Read Tedim Chin SIAMPI LAIBU 27 Bible Online

SIAMPI LAIBU 27 - Tedim Chin bible

SIAMPI LAIBU 27

¹TOPA in Moses kiangah,

²“Israel mite tungah hih bangin gen in: Mi khat in a tuam vilvelin kiciamna a bawl ciangin, tua a kiciam mite pen nangmah in TOPA-a’ in na seh dinga, a nuai-a kiseh bangin kitanh-in suaktakik thei ding hi.

³Pasal kum sawmnih panin kum sawmguk a phate a man na sehna pen, biakinn shekel zangin pasal khat ciangin ngun shekel sawmnga hi ding hi.

⁴Numei ahihleh shekel sawmthum hi ding hi.

⁵Kum nga pan kum sawmnih ciang a phate, pasal ahihleh shekel sawmnih hi ding a, numei ahihleh shekel sawm hi ding hi.

⁶Kha khat pan kum nga ciang a phate pen pasal ahihleh ngun shekel nga hi ding a, numei ahihleh ngun shekel thum hi ding hi.

⁷Kum sawmguk pan a tungsiahte pen pasal ahihleh shekel sawm le nga hi ding a, numei ahihleh shekel sawm hi ding hi.

⁸“Mi khatpeuh zawnglua-in nangma sehzah a piakzawh kei leh, siampipa kiangah a mi hong kipaipih ding a, siampipa in ama man seh ding hi. A kiciam mipa a siamna tawh kizui-in siampipa in ama man seh ding hi.

⁹“Mite in TOPA’ tungah biakna-in a piakte pen ganhing ahihleh, mi khatpeuh in TOPA’ tungah a piak tua bang ganhingte khempeuh a siangtho ahi hi.

¹⁰Amah in na khat peuhpeuh, a hoihte a hoih lo tawh ahi zongin, a hoih lote a hoih tawh ahi zongin, laih lo, khek lo ding hi. Amah in ganhing khat ganhing adang khat tawh a khek leh, tua ganhing le a khekna ganhing a siangtho hi khawm ding hi.

¹¹Tua pen TOPA’ tungah a kipia thei lo ganhing nin khat ahihleh, mipa in siampipa mai-ah a ganhing paipih ding a,

¹²siampipa in hoih hi, ci-in ahi zongin sia hi, ci-in ahi zongin a man zah seh ding hi.

¹³Ahih hangin amah in tua ganhing a tatkik nop leh, a kisehna banah nga-ah khat behlap ding hi.

¹⁴“Mi khatpeuh in a siangtho dingin TOPA’ tungah a inn a ap ciangin, siampipa in a hoihna le a hoih lohna tawh kizui-in a man seh ding a, siampipa’ sehna bangin kip ding hi.

¹⁵A ap pa in ama inn a tatkik nop leh, a kisehna banah nga-ah khat sum tawh behlap ding a, tua inn ama a’ hi kik ding hi.

¹⁶“Mi khat in a luah ama leitang phelkhat TOPA’ tungah a ap leh, nangma sehna pen khaici vawh zah ding tawh kizui ding hi. Mangbuhham beem khat dim a pawina leitang pen ngun shekel sawmnga-in kiseh ding hi.

¹⁷Amah in jubilee kum a kipanin a lo a ap leh, nangma sehna zahzah bit ding hi.

¹⁸Ahih hangin jubilee kum khit ciangin amah in a lo a ap leh, siampipa in jubilee kumkik dong a omlai kumte tawh kizui-in a manzah sum seh ding a, nangma sehna zah panin kikhiam ding hi.

¹⁹Lo a ap pa in a tatkik nop leh, a kisehna banah nga-ah khat sum tawh behlap ding a, tua lo ama a’ hisuak ding hi.

²⁰Ahih hangin amah in a lo a tanh nuam lo ahi a, amah in midang khat tungah a zuak ahi zongin ahihleh, tua pen amah in tanhkik thei nawn lo ding hi.

²¹A lo pen, jubilee huna piak khiat ciangin, a ki-apsa lo mah bangin TOPA’ tungah a siangtho hi ding a, siampipa in tua lo tang ding hi.

²²“Amah in luahna tawh a neih ahi lo, a leisa lo pen TOPA’ tungah a ap leh,

²³siampipa in jubilee kum ciang dong ding tua man seh ding a, tua ni-in a mipa in a kiseh zah, TOPA’ tungah a siangtho-in pia ding hi.

²⁴Jubilee kum ciangin a lo pen a kileinapa, gamhluahna tawh tua leitang a nei mipa tungah tungkik ding hi.

²⁵“A kisehna peuhmah biakinn shekel kizang ding hi; gerah sawmnih ciangin shekel khat hi ding hi.

²⁶“Ahih hangin tacil pen TOPA a’ hi khinzo ahih mah bangin, kuamah in ganhing tacilte ap thei lo ding hi; bawng hitaleh tuu hitaleh TOPA-a’ ahi hi.

²⁷Ganhing nin ahihleh, nangma sehna bangin amah in lei kikin, tua banah seh nga-ah khat behlap ding hi. Tua hi lo a, a kitat kei leh, a kisehna bangin kizuak ding hi.

²⁸“Ahih hangin mi khat in a neih, TOPA’ tungah a ap, a ki-apsa nate, mi hitaleh ganhing hitaleh, a luah ama lo hitaleh, kizuak lo ding, kitanh lo ding hi. A ki-ap na peuhmah TOPA’ tungah a siangthopen ahi hi.

²⁹Mite lak nangawn panin a kisusiamang dingin a ki-apsa mi peuhmah, kitanh lo ding a, kithat ding hi.

³⁰“Leitang panin a piang khempeuh khaici hitaleh singgah hitaleh sawm-ah-khat TOPA a’ hi a, TOPA a dingin siangtho hi.

³¹Mi khatpeuh in sawm-ah-khat a piak na khat peuhpeuh a tat nop leh, amah in tua banah nga-ah khat behlap ding hi.

³²Bawnghon leh tuulekeel hon sawm-ah-khat khempeuh le a cing pa’ ciangkhut nuai-a a pai ganhing khempeuh sawm-ah-khat peuhmah TOPA a dingin a siangtho hi ding hi.

³³Mi khat in pha hiam sia hiam ci-in kantel lo ding a, khek lo ding hi. A khek leh, tua leh a khekna pen a siangtho hi khawm ding hi. Tua pen kitanh lo ding hi,” a ci hi.

³⁴Hihte pen Sinai Mual tungah TOPA in Israel mite a dingin Moses tungah a piak thute ahi hi.