Read Tedim Chin SIAMPI LAIBU 24 Bible Online

SIAMPI LAIBU 24 - Tedim Chin bible

SIAMPI LAIBU 24

¹TOPA in Moses kiangah,

²“Meivak khat a tawntungin a kivaksuak theih nadingin meivak a dingin oliv gah a kisuzante panin sathau siangtho nang kiangah hong paipih nading uh Israel mite thu pia in.

³Kikhopna buk sung, thuciamna singkuang dalna puan pualamah, Aaron in nitak a kipanin zingsang dongin TOPA’ mai-ah a tawntungin tua meivak a ngeina bangin koih ding a, tua pen na khang tawntungun ngeina khat hi tawntung ding hi.

⁴Amah in kham citak meivakkhuam tungah meivakte a ngeina bangin TOPA’ mai-ah omsak tawntung ding hi.

⁵“Nangmah in annel la inla, tua panin moh sawm le nih bawlin em in; moh khat ciangin annel lawh nih hi ding hi.

⁶Nangmah in kham citak sabuai tungah tuate gual nihin na koih ding a, gual khatah guk om ding hi.

⁷Phawkna-in TOPA’ tungah mei tawh biakna-in piak dingin anlum tawh a paikhawm theih nadingin nangmah in a gual nihte-ah paknamtui siangtho na koih ding hi.

⁸Sabbath ni simin Aaron in a tawntung thuciamna-in Israel mite tang dingin TOPA’ mai-ah a ngeina bangin koih tawntung ding hi.

⁹Tua pen TOPA’ tungah mei tawh kihal biakna sung panin amah in a tawntung a a ngah ding, a siangtho pen ama kaih ahih manin, Aaron le a suante-a’ ding hi a, amaute in a siangtho mun khatah ne ding uh hi,” a ci hi.

¹⁰Tu-in Israel numei khat’ tapa, a pa Egypt mi ahi khat, Israel mite lakah a pai hi. Israel numei’ tapa le Israel mi khat giahphual ah kitawng uh a,

¹¹Israel numei’ tapa in Min Siangtho gensia-in samsia hi. Amaute in Moses kiangah amah paipih uh hi. Ama nu’ min pen Shelomith hi a, Dan minam, Dibri’ tanu ahi hi.

¹²TOPA’ deihna amaute tungah a kigen mateng amaute in tua mipa khumcip uh hi.

¹³TOPA in Moses kiangah,

¹⁴“A samsia mipa pen giahphual pualamah paipih in. Ama samsiat a za mi khempeuh ama lu tungah amau’ khut ngasak inla, mihonte khempeuh amah denglumsak in.

¹⁵Tua ciangin Israel mite tungah hih bangin gen in: Ama Pasian a samsia mi peuhmah in ama khialhna thuak ding hi.

¹⁶TOPA’ min a gensia mipa kithat ding hi. Mihonte khempeuh in amah denglum ding uh hi. Peemta hitaleh tualsung mi hitaleh, Min Siangtho a gensiate kithat ding hi.

¹⁷“Mi a that pa kithat ding hi.

¹⁸Ganhing a that pa in a ganhing mahin loh ding hi. A thu-in ci lehang nuntakna le nuntakna a kithuk ding ahi hi.

¹⁹“Mi khat in a vengte khat a poisak leh, ama hih bangin ama tung mahah kithukkik ding a,

²⁰guh kitan tang ding guh kitan, mittang tang ding mittang, ha tang ding ha kihih ding a, amah in mi khat a poisak bangin amah kipoisak ding hi.

²¹Ganhing a that pa in loh ding a, mi a that pa kithat ding hi.

²²Note in peemta le tualsung mi a dingin ngeina a kibang khat na nei ding uh hi; bang hang hiam cih leh kei pen TOPA na Pasian uh ka hi hi,” a ci hi.

²³Tua ahih ciangin Moses in Israel mite tungah hih thu a gen hi. Amaute in a samsia mipa giahphual pualamah paipih uh a, suang tawh a denglum uh hi. TOPA in Moses a thupiak bangin Israel mite in a hih uh hi.