Read Tedim Chin SIAMPI LAIBU 5 Bible Online

SIAMPI LAIBU 5 - Tedim Chin bible

SIAMPI LAIBU 5

¹“Mi khatpeuh teci pang dingin a kisap ciangin a muhsa a theihsa thute gen loin a ip leh, amah in tua mawhna pua ding hi.

²“Tua ahih kei leh mi khatpeuh in gamlak ganhing nin a sisa hitaleh inn ganhing nin a sisa hitaleh a bokvak a nin ganhing a sisa hitaleh, a muh lohin a nin khat peuhpeuh lawngkha-in amah a nin a suah leh, a mawh hi ding hi.

³“Tua ahih kei leh amah in mihing nitna hitaleh, mu loin a lawnkhak leh, a theih ciangin a mawh hi ding hi.

⁴“Tua ahih kei leh mi khatpeuh in a sia bawl ding hitaleh a pha bawl ding hitaleh mite a kiciam theih ngei kiciamna nam khat peuhpeuh ama kam tawh a theih lohin a kiciampak khak leh, a theih ciangin hihte khat peuhpeuhah a mawh hi ding hi.

⁵“Hihte khat peuhpeuhah mi khat a mawh ciangin, amah in a gamtatnasa a khialhna pulak ding a,

⁶mawhna hanga biakna-in tuuhon pan ahi a, keelhon pan ahi zongin a nu khat peuhpeuh tuu hitaleh keel hitaleh, a gamtatnasa a khialhna hangin TOPA’ tungah biakna paipih ding a, siampipa in a khialhna hangin kilemna bawlsak ding hi.

⁷“Ahih hangin amah in tuuno khat a piak zawh kei leh a gamtatnasa a khialhna hangin TOPA’ tungah biakna-in vakhu nih ahi a, kawl vakhuno nih ahi zongin, khat khialhna hanga biakna, a khat meihal biak nadingin paipih ding hi.

⁸Amah in siampipa tungah tuate paipih ding a, siampipa in khialhna hanga biak nading pen pia masa ding hi. Amah in a ngawng panin a lu heek ding a, ahih hangin heeksat lo ding hi.

⁹Amah in khialhna hanga biakna si tawmkhat biakna tau pangah theh ding a, biakna tau bulah a si omlai teng taaksak ding hi. Tua pen khialhna hanga biakna ahi hi.

¹⁰Tua ciangin amah in ngeina kip om bangin meihal biak nadingin a khat pia ding hi. Siampipa in a gamtatnasa a khialhna hangin kilemna bawlsak ding a, amah kimaisak ding hi.

¹¹“Ahih hangin amah in vakhu nih ahi a, kawl vakhuno nih ahi zongin a piak zawh kei leh, amah in a gamtatnasa a khialhna hangin a biakna-in annel lawh khat, khialhna hanga biak nadingin paipih ding hi. Tua pen khialhna hanga biakna ahih manin amah in tua sungah sathau khah lo ding a, paknamtui zong hel lo ding hi.

¹²Amah in siampipa kiangah paipih ding a, siampipa in phawkna-in khutdim khat la-in TOPA’ tungah mei tawh kihal biakna, biakna tau tungah hal ding hi. Tua pen khialhna hanga biakna ahi hi.

¹³Tua bangin siampipa in hihte khat peuhpeuh a gamtatnasa a khialhna hangin kilemna bawlsak ding a, amah kimaisak ding hi. An tawh biakna-a mah bangin a omlai teng siampipa a’ ding ahi hi,” a ci hi.

¹⁴TOPA in Moses kiangah,

¹⁵“Mi khatpeuh in theih lohna hangin thu palsatin TOPA’ na a siangtho khat peuhpeuhah a khialh leh, a mawhna hanga biakna-in tuuhon sung panin a sitbaang lo tuutal khat, biakinn shekel tawh kizui-in ngun shekel-in nangmah in a man sehin, amah in TOPA’ kiangah paipih ding hi. Tua pen mawhna hanga biakna ahi hi.

¹⁶Amah in a siangtho na a hih khialhna-ah lohkikna zong bawl ding a, seh nga-ah khat gawm behin siampipa tungah pia ding hi. Siampipa in mawhna hanga biakna tuutal tawh ama a dingin kilemna bawlsak ding a, amah kimaisak ding hi.

¹⁷“Hih lo ding, ci-in TOPA’ thupiakte khat peuhpeuh, mi khatpeuh in hihin a khialh leh, a theih lohna hang hitaleh zong, amah a mawh hi veve-in, ama mawhna mah pua ding hi.

¹⁸Tuuhon lak pan a sitbaang lo tuutal khat, a manzah ding nangmah in seh inla, amah in mawhna hanga biak nadingin siampipa kiangah paipih ding hi. Theihlohna hanga ama gamtatnasa khialhna hangin siampipa in ama a’ ding kilemna bawlsak ding a, amah kimaisak ding hi.

¹⁹Tua pen TOPA’ tungah khial ahih manin mawhna hanga biakna ahi hi,” a ci hi.