Read Tedim Chin SIAMPI LAIBU 21 Bible Online

SIAMPI LAIBU 21 - Tedim Chin bible

SIAMPI LAIBU 21

¹TOPA in Moses kiangah, “Aaron’ tapa siampite tungah thu gen inla, amaute lak panin kuamah in ama beh nai pen ahi a nu, a pa, a tapa, a tanu, a sanggampa,

³ahih kei leh nungak ahi a sanggamnu (tua nu in pasal nei nai lo ahih manin amah tawh a kinai ahi hi; tua nu hangin amah kininsak thei ding hi) longal ama mite lakah misite’ hangin kininsak lo ding hi.

⁴Amah in pasal neisa numei khatpeuh hangin ama mite lakah va kininsakin, tua bangin kidaisak lo ding hi.

⁵“Amaute in a lu uh mettol loin, amau’ khamul nawlhui zong kiat loin, a ci tung uh liamsak lo ding uh hi.

⁶Amaute pen amau’ Pasian a dingin siangtho ding uh a, amau’ Pasian’ min daisak lo ding uh hi. Bang hang hiam cih leh amaute in amau’ Pasian’ anlum ahi, TOPA’ tungah meihal biakna pia uh hi. Tua ahih ciangin amaute siangtho ding uh hi.

⁷Amaute in numei paktat ahih kei leh a kininsaksa numei tenpih lo ding uh a, a pasal in a maksa numei zong tenpih lo ding uh hi. Bang hang hiam cih leh siampipa pen ama Pasian a dingin siangtho hi.

⁸Amah in note’ Pasian’ anlum pia ahih manin note in amah na ap ding uh a, amah pen note a dingin siangtho ding hi. Bang hang hiam cih leh TOPA ahi keimah, note hong siangthosakpa, ka siangtho hi.

⁹Siampipa khat peuhpeuh’ tanu in paktatna tawh amah le amah a kidaisak leh, ama pa a daisak ahi hi. Tua nu mei tawh kihallum ding hi.

¹⁰“Ama sanggamte lakah siampi lianpen, a lu tungah nilh sathau a kisunnapa, a puante silh dingin a ki-ap khin siampipa in a samte phiahsak loin, a puante zong balkek lo ding hi.

¹¹Amah in a nu le a pa nangawn ahi zongin misi khat peuhpeuh kiangah pai loin, amahmah zong kininsak lo ding hi.

¹²Biakbuk panin zong paikhia loin, ama Pasian’ biakbuk zong daisak lo ding hi. Bang hang hiam cih leh ama Pasian-a’ ahi ki-apna nilh sathau ama tungah om hi; kei pen TOPA ka hi hi.

¹³Amah in a zi dingin nungak la ding hi.

¹⁴Meigong numei, a kimasa numei, a kininsaksa numei, numei paktat, hih bangte pawl tenpih lo ding a, amah in ama mite lak panin nungak khat zi-in la ding hi.

¹⁵Tua pen ama mite lakah a tate a daisak loh nading ahi hi. Bang hang hiam cih leh amah a siangthosakpa pen keimah TOPA ka hi hi, ci in,” a ci hi.

¹⁶TOPA in Moses tungah,

¹⁷“Aaron kiangah hih bangin gen in: Na suanlekhakte sung panin poina a nei mi in a khang khangin ama Pasian’ anlum pia dingin hong neh thei lo ding hi.

¹⁸Bang hang hiam cih leh poina a nei, mittaw, khelbai, maihem, le khutlekhe saulua,

¹⁹khut liam, khe liam,

²⁰elkul leh mi cingtaak lo, mit hoih lo le cithak a vei, meima nei leh ciltang kitam mi in hong naih lo ding hi.

²¹Siampi Aaron’ suanlekhakte sung panin poina a nei mi khatpeuh in TOPA a’ ding meihal biakna a pia dingin a nai-ah hong pai lo ding hi. Amah in poina nei ahih manin, ama Pasian’ anlum pia dingin a nai-ah hong pai lo ding hi.

²²Amah in ama Pasian’ anlum, a siangthopen le a siangtho ante ne thei ding hi.

²³Ahih hangin amah in poina nei ahih manin, ka biakbuk a daisak loh nadingin dalna puan gei ahi a, biakna tau nai-ah ahi zongin hong pai lo ding hi. Bang hang hiam cih leh amaute a siangthosakpa pen keimah TOPA ka hi hi,” a ci hi.

²⁴Tua ahih ciangin Moses in Aaron le a tapate le Israel mi khempeuh tungah hih thute a gen hi.