Read Tedim Chin SIAMPI LAIBU 20 Bible Online

SIAMPI LAIBU 20 - Tedim Chin bible

SIAMPI LAIBU 20

¹TOPA in Moses kiangah,

²“Israel mite kiangah hih bangin gen in: Israel mite khat peuhpeuh hitaleh Israel sunga a peem khualmite hitaleh, a tate khat peuhpeuh Molek pasian tungah a pia mipa kithat ding a, mihonte in suang tawh denglum ding uh hi.

³Kei mahmah in tua mipa ka maisiat ding a, ama mite lak panin ka hawlkhia ding hi; bang hang hiam cih leh amah in a tate Molek tungah pia-in, ka biakbuk ninsakin, ka min siangtho daisak hi.

⁴Amah in Molek tungah a tate khat a piak ciangin mihonte in tua pa kimuhmawh bawlin amah a thah kei uhleh,

⁵keimah in tua mipa le ama innkuanpihte maisiatin, amah le Molek biakna-ah amah a zuite khempeuh amau’ mite lak panin ka hawlkhia ding hi.

⁶“Mi khat vankahna le aisan lamah kihei-in tuate thu a dot leh, keimah in tua mipa ka maisiat ding a, ama mite lak panin amah ka hawlkhia ding hi.

⁷Tua ahih ciangin note ki-ap unla siangtho un; bang hang hiam cih leh kei pen TOPA na Pasian uh ka hi hi.

⁸Ka thukhamte zui unla, tuate sem un; note a hong siangthosak TOPA pen keimah ka hi hi.

⁹“Bang hang hiam cih leh a nu ahih kei leh a pa a samsia mi peuhmah kithat ding hi. Amah in a nu ahih kei leh a pa samsia khin a, ama sihna amahmah ngawh ding ahi hi.

¹⁰“Pasal khatpeuh a vengpa’ zi tawh a mawh leh, tua a khial pa le a khialnu kithat khawm ding hi.

¹¹A pa’ zi tawh a lumkhawm mipa in a pa a mindaisak a suak hi. Amau tegel kithat ding hi. Amau’ sihna amau mah ngawh ding ahi hi.

¹²Pasal khat a monu tawh a lupkhop leh, amau tegel kithat ding hi; amaute in si kinailua mi tawh khialhna a bawl uh ahi hi. Amau’ sihna amau mah ngawh ding ahi hi.

¹³Pasal khat in numei khat tawh lupkhop bangin pasal dang khat tawh a lupkhop leh, amau tegel kihhuaina a gamta khin uh ahih manin amaute kithat ding a, amau’ sihna amau mah ngawh ding ahi hi.

¹⁴Pasal khat in zi nei-in, a zi’ nu tawh zong a lakthuah leh, tua pen a kilawm lo ahi hi. Note lakah tua bang kilawm lohna a om loh nadingin tua pa le a nutate, mei tawh kihallum ding hi.

¹⁵Pasal khatpeuh ganhing khat tawh a mawh leh amah le a ganhing kithat ding hi.

¹⁶Numei khat in ganhing khat naihin tua tawh a mawh leh, note in a numei le a ganhing na that ding uh hi; amau’ sihna amau mah ngawh ding ahi hi.

¹⁷“Pasal khat in ama sanggamnu, ahih kei leh a nu’ tanu tenpihin a lupkhawm uhleh, tua pen a zumhuai hi a, amau’ mipihte’ omna panin amaute kihawlkhia ding hi. Ama sanggamnu tawh mawh ahih manin tua pa in ama mawhna pua ding hi.

¹⁸Pasal khat, nin a nei numei khat tawh lumkhawmin a mawh uhleh, amau tegel in siantho nading ngeina palsat uh ahih manin amau’ mipihte lak panin kihawlkhia ding hi.

¹⁹“Note pen na nu’ sanggamnu ahih kei leh na pa’ sanggamnu tawh na mawh kei ding uh hi. Tua pen a nai behte tawh mawhna ahih manin amaute in amau’ mawhna pua ding uh hi.

²⁰Pasal khat, a pa’ sanggampa’ zi tawh a lupkhop leh, amah in a pa’ sanggampa a mindaisak ahi hi. Amaute in amau’ khialhna thuak ding uh a, ta nei loin si ding uh hi.

²¹Pasal khat in a sanggampa’ zi a lak leh, tua pen nitna hi a, amah in a sanggampa a mindaisak ahi hi. Amaute in ta nei lo ding uh hi.

²²“Tua ahih ciangin note in ka thukham khempeuh le ka biakna ngeina kipte khempeuh zui-in, tuate na sem ding uh hi. Tua pen note na ten nadingun kong paipih nading leitang in note hong luakkhiat loh nading ahi hi.

²³Note’ mai-ah keimah in ka paihkhiat minamte’ ngeinate na zui kei ding uh hi. Amaute in hih nate khempeuh hih uh ahih manin amaute ka kih hi.

²⁴Ahih hangin keimah in note kiangah, ‘Note in amau’ leitang na luah ding uh hi. Bawngnawi le khuaizu a luanna leitang, na neih dingun note tungah kong pia ding hi,’ kong ci khinzo hi. Kei pen mite’ kiang panin note a hong khenkhia TOPA na Pasian uh ka hi hi.

²⁵Tua ahih ciangin note in ganhing a siang leh a nin, vasa a siang leh a nin khentelna na bawl ding uh hi. Note in nin hi, ci-in na seh dingun keimah in ka tuam koihsa ganhing hitaleh vasa hitaleh leitung a a pai thei khat peuhpeuh tawh hitaleh, note na kininsak kei ding uh hi.

²⁶Note pen keima a dingin na siangtho ding uh hi; bang hang hiam cih leh TOPA ahi keimah ka siangtho a, note pen keima-a’ na hih theih nadingun mite kiang panin note kong tuamkoih zo hi.

²⁷“Numei ahi a, pasal ahi zongin van a kah a, ai a saan leh kithat ding a, suang tawh amaute kidenglum ding hi. Amau’ sihna amau mah ngawh ding ahi hi,” a ci hi.