh mawhpih dingin na naih kei ding uh hi. Kei pen TOPA ka hi hi.

⁷Na nu mawhpihna tawh na pa’ tungah maizumna na tun kei ding hi. Amah pen na nu ahih manin na mawhpih kei ding hi.

⁸Nangmah in na pa’ zi dangte zong na mawhpih kei ding hi. Tua pen na pa’ mindai nading ahi hi.

⁹Nangmah in na sanggamnu, na pa’ tanu, ahih kei leh na nu’ tanu, inn-a suak hitaleh gam a suak hitaleh na mawhpih kei ding hi.

¹⁰Nangmah in na tapa’ tanu ahih kei leh na tanu’ tanu na mawhpih kei ding hi; bang hang hiam cih leh amau’ mindaina pen nangma mindaina mah ahi hi.

¹¹Na pa’ zi’ tanu, na pa’ tanu pen na sanggamnu ahih manin na mawhpih kei ding hi.

¹²Na ni na mawhpih kei ding hi; tua nu pen na pa’ sanggam numei ahi hi.

¹³Na nu’ sanggamnu na mawhpih kei ding hi; bang hang hiam cih leh amah pen na nu tawh a kinai beh numei ahi hi.

¹⁴Na pa’ sanggampa’ tungah mindaina na tun kei ding hi; tua pen ama zi na naih kei ding hi, cihnopna ahi hi; tua nu pen nangma innlak nu ahi hi.

¹⁵Na monu na mawhpih kei ding hi; tua nu pen na tapa’ zi ahi hi; amah na mawhpih kei ding hi.

¹⁶Na sanggampa’ zi na mawhpih kei ding hi; tua pen na sanggampa’ mindai nading ahi hi.

¹⁷Na luppih numei khat’ tanu na mawhpih kei ding a, tua numei’ tapa’ tanu hitaleh tua numei’ tanu’ tanu hitaleh, luppih dingin na la kei ding hi. Amaute pen nangmah tawh a kinai beh numeite ahi uh hi. Tua bang gamtatna pen a siahuai ahi hi.

¹⁸Nangmah in a sanggamnu a hingsuan dingin numei khat zi-in na la kei ding a, a sanggamnu a hing laipi-in amah na luppih kei ding hi.

¹⁹“Nangmah in numei khat nin a neih laitak, a nit hun sungin luppih dingin na naih kei ding hi.

²⁰Na vengpa’ zi tawh na lumkhawm kei ding a, tua nu tawh na kininsak kei ding hi.

²¹Nangmah in Molek tungah meihal biakna-a piak dingin na tate khat peuhpeuh na pia kei ding a, tua bangin na Pasian’ min na daisak kei ding hi; keimah pen TOPA ka hi hi.

²²Numei khat tawh lupkhop bangin pasal khat tawh na lumkhawm kei ding hi; tua pen a kihhuai ahi hi.

²³Ganhing khatpeuh tawh mawhin tua tawh na kininsak kei ding a, numei khatpeuh in zong ganhing khatpeuh tawh a mawh dingin kipia lo ding hi; tua pen ngeina hi lo hi.

²⁴“Hih nate khatpeuh tawh note kininsak kei un; bang hang hiam cih leh note’ mai-a ka paihkhiat minamte in hihte khempeuh tawh amaute kininsak uh hi.

²⁵Leitung a nin suak ahih manin keimah in a leitang gimna pia-in, leitang in ama tunga a teng mite a luakhia hi.

²⁶Ahih hangin, tualsung mi hitaleh note lakah hong peem khualmi hitaleh, note in keima thukhamte le keima biakna ngeina kipte na zui ding uh a, hih a kihhuai nate khat beek na hih kei ding uh hi;

²⁷(bang hang hiam cih leh note’ ma-a a om gam mite in hih a kihhuaite khempeuh gamta uh ahih manin leitang a nin a suak hi;)

²⁸tua bang hikeileh leitang in note’ ma-a a om minamte a luakkhiat bangin note in amah na nitsak uh ciangin amah in note hong luakhia ding hi.

²⁹Bang hang hiam cih leh hih a kihhuaite khatpeuh a hihte peuhmah, amau’ mite lak panin kihawlkhia ding hi.

³⁰“Tua ahih ciangin note’ ma-a a kizang hih a kihhuai ngeinate khat peuhpeuh na gamtat ngei loh nading uh le tuate tawh nomau na kinitsak loh nadingun kong thuhilhte zui un; kei pen TOPA na Pasian uh ka hi hi,” a ci hi.