Read Tedim Chin SIAMPI LAIBU 25 Bible Online

SIAMPI LAIBU 25 - Tedim Chin bible

SIAMPI LAIBU 25

¹TOPA in Sinai Mual tungah Moses kiangah,

²“Israel mite tungah hih bangin gen in: Note kong piak leitangah na tun uh ciangin, TOPA pahtawina-in leitang tawlngak hun na omsak ding uh hi.

³Kum guk sung note in na lo uh na pawi ding uh a, kum guk sung na leenggui lo uh hahin a gahte na kaikhawm ding uh hi.

⁴Ahih hangin a kum sagihna-ah leitang ading a thupi tawlngakna sabbath, TOPA pahtawina sabbath om ding hi. Note in na lo uh na pawi kei ding uh a, na leenggui lo uh na hah kei ding uh hi.

⁵A li pote note in na kaikhawm kei ding uh a, a kipuah lo leenggui gahte na khawm kei ding uh hi. Leitang adingin a thupi tawlngakna hi ding hi.

⁶Lo na khawh loh uh hangin leitang tawlngak kumin a piang tawmte in note a’ ding, na sila numei le na sila pasalte a’ ding, a kicial nasemte le note tawh a teng a peem mite a’ ding an hong sik ding hi.

⁷A piang khempeuhte pen na bawngte uh le na leitang uhah a om ganhingte’ an ding ahi hi.

⁸“Kum nipi sagih hun pen note a dingin kum sawmli le kua ahih theih nadingin note in kum nipi sagih, kum sagih mun sagihvei na simto ding uh hi.

⁹Tua ciangin note in kha sagihna a ni sawm ni-in nakpi-in peengkul na tum ding uh a, kilemna ni-in note in na gam sung khempeuh uhah peengkul aw na gingkhiasak ding uh hi.

¹⁰Note in a kum sawmngana siangthosakin, gam sunga a teng mi khempeuh tungah suahtakna thu na zasak ding uh hi. Note in nomau’ neihsa ciat ngahkikin, sila-in a kizuak mite nomau’ innkuanpihte ciat kiangah na ciahkik uh ciangin note a dingin jubilee hi ding hi.

¹¹Tua a kum sawmngana pen note a dingin jubilee hi ding hi. Tua kum sungin note in lo pawi loin, a li pote zong la loin, a kihah lo leengguite panin zong leenggah na khawm kei ding uh hi.

¹²Bang hang hiam cih leh tua pen jubilee ahi hi. Tua pen note-a’ dingin siangtho ding a, note in lo panin a piang tawmte na ne ding uh hi.

¹³“Hih jubilee kum sungin note khempeuh in nomau’ neihsa ciat na ngahkik ding uh hi.

¹⁴Note in na vengte’ tungah na zuak uh ahi zongin na vengte’ kiang panin na lei uh ahi zongin note khatlekhat na kikhem kei ding uh hi.

¹⁵Jubilee khit ciangin a jubilee kik dong a kum phazah tawh kituakin note in na vengte uh kiang panin lei-in, a an piang ding kum zah tawh kituakin amau in note tungah hong zuak ding uh hi.

¹⁶A kum a tam lai leh a man na tamsak ding uh a, a kum a tawm leh a man na tawmsak ding uh hi. Bang hang hiam cih leh no tungah hong zuak pen a tuk tung ding zah ahi hi.

¹⁷Note khatlekhat kikhem loin na Pasian uh na zahtak ding uh hi; bang hang hiam cih leh kei pen TOPA ka hi hi.

¹⁸“Tua ahih ciangin note in ka thukhamte le ka biakna ngeina kipte zui-in tuate na sem ding uh hi. Tua hileh note lungmuang takin gam sungah na teng ding uh hi.

¹⁹Leitang in an hong piangsak ding a, note in na khamtakun ne-in, lungmuang takin na teng ding uh hi.

²⁰“Note in, ‘Lo lah pawi loin, an lah la kei lehang, a kum sagihna-ah bang ne ding ihi hiam?’ na cih uhleh

²¹keimah in a kum gukna-ah note tungah thupha kong pia ding a, kum thum sung khom ding an hong piang ding hi.

²²A kum giatna-ah lo na pawi ding uh ciangin, note in anlui na ne lai ding uh hi. Anthak hong tun a kum kuana mateng note in a lui na ne ding uh hi.

²³“Leitang pen keima-a’ ahih manin neihsuak dingin leitang kizuak lo ding hi; bang hang hiam cih leh note pen kei tawh a omkhawm khualmi leh peemtate na hi uh hi.

²⁴“Note in na neih uh leitang khempeuh na kitanhkiksak thei ding uh hi.

²⁵Na sanggampa zawngin a neihsa leitang khenkhat a zuak leh, amah tawh a kinai a behpa hong pai-in a sanggampa’ zuaksa tanh ding hi.

²⁶Mi khat in tua na a tatsak ding mi a neih kei a, amahmah hong haukikin a tanhzo dingin a pian’ leh,

²⁷amah in tua na a zuak zawh a kumte sim ding a, a zuakna mipa tungah a piak lai ding a kisam zah pia ding a, amah in a neihsa ngahkik ding hi.

²⁸Ahih hangin amah in ama a dingin ngahkik zawh nading lampi a neih kei leh, tua ama zuak leitang pen jubilee kum mateng a leipa’ khut sungah om ding hi. Jubilee kum ciangin tua leitang kipiakhia ding a, amah in a neihsa ngahkik ding hi.

²⁹“Mi khat in khuapikulh sungah tenna inn khat a zuak leh, a kizuak khit kum khat bit sungin amah in tanhkik thei ding a, kum khat bit sungin amah in tatkik theih nading thu nei ding hi.

³⁰Tua pen kum khat bit sungin a kitatkik kei leh, khuapikulh sunga om tua inn pen a leipa in khang tawntungin a neih dingin kibawlsak ding a, jubilee kum ciangin zong kipiakhia kik tuan nawn lo ding hi.

³¹Ahih hangin a kimkotah kulh a nei lo khua neu-a innte pen gam sung lote tawh a kibangin kingaihsun ding hi. Tuate kitanhkik thei ding a, jubilee kum ciangin tuate kipiakhia ding hi.

³²Ahi zongin Levi mite’ khuapite, amau’ neihsa khuapite-a innte ahihleh, Levi mite in khatvei peuh ciangin tanh thei ding uh hi.

³³Levi mi khatpeuh in ama tatkik theih ding hinapi a tatkikzawh kei leh, amau’ neihsa khuapi sunga tua inn pen jubilee kum ciangin kipiakik ding hi. Bang hang hiam cih leh Levi mite’ khuapi sunga innte pen Israel mite’ lakah amau’ neihsa ahi hi.

³⁴Ahih hangin amau’ khuapi taang gamte kizuak thei lo ding hi; bang hang hiam cih leh tua pen amau’ neih tawntung na ahi hi.

³⁵“Na sanggampa uh zawngin, note bangin amah a kivak zawh kei leh, note in amah na vak ding uh hi. Khualmi le peemta bangin amah pen note tawh hong om ding hi.

³⁶Na sanggampa uh no kiangah hong ten theih nadingin ama tung panin a meet a khang la kei unla, na Pasian uh zahtak un.

³⁷Note in ama tungah a meetin sum leitawi pia loin, ama tungah a meetin na an uh zong na pia kei ding uh hi.

³⁸Kei pen note’ Pasian ahi ding le, note tungah Kanaan leitang a hong pia dingin Egypt gam panin note a hong paikhiatpih TOPA na Pasian uh ka hi hi.

³⁹“Na gei-a om na sanggampa zawngin, nangma tungah amahmah hong kizuak leh, sila bangin na na semsak kei ding hi.

⁴⁰Amah pen a kicial nasem le peemta bangin nang kiangah om ding hi. Amah in jubilee kum mateng nangma na hong sem ding a,

⁴¹tua ciangin nang kiang panin amah le ama kiangah a om a tate paikhia ding a, ama innkuan zuan kikin, a pate’ neihsa ngahkik ding hi.

⁴²Bang hang hiam cih leh amaute pen Egypt gam panin ka paikhiatpih keima nasemte hi a, amaute sila-in kizuak lo ding hi.

⁴³Note in hih gawpgawpna tawh amah na uk kei ding uh a, na Pasian uh na zahtak ding uh hi.

⁴⁴Note in na neih theih ding uh sila numei le sila pasalte hih bang ahi hi: Na kimkot uha om minam dangte lak panin sila numei le sila pasal na lei thei ding uh hi.

⁴⁵Note in na gam sung uhah a suak, note lakah a hong peem khualmite leh note tawh a om amau’ innkuante lak panin zong na lei thei ding uh a, amaute pen nomau a’ hi thei ding uh hi.

⁴⁶Note in amaute pen note’ khit ciangin na tapate uh tungah amau’ neih tawntung dingin a luah dingin na pia thei ding uh hi. Note in sila-in amaute na nei thei ding uh a, ahih hangin na sanggam uh Israel mite khatlekhat hih gawpgawpna tawh na ki-uk kei ding uh hi.

⁴⁷“Note lakah a teng khualmi ahih kei leh peemta khat hong hau a, ama kianga om na sanggampa uh zawngin, no tawh a om khualmipa tung ahi a, peemta mipa tungah ahi zongin, tua ahih kei leh khualmipa’ innkuan khat peuhpeuh tungah amah a kizuak leh,

⁴⁸amah a kizuak khit ciangin amah kitanhkik thei ding a, ama sanggamte khat peuhpeuh in amah tanh thei ding hi.

⁴⁹Ama innlak pa ahih kei leh a innlak sanggampa in tanh thei ding hi. Ama innkuan sunga a kinaipih a beh khatpeuh in amah tanh thei ding hi. Tua ahih kei leh zong amah a hauh leh amahmah kitanhkik thei ding hi.

⁵⁰Midang tungah amahmah a kizuak a kipan jubilee kum dong amah a leipa tawh tuat ding a, ama suahtak nading sum pen a kum phazah tawh kituak hi ding hi. A topa tawh a omkhawm hun sungteng pen a kicial nasem khat thaman zahin seh ding hi.

⁵¹Kum tampi in a sap lai leh, amah in tuate tawh a kituakin ama thaman ding a kipiakna sung panin ama kitatkhiat nadingin pia kik ding hi.

⁵²Ahih hangin jubilee kum ding kum tawmkhat bek in a sap leh amah in a topa tawh tuatna khat nei ding hi. Ama sepsak ding kum a omlai tawh kituakin ama kitatkhiat nadingin sum piakik ding hi.

⁵³Amah pen a topa tungah a kum kumin a kicial nasempa tawh kibang ding hi. A topa in note’ muhna-ah hih gawpgawpna tawh amah uk lo ding hi.

⁵⁴Hih bang danin amah a kitatkhiat kei leh, jubilee kum ciangin amah le amah tawh a om a tate kikhahkhia ding hi.

⁵⁵Bang hang hiam cih leh Israel mite pen kei a dingin nasemte ahi uh hi. Amaute pen Egypt gam panin keimah in ka paikhiatpih keima nasemte ahi uh hi; kei pen TOPA na Pasian uh ka hi hi.