Read Tedim Chin SIAMPI LAIBU 8 Bible Online

SIAMPI LAIBU 8 - Tedim Chin bible

SIAMPI LAIBU 8

¹TOPA in Moses kiangah,

²“Aaron le amah tawh a om a tapate, a puante, a nilh sathau, khialhna hanga biakna a bawngtal, a tuutal nihte le silngo sawh loh anlum lawh la inla,

³kikhopna bukkongah Israel mihonte khempeuh khawm in,” a ci hi.

⁴TOPA in amah a thupiak bangin Moses in hih a, kikhopna bukkongah mihonte kikhawm hi.

⁵Moses in mihonte kiangah, “Tu-a ka hih dingte pen TOPA in hih dingin a thupiak ahi hi,” a ci hi.

⁶Tua ciangin Moses in Aaron le a tapate paipihin tui tawh amaute a sil hi.

⁷Amah in a puantungsilh amah silhsak a, a kawnggak tawh gakin, a puantualpi silhsak a, a siampipuan silhsakin, siampipuan’ khau, hoihtakin a kigan tawh gak a, tua tawh ama tungah a khih hi.

⁸Amah in ama tungah a awmdal bulhin, a awmdal sungah Urim le Thummim a koih hi.

⁹Amah in Aaron’ lu tungah a dialpi khimsakin, a dialpi tung a mai lamah, TOPA in Moses a thupiak bangin amah in kham peek, a siangtho kumpi lukhu a khusak hi.

¹⁰Tua ciangin Moses in nilh sathau la-in, biakbuk le a sunga om khempeuh nuhin tuate a ap hi.

¹¹Amah in biakna tau tungah tuate kimkhat sagihvei thehin, biakna tau le a nazat khempeuh le kuang le a ngaknate, ap dingin sathau a nuh hi.

¹²Amah in nilh sathau kimkhat Aaron’ tungah sung a, ap dingin amah a sathau a nilh hi.

¹³TOPA in Moses a thupiak bangin, Moses in Aaron’ tapate paipih a, puantungsilhte silhsakin, kawnggak tawh amaute gak a, amau’ lu tungah lukhute a khih hi.

¹⁴Tua ciangin amah in khialhna hanga biakna bawngtal paipih a, Aaron le a tapate in tua bawngtal lu tungah amau’ khut nga uh hi.

¹⁵Kilemna bawl nadingin Moses in a bawngtal go a, a si la-in a kiima biakna tau kite a khutme tawh nuhin, biakna tau siangthosak a, biakna tau bulah a site sungkhia-in a ap hi.

¹⁶A sungkuate tunga om a thau khempeuh le a sintuamte le a kal nihte a thau tawh la-in, biakna tau tungah tuate a hal hi.

¹⁷Ahih hangin, TOPA in Moses a thupiak bangin a omlai a vun, a sa le a ek, amah in giahphual pualamah mei tawh a hal hi.

¹⁸Tua ciangin Moses in meihal biakna tuutal pia a, Aaron le a tapate in tuutal lu tungah amau’ khut nga uh hi.

¹⁹Moses in tua tuutal go-in, biakna tau tung kimkotah a si theh hi.

²⁰Tuutal a kisemnen ciangin, Moses in a lu le a ki-atnente le a thau a hal hi.

²¹TOPA in Moses a thupiak bangin, a sungkuate le a khete tui tawh a kisawp khit ciangin, TOPA’ tungah mei tawh kihal biakna a gim namtui, meihal biakna-in Moses in biakna tau tungah tuutal buppi a hal hi.

²²Tua ciangin Moses in a tuutal dang, kipsakna tuutal pia a, Aaron leh a tapate in tuutal lu tungah amau’ khut nga uh hi.

²³Moses in tuutal go a, a si tawmkhat la-in Aaron’ taklam bilteep leh a taklam khutpi le a taklam khepi nuh hi.

²⁴Aaron’ tapate hong kipaipih a, Moses in amau’ taklam bilteepte le amau’ taklam khutpite le amau’ taklam khepite a si tawmkhat nuh a, a si a val laite, biakna tau tung kimkotah a theh hi.

²⁵Tua ciangin amah in a thau, a mei thau le a sungkuate tunga om a thau khempeuh le a sintuamte, a kal nihte le a thau, le a taklam phei a la hi.

²⁶TOPA’ mai-ah a om silngo sawh loh anlum lawh sung panin amah in silngo sawh loh moh khat le sathau sawh anlum moh khat le mohpheng khat la-in, a thau tung le a taklam phei tungah tuate a koih hi.

²⁷Amah in hihte khempeuh, Aaron le a tapate’ khut sungah koih a, amaute in vei-a biakna-in TOPA’ mai-ah tuate a vei uh hi.

²⁸Tua ciangin Moses in amaute’ khutsung panin tuate la-in, TOPA’ tungah meihal biakpiakna, a gim namtui, kipsakna biakna-in biakna tau tungah meihal biakna tawh tuate a hal khawm hi.

²⁹Moses in a iik la-in vei-a biakna-in TOPA’ mai-ah a vei hi. TOPA in Moses a thupiak bangin tua pen kipsakna tuutal panin Moses’ tanh ahi hi.

³⁰Tua ciangin Moses in nilh sathau kimkhat le biakna tau tunga om a si la-in, Aaron le ama tapate le amau’ puante tungah a theh hi. Tua ahih ciangin Moses in Aaron le ama tapate, a puante uh tawh a apkhawm hi.

³¹Moses in Aaron le a tapate kiangah, “Keimah in thu hong pia-in, ‘Aaron le a tapate in ne ding uh hi,’ ka cih mah bangin, kikhopna buk kongah a sa huan unla, tua lai munah tua sa le kipsakna biakna lawh sungah a om anlum ne unla,

³²a sa le anlum na khamvalte uh mei tawh na hal ding uh hi.

³³Note hong kikipsak nading hun ni sagih sung hi ding ahih manin, note hong kikipsakna hun a cin mateng, kikhopna bukkong pua-ah ni sagih sung na paikhia kei ding uh hi.

³⁴Tuni-a kibawl bangin, note a dingin kilemna bawl ding, TOPA in thu hong pia khin hi.

³⁵Kikhopna bukkongah ni sagih sung sun le zan na om ding uh a, TOPA’ hong sawlte na hih ding uh hi. Tua hikeileh note na si ding uh hi. Bang hang hiam cih leh tua bang dingin keima tungah thu hong kipia hi,” a ci hi.

³⁶Tua ahih ciangin Aaron le a tapate in zong, TOPA in Moses’ tungtawnin a thupiakte khempeuh a hih uh hi.