Read Tedim Chin SIAMPI LAIBU 23 Bible Online

SIAMPI LAIBU 23 - Tedim Chin bible

SIAMPI LAIBU 23

¹TOPA in Moses kiangah,

²“Israel mite tungah hih bangin gen in: Note in a siangtho biak kikhopnate hi, ci-in na gen ding uh keimah TOPA’ pawi a kisehte hih bang ahi hi.

³Ni guk sungin nasep kizo ding a, ahih hangin a ni sagih ni pen a thupi tawlngakna Sabbath, a siangtho kikhopna ahi hi. Note in tua ni-in na na sem kei ding uh hi. Tua pen note’ tenna khempeuhah TOPA a dingin Sabbath ahi hi.

⁴“Hihte pen amaute a dingin a kiseh hunin note in na gen ding uh ahi TOPA’ pawi a kisehte, a siangtho biak kikhopnate ahi hi.

⁵“A kha masa, a ni sawm le li nitak pen TOPA’ Paisan Pawi ahi hi.

⁶Tua kha mah, a ni sawm le nga ni pen TOPA’ tungah silngo sawh loh anlum pawi ahi hi. Ni sagih sung note in silngo sawh loh anlum na ne ding uh hi.

⁷A ni masa ni-in note in a siangtho kikhopna khat na nei ding uh a, thatang nasep na sem kei ding uh hi.

⁸Ahih hangin note in TOPA’ tungah meihal biakna ni sagih sung na pia ding uh hi. A ni sagih ni pen a siangtho kikhopna ni hi ding a, thatang nasep na sem kei ding uh hi,” a ci hi.

⁹TOPA in Moses kiangah,

¹⁰“Israel mite tungah hih bangin gen in: Note tungah ka hong piak leitangah note tungin an na lak uh ciangin, note in an na lakna uhah anpal lom khat, siampipa kiangah na paipih ding uh hi.

¹¹Note hong kisan’ theih nadingin amah in TOPA’ mai-ah anlom vei ding a, Sabbath ni a zing ciangin siampipa in tua anlom vei ding hi.

¹²Note in anlom na vei ni-un, TOPA’ tungah meihal biakna-in a sitbaang lo kum khat a pha tuuno a pa khat na pia ding uh hi.

¹³Tua tawh a kipia khawm ding an tawh biakna pen sathau tawh a kibawl annel lawh nih hi ding a, a gim namtui dingin TOPA’ tungah meihal biakna-in kipia ding hi. Tua tawh a kipia khawm ding leenggahzu tawh biakna pen leenggahzu thawl khat hi ding hi.

¹⁴Note in na Pasian uh biakna na paipih ma, hih ni matengin anlum hitaleh a ki-em an hitaleh a sial hitaleh na ne kei ding uh hi; tua pen note’ khang tawntungin na tenna khempeuh uhah ngeina khat hi tawntung ding hi.

¹⁵“Note in Sabbath khit a zing ciang, vei-a biakna anlom na paipih ni uh a kipan nipikal sagih bit dong a ni na simto ding uh hi.

¹⁶A Sabbath sagihna khit a zing ciang dong ni sawmnga dong na simto ding uh a, tua ciangin note in TOPA’ tungah an thak tawh biakna na paipih ding uh hi.

¹⁷Note in na tenna uh panin vei dingin an lawh nih a kibawl anlum nih nong paipih ding uh hi. Tuate pen annel a kibawl, silngo sawhin a ki-em, TOPA’ tungah anpalin a kipia hi ding hi.

¹⁸Note in anlum tawh, a sitbaang lo kum khat a pha tuuno sagih, le bawngtalno khat, le tuutal nih na pia ding uh hi. Tuate, TOPA’ tungah a gim namtui mei tawh kihal biak nadingin an tawh biakna le leenggahzu tawh biaknate tawh TOPA’ tungah meihal biakna hi ding hi.

¹⁹Note in khialhna hanga biakna-in keel a pa khat le thunuama biakpiakna-in kum khat a pha tuuno a pa nih na pia ding uh hi.

²⁰Siampipa in TOPA’ mai-ah vei-a biakna-in anpal-anlum le tuuno nih tawh tuate vei ding a, tuate pen siampipa a dingin TOPA’ mai-ah a siangtho hi ding hi.

²¹Note in tua ni mahin thu zaksakna na bawl ding uh a, a siangtho kikhop khat na nei ding uh hi. Note in thatang nasep na sem kei ding uh hi; tua pen note’ tenna khempeuhah na khang tawntungun ngeina khat hi tawntung ding hi.

²²“Note in na leitang panun an na lak uh ciangin, na lonawl dongun la loin, an na lak khit uh ciangin a sangte zong na khawm kei ding uh a, mizawngte le khualmi a dingin tuate na nusia ding uh hi; kei pen TOPA na Pasian uh ka hi hi,” a ci hi.

²³TOPA in Moses kiangah,

²⁴“Israel mite tungah hih bangin gen in: A kha sagihna, a ni masa ni-in note in a thupi tawlngakna ni khat, peengkul aw tawh a kitaangko phawksakna, a siangtho kikhopna khat na nei ding uh hi.

²⁵Note in thatang nasep na sem kei ding uh a, TOPA’ tungah meihal biakna na paipih ding uh hi,” a ci hi.

²⁶TOPA in Moses kiangah,

²⁷“Hih a kha sagihna ni sawm ni pen kilemna ni ahi hi. Tua pen note a dingin a siangtho kikhop hun hi ding a, note in an tangin, TOPA’ tungah meihal biakna na pia ding uh hi.

²⁸Note in tua ni-in na na sem kei ding uh hi; bang hang hiam cih leh tua pen TOPA note’ Pasian’ mai-ah note a dingin kilemna bawl nadingin kilemna bawl ni ahi hi.

²⁹Bang hang hiam cih leh tua ni-in bang khat peuhpeuh a nekha mi peuhmah ama mite kiang panin kihawlkhia ding hi.

³⁰Tua ni-in na khat peuhpeuh a sem mi peuhmah keimah in ama mite lak panin ka that ding hi.

³¹Note in na na sem kei ding uh hi. Tua pen na khang tawntungun na tenna khempeuh uhah ngeina khat hi tawntung ding hi.

³²Tua pen note a dingin a thupi tawlngakna Sabbath ni hi ding a, an na tang ding uh hi. Tua kha ni kua nitak a kipan, a nitak panin a nitak kik dong note in na Sabbath uh na tang ding uh hi,” a ci hi.

³³TOPA in Moses kiangah,

³⁴“Israel mite tungah hih bangin gen in: Hih kha sagihna a ni sawm le nga ni a kipan ni sagih sung pen TOPA a’ ding buk pawi ahi hi.

³⁵A ni masa ni pen a siangtho kikhopna ni hi ding a, thatang nasep na sem kei ding uh hi.

³⁶Ni sagih sung note in TOPA’ tungah meihal biakna na pia ding uh a, a ni giat ni-in a siangtho kikhopna khat nei-in, TOPA’ tungah meihal biakna na pia ding uh hi. Tua pen a thupi kikhopna khat hi a, note in thatang nasep na sem kei ding uh hi.

³⁷“Hihte pen TOPA’ tungah mei tawh kihal biakna, meihal biakna le an tawh biaknate, biakpiakna le leenggahzu tawh biaknate, amau’ ni ciatin piak dingin a siangtho kikhopna hunin na gen ding uh, TOPA’ pawi a kisehte ahi hi.

³⁸Note in TOPA’ tungah na piak uh TOPA’ Sabbath-te, note’ letsongte, thuciamna hangin na biaknate khempeuh uh le utthu-a na biaknate khempeuh uh banah piak ding ahi hi.

³⁹“Note in leitang a piangte na kaihkhop khit uh, kha sagihna, a ni sawm le nga ni a kipan ni sagih sung TOPA’ pawi na bawl ding uh hi. A ni masa ni pen a thupi tawlngakna khat hi a, a ni giat ni zong a thupi tawlngakna khat mah hi ding hi.

⁴⁰Note in a ni masa ni-in singkung hoih gahte, nisuh hiangte, a teh tam singhiangpite, le lui a gialhekte la-in, TOPA na Pasian uh pahtawina, ni sagih sung pawi na bawl ding uh hi.

⁴¹Note in tua pen kum simin ni sagih sung pawi-in na nei ding uh a, note’ khang tawntungin ngeina khat hi tawntung ding hi. Note in kha sagihna sungah na bawl ding uh hi.

⁴²No Israel mi khempeuh ni sagih sung buk sungah na teng ding uh hi.

⁴³Tua pen keimah in Egypt gam panin amaute ka paikhiatpih lai-in Israel mite, buk sungah ka tensakna thu note’ suanlekhakte in a theih nading uh ahi hi; kei pen TOPA na Pasian uh ka hi hi,” a ci hi.

⁴⁴Tu-a bangin Moses in Israel mite tungah TOPA’ pawi a kisehte a gen hi.