Read Tedim Chin SIAMPI LAIBU 7 Bible Online

SIAMPI LAIBU 7 - Tedim Chin bible

SIAMPI LAIBU 7

¹“Mawhna hanga biakna ngeina, a siangtho pen hih bang ahi hi.

²Amaute in meihal biakna a gawhna mun uhah mawhna hanga biakna go ding uh a, biakna tau kimkotah a si kitheh ding hi.

³Tua ciangin a thau khempeuh, a meithau, a gilpi tuam a thau,

⁴a kawnga om a kal nihte a thau tawh, a kalte tawh a lakkhiat khop ding ahi a sin tuamte kipia ding hi.

⁵TOPA’ tungah meihal biakna-in siampipa in biakna tau tungah hal ding a, tua pen mawhna hanga biakna ahi hi.

⁶Siampite lakah pasal peuhmah in a siangtho mun khatah ne thei ding uh hi; tua in a siangtho pen ahi hi.

⁷“Mawhna hanga biakna pen khialhna hanga biakna tawh kibang a, tuate a’ ding a ngeina a kibang hi ding a, kilemna a bawlsak siampipa in tua biakna sa ngah ding hi.

⁸Mi khatpeuh’ meihal biakna a piaksak siampipa in ama piaksak tua meihal biakna a vun ngah ding hi.

⁹Mei bung sunga a ki-em an tawh biakna peuhmah leh sikbeel daii ahi a, beelpei tungah ahi zongin a kibawl khempeuhte, a pia siampipa in ngah ding hi.

¹⁰An tawh biakna khempeuh, sathau a kihel hitaleh a kihel lo hita leh, Aaron’ suan khempeuh in a kikimin hawm ding uh hi.

¹¹“Mi khatpeuh in TOPA’ tungah a piak theih ding, thunuama biakna ngeina hih bang ahi hi.

¹²Amah in lungdam kohna-in a piak leh, silngo sawh loh sathau tawh a kihel moh, silngo sawh loh mohpheng sathau tawh a kizut, annel moh sathau limtakin a kihelte, lungdam biakna tawh pia khawm ding hi.

¹³Amah in lungdam koh nadingin thunuama ama biakpiakna tawh silngo kisawh anlum mohte ama biakna-in paipih khawm ding hi.

¹⁴Amah in TOPA biak nadingin tua biakna sung panin moh khat ciat pia ding a, thunuama biakna si a theh siampipa in tua moh ngah ding hi.

¹⁵Lungdam kohna-in thunuama ama biakpiakna a sa pen a piak ni-in kine ding a, a zingsang dong bangmah kisit lo ding hi.

¹⁶“Ahih hangin ama biakpiakna pen thuciamna hanga biakpiakna ahi a, utthu-a biakpiakna ahi zongin ahihleh, amah in a biakpiakna a piak ni-in kine ding a, a omlai teng a zing ciangin kine ding hi.

¹⁷Ahih hangin a ni thum ni-in biakpiakna sa a omlai teng mei tawh kihal ding hi.

¹⁸A ni thum ni-in thunuama ama biakpiakna sa khat peuhpeuh a kinek leh, tua biakpiakna a piapa kisang lo ding a, tua pen ama a’ in zong kiciamteh lo ding hi. Tua sa a nin hi ding a, a ne pa in ama mawhna pua ding hi.

¹⁹“A nin na khat peuhpeuh tawh a kisawhkha sa kine lo ding a, mei tawh kihal ding hi. Ahi zongin a siang mi khempeuh in a sa ne thei ding uh hi.

²⁰A nin hi napi-in thunuama TOPA’ tungah biakpiakna sa a ne pa ama mipihte’ lak panin kihawlkhia ding hi.

²¹Mi khatpeuh in mihing nin hitaleh ganhing nin hitaleh a kihhuai a nin khat peuhpeuh hitaleh lawng a, tua khit ciangin thunuama TOPA’ tungah biakpiakna sa a nek leh, ama mipihte’ lak panin tua mipa kihawlkhia ding hi,” a ci hi.

²²TOPA in Moses kiangah,

²³“Israel mite tungah hih bangin gen in: Note in bawngtal ahi a, tuu ahi a, keel ahi zongin a thau na ne kei ding uh hi.

²⁴A mawk sih ganhing thau leh gamsate in a balgawp ganhing thaute, nadangin kizang thei ding a, ahih hangin bangbang hileh na ne kei ding uh hi.

²⁵Bang hang hiam cih leh TOPA’ tungah mei tawh kihal biakna ganhing thau a ne mi peuhmah ama mipihte’ lak panin kihawlkhia ding hi.

²⁶Tua tham loin note in na tenna uh mun khat peuhpeuhah vasa sisan hitaleh ganhing sisan hitaleh si peuhmah na ne kei ding uh hi.

²⁷Si khat peuhpeuh a ne mi peuhmah ama mipihte’ lak panin kihawlkhia ding hi,” a ci hi.

²⁸TOPA in Moses kiangah,

²⁹“Israel mite tungah hih bangin gen in: TOPA’ tungah thunuama ama biakpiakna a piapa in TOPA’ kiangah ama biakna paipih ding hi. Thunuama ama biakpiakna panin

³⁰amah in TOPA’ tungah meihal biakna a khutin paipih ding hi. TOPA’ mai-ah vei-a biak nadingin a iik a kivei theih nadingin amah in a thau a iik tawh paipih ding hi.

³¹Siampipa in biakna tau tungah a thau hal ding a, ahih hangin a iik pen Aaron le a suante a’ ding hi ding hi.

³²Thunuama na biakpiakna panin biakna-in siampipa tungah a taklam phei na pia ding uh hi.

³³Aaron’ suante sung panin thunuama biakna si le a thau a piapa in a taklam phei a ngah ding ahi hi.

³⁴Bang hang hiam cih leh a kivei a iik le a kipia a phei pen keimah in Israel mite’ tung panin thunuama amau’ biakpiakna sung panin lakhia-in, Israel mite’ tung panin a tawntungin a ngah dingun siampi Aaron le a suante’ tungah ka pia khinzo hi.

³⁵Hih pen, TOPA’ siampi na a sem dingin amaute a kipiak ni-in, TOPA’ tungah meihal biakna sung panin amau’ tungah a kipia, Aaron leh a suante’ tanh ahi hi.

³⁶Israel mite in amaute tungah a piak nadingin amaute sathau a kinilh ni-in TOPA in hih thu pia a, tua pen a khang tawntungun amau’ kaih ahi hi,” a ci hi.

³⁷Hihte pen amau’ biaknate TOPA’ tungah a piak nadingun amah in Israel mite Sinai sehnel gamah a thupiak ni-in TOPA in Sinai Mual tungah Moses a thupiak, meihal biakna, an tawh biakna, khialhna hanga biakna, mawhna hanga biakna, ki-apna le thunuama biakna ngeina ahi hi.