Read Tedim Chin SIAMPI LAIBU 26 Bible Online

SIAMPI LAIBU 26 - Tedim Chin bible

SIAMPI LAIBU 26

¹“Note in nomau a dingin a mai-ah na kun dingun milim bawl loin, a kiseek milim hitaleh biakna song hitaleh na dingsak kei ding uh a, na gam sung uhah suang milim na phut kei ding uh hi; bang hang hiam cih leh kei pen TOPA na Pasian uh ka hi hi.

²Note in ka sabbath-te tangin keimah hong kibiakna mun na zahtak ding uh hi; kei pen TOPA ka hi hi.

³“Note in ka thukham zui-in, ka thupiaknate mangin tuate na sep uhleh,

⁴keimah in note tungah guahtui a hunin kong pia ding a, leitang in an hong piangsakin, lo-a kungte in amau’ gah gah ding uh hi.

⁵Na cil uh ante leenggah lawh hun dong kimang ding a, leenggah minte zong lopawi hun dong kimang ding hi. Note in na khamtakun an na ne ding uh a, lungnuam takin na gam sung uhah na teng ding uh hi.

⁶“Keimah in gam sungah nopsakna hong pia-in, note lungnuam takin na lum ding uh a, bangmah in note hong lausak lo ding hi. Keimah in gam sung panin ganhing gilote ka hawlkhia ding a, galkidona in na gam uh hong nawk lo ding hi.

⁷Note in na galte uh na delh ding uh a, note’ mai-ah namsau in amaute puksak ding hi.

⁸Note nga in zakhat zo-in, note zakhat in tul sawm na zo ding uh hi. Note’ mai-ah namsau in na galte uh puksak ding hi.

⁹Keimah in note ka hong pi ngaihsut ding a, note hong pungsakin, tampi kong phasak ding a, note tawh ka thuciamna ka kipsak ding hi.

¹⁰Note in sauveipi a kikhol anluite ne-in, a thak koih nadingin a lui na hahsiang masa ding uh hi.

¹¹Keimah in note lakah omna ka bawl ding a, keimah in note kong kih kei ding hi.

¹²Keimah, note’ lakah omin note’ Pasian ka hi ding a, note, keima mite na hi ding uh hi.

¹³Note pen amau’ sila na hihloh nadingun Egypt gam panin note a hong paikhiatpih TOPA na Pasian uh ka hi hi. Keimah in note’ gimna hakkolte kuaitanin note a dingtangin kong paisak hi.

¹⁴“Ahih hangin note in ka thu ngai loin, hih thupiaknate khempeuh na hih kei uh a,

¹⁵ka thukhamte nialin, ka biakna ngeina kipte kih a, ka thupiaknate khempeuh sem loin, ka thuciamna na palsat uhleh,

¹⁶keimah in note tungah hih bangin kong hih ding hi: Note’ tungah hong tung dingin keimah in thakhatthu a dipkuatna, zawngkhalna, le mite siasakin nuntakna a kiamsak ding cisa natna kong tungsak ding hi. Note’ lopawi zong a mawkna hi ding hi; bang hang hiam cih leh na galte un tuate ne ding hi.

¹⁷Keimah in note kong maisiat ding a, na galte uh mai-ah lelhna na thuak ding uh hi. Note hong mudah mite in note hong uk ding a, kuamah in note hong delh lo napi-in na tai ding uh hi.

¹⁸“Tua bang hinapi-in note in ka thu nong ngaih kei veve uhleh, keimah in na khialhna hangun a zah sagih vei-in note kong thuhilhkik ding a,

¹⁹keimah in na kiphatsakpih uh note’ vangliatna susia-in, van panin guah hong zusak loin, na leitang uh sik ka bangsak ding hi.

²⁰Na leitang un an piangsak loin, na gam sung uha kungte in amau’ gah gah lo ding ahih manin note’ thatang a mawkna-in a bei hi ding hi.

²¹“Tua ciangin kei hong demin, keima thu na ngaih kei lai uhleh, keimah in note’ khialhna a zah sagih vei-in note’ tungah gimna kong tungsak ding hi.

²²Keimah in note’ lakah gamsate hong khahin, amaute in na tate uh hong neksak ding uh a, na ganhingte uh susia-in, note mi tawmno khat hong suah ding a, note’ lampite zong gamkhing hong suak ding hi.

²³“Hih banga hihna tawh note hong kihei tuan loin, kei na hong demlai uhleh,

²⁴kei zong note hong gawtin, kei mahmah in na khialhnate uh hangin a zah sagih vei-in kong sat ding hi.

²⁵Keimah in, thuciamna omsa bangin phulakna na a sem ding namsau khat note’ tungah kong tungsak ding hi. Na khuapi sung uhah note na kikaihkhop uhleh zong keimah in note’ lakah natna kong tungsak ding a, na galte uh khut sungah note hong kipia ding hi.

²⁶Keimah in note’ nuntakna an ka suksiat ciangin, an kicing lo ahih manin nupi sawm in meibung khat sungah na anlum uh emkhawm ding a, na anlum uh a tawitehin hong piakhia kik ding hi. Note in na ne ding uh a, na khamzo kei ding uh hi.

²⁷“Tua bang hinapi-in note in keima thu ngai loin, kei na hong demlai uhleh,

²⁸note ka hong heh ngawh bawl ding a, note’ khialhna hangin a zah sagih vei-in kong thuhilh ding hi.

²⁹Note na gil uh kial lua ding ahih manin na tapate uh le na tanute uh’ sa na ne ding uh hi.

³⁰Keimah in mual dawna na biaknate uh susia-in, na paknamtui biakna taute uh phukin, note’ milim’ siluang hawmte tungah na luanghawmte uh ka pai ding a, keimah in note kong kih ding hi.

³¹Keimah in na khuapite uh siasakin, na biakna munte uh gamkhing ka suaksak ding a, nomau’ hong biakna a gim namtuite ka diik kei ding hi.

³²Keimah in leitang ka siasak ding a, tua tungah a teng na galte un lamdangsa ding uh hi.

³³Keimah in minam dangte lakah note kong thehthang ding a, keimah in namsau a paai panin dokin note kong delh ding hi. Na leitang uh gamkhing suak ding a, na khuapite uh a sia hi ding hi.

³⁴Tua ciangin na galte uh leitangah na om tanvei uh, gamkhingin a om sungteng, leitang in tawlngak hun a ngah hi ding hi. Leitang tawlnga-in, a sabbath-te a tang hi ding hi.

³⁵Ama tungah na ten laitakun na ngahsak loh uh tawlngakna ahi a sabbath-te, gamkhingin a om sungteng a tawlnga hi ding hi.

³⁶“Note’ sung panin galte’ leitangah a omlai mite tungah lungsim gimna ka tungsak ding hi. Nahthel ging in amaute taisak ding a, namsau mai-ah mi khat a tai bangin amaute tai ding uh a, kuamah in a delh lohpi-in amaute puk ding uh hi.

³⁷Kuamah in delh lo napi-in namsau mai pan a taikhia bangin khatlekhat na kiphupai ding uh a, na galte uh nanzawh nading vangliatna na nei kei ding uh hi.

³⁸Minam dangte lakah note na sia ding uh a, na galte uh’ leitang in note hong valhtum ding hi.

³⁹Note’ sung panin galte’ leitangah a omlaite amau’ mawhna hangin kiam ding uh a, amau’ pute pate a mawhna uh hangin a kiam bangun amau zong a kiam ding uh hi.

⁴⁰“Ahih hangin kei tungah khemna tawh hong gamtatnasa uh le kei hong demna uh hangin amaute gawt bawlin, amau’ galte’ leitangah amaute ka paipihna hangin, amau’ mawhna le a pu a pate uh mawhna pulakin a lungsim uh niamkhiatin, amaute in a mawhna a kipuahphat uhleh,

⁴²keimah in Jakob tawh ka thuciamna, Isaac tawh ka thuciamna, le Abraham tawh ka thuciamna ka phawk ding a, leitang zong ka phawk ding hi.

⁴³Ahih hangin amaute in leitang nusia-in, amaute om loin gamkhingin a om sungteng leitang in a sabbath-te na ngah ding hi. Amaute in ka biakna ngeina kipte nialin, ka thukhamte mudah uh ahih manin, a mawhna uh a kipuahphat ding uh kisam hi.

⁴⁴Bangbang ahi zongin, a galte uh gam sungah amaute a om sungteng uh keimah in amaute nilkhia loin, amaute a susia maimang zah ding le amaute tawh ka thuciamna a pelhzah dingin amaute ka mudah kei ding hi; bang hang hiam cih leh kei pen TOPA amau’ Pasian ka hi hi.

⁴⁵Ahih hangin keimah in amaute ka ngaihsutna-in amau’ Pasian ka hih theih nadingin, minam dangte’ muhna-ah Egypt gam panin ka paikhiatpih amau’ pulepate tawh ka thuciamna ka phawk ding hi; kei pen TOPA ka hi hi,” a ci hi.

⁴⁶Hihte pen Moses tungtawnin Sinai Mual tungah TOPA in amah le Israel mite kikalah a bawl thukhamte le biakna ngeina kipte le thute ahi hi.