Read Tedim Chin SIAMPI LAIBU 6 Bible Online

SIAMPI LAIBU 6 - Tedim Chin bible

SIAMPI LAIBU 6

¹TOPA in Moses kiangah,

²“Mi khatpeuh khialin, TOPA’ thu palsatin, na kepsakna thu-ah ahi zongin, khapna nate’ thu-ah ahi zongin a vengpa khemin, ahih kei leh a na sutin, a vengpa nengniamin,

³tua ahih kei leh a mang na khat mu-in tua thu-ah zuau-in a man loin kiciam a, mite a khialh theih ngeina khat peuhpeuhah

⁴khialin a mawh ciangin amah in a suhte hitaleh, a netniamna tawh a ngahte hitaleh, amah a kikemsak na hitaleh, a mang na a muh hitaleh,

⁵a man loin a kiciamnasa na khat peuhpeuh hitaleh loh ding hi. Amah in a cingin lohin seh nga-ah khat piak beh ding a, a mawhna hanga biakna a piak ni-in a nei pa tungah pia ding hi.

⁶Tua ciangin a mawhna hanga a biak nading, tuuhon lak pan a sitbaang lo tuutal khat, TOPA’ tungah a piak ding, a man ding nangma sehzah, amah in siampipa kiangah paipih ding hi.

⁷Siampipa in TOPA’ mai-ah ama a’ ding kilemna bawlsak ding a, mi khat a mawh theih ngeina khat peuhpeuhte-ah amah kimaisak ding hi,” a ci hi.

⁸TOPA in Moses kiangah,

⁹“Aaron le a tapate thu pia inla, hih bangin ci in: Hih pen meihal biakna ngeina ahi hi. Meihal biakna pen biakna tau tunga meikhuk tungah zingsang mateng zan tawntung om ding a, tua biakna tau tungah mei kikuangsak den ding hi.

¹⁰Siampipa in a saihadial puan silhin, a saihadial pheituam tengin, biakna tau tungah meihal biakna mei in a kattum vutte la-in biakna tau pangah koih ding hi.

¹¹Tua ciangin amah in a puante suahin puan dang silh ding a, giahphual pualam a siangtho mun khatah a vutte puakhia ding hi.

¹²Biakna tau tunga mei kikuangsak den ding a, kimitsak lo ding hi. Siampipa in zingsang simin a tungah sing cihin, meihal biakna a ngeina bangin a tungah koihin, thunuama biakna thau a tungah hal ding hi.

¹³Biakna tau tungah mei kikuangsak tawntung ding a, kimitsak lo ding hi.

¹⁴“Tua ciangin an tawh biakna ngeina hih bang ahi hi. Aaron’ suante in biakna tau mai, TOPA’ mai-ah pia ding uh hi.

¹⁵Mi khat in, biakna tau tungah a om an tawh biakna annel khutdim khat, a sathau le a paknamtui khempeuh tawh la-in, TOPA a dingin a gim namtui, phawkna-in biakna tau tungah hal ding hi.

¹⁶Aaron le a tapate in a omlai teng ne ding uh hi. A siangtho mun khatah silngo sawh loh in ne ding uh a, kikhopna buktual sung mun khat hi ding hi.

¹⁷Tua pen silngo sawhin a ki-em hi lo ding hi. Meihal biakna hong kipiakna sung panin amau’ tanh dingin ka piaksa ahi hi. Tua pen khialhna hanga biakna le mawhna hanga biakna bangin a siangtho pen ahi hi.

¹⁸Na khang tawntung uha dingin thu hong kipiak mah bangin, TOPA’ tungah meihal biakna a kipiakna panin Aaron’ suante lakah pasal peuhmah in tuate ne thei ding hi. Tuate a lawng peuhmah a siangtho suak ding hi,” a ci hi.

¹⁹TOPA in Moses kiangah,

²⁰“Aaron le a suante sathau a kinilh ni-in TOPA’ tungah hih bangin biakna kipia ding hi: An tawh biakna ngeina bangin annel lawh khat, alang zingsangin, alang nitakin pia ding hi.

²¹Tua pen beelpei tung khatah sathau tawh kibawl ding hi. An tawh biakna mah bangin limtakin helsa leh balnensa-in na paipih ding a, TOPA a’ ding a gim namtui dingin na pia ding hi.

²²Aaron’ suante sung panin amah a laih dingin sathau a kinilh siampipa in, thu a kipiaksa mah bangin TOPA’ tungah pia ding a, a vekpi-in kihal ding hi.

²³Siampipa in an tawh a biakna peuhmah a vekpi-in kihal ding a, kine lo ding hi,” a ci hi.

²⁴TOPA in Moses kiangah,

²⁵“Aaron le a tapate tungah hih bangin gen in: Khialhna hanga biakna ngeina hih bang ahi hi. Meihal biakna a kigawhna mun TOPA’ mai-ah khialhna hanga biakna kigo ding a, tua pen a siangtho pen ahi hi.

²⁶Khialhna hanga biakna a pia siampipa in kikhopna buktual sung a siangtho mun khatah ne ding hi.

²⁷A sa a lawng peuhmah a siangtho suak ding hi. Puan tungah a si a kithehkhak ciangin, a siangtho mun khatah tua si a kithehkha pen kisawp ding hi.

²⁸Tua ciangin a kihuanna leibeel kisukham ding hi. Ahih hangin taaubeelin a kihuan ahihleh a beel kikiatin tui sungah kisawp siang sitset ding hi.

²⁹Siampite’ lak panin pasal peuhmah in ne thei ding uh hi. Tua in a siangtho pen ahi hi.

³⁰Ahih hangin siangtho munah kilemna bawl nadingin kikhopna buk sungah a kipaipih si a kilak khiatna, khialhna hanga biakna sa kine lo ding a, mei tawh kihal ding hi.