Read Tedim Chin SIAMPI LAIBU 9 Bible Online

SIAMPI LAIBU 9 - Tedim Chin bible

SIAMPI LAIBU 9

¹A ni giat ni-in Moses in Aaron le a tapate le Israel upate a sam hi.

²Amah in Aaron’ kiangah, “Khialhna hanga biak nadingin bawng pano khat le meihal biak nadingin tuutal khat, a nih tuakin a sitbaang lo, la inla, TOPA’ mai-ah tuate pia in.

³Israel mite kiangah, ‘Khialhna hanga biak nadingin keel a pa khat, le meihal biak nadingin bawngno khat le tuuno khat, a nih tuakin kum khat pha-in a sitbaang lo,

⁴le thunuama biakna-in TOPA’ mai-ah piak dingin bawngtal khat le tuutal khat, le sathau tawh a kibawl an tawh biakna la un. Bang hang hiam cih leh tuni-in note tungah TOPA hong kilang ding hi,’ ci in,” a ci hi.

⁵Amaute in zong kikhopna buk mai-ah Moses’ thupiak teng hong paipih uh a, mihonpite khempeuh a nai-ah hong pai-in TOPA’ mai-ah ding uh hi.

⁶Moses in, “Note tungah TOPA’ minthanna vang hong kilat theih nadingin TOPA in hih bangin thu hong pia hi,” a cih khit ciangin

⁷Aaron’ kiangah, “TOPA’ thupiaksa bangin biakna tau mai-ah pai-in khialhna hanga biakna le meihal biakna pia inla, nangma a’ ding le mite a dingin kilemna bawl in. Mite’ biakna paipih inla, amaute a dingin kilemna bawlsak in,” a ci hi.

⁸Tua ahih ciangin Aaron in biakna tau naihin, ama a’ mahmah ding ahi khialhna hanga biakna bawngno a go hi.

⁹Aaron’ tapate in ama tungah a si pia uh a, amah in a si sungah a khutme diahin biakna tau kite nuh a, biakna tau bulah a si vallai teng a sungkhia hi.

¹⁰Ahih hangin, TOPA in Moses a thupiak bangin khialhna hanga biakna panin a thau le a kalte le a sintuamte biakna tau tungah a hal hi.

¹¹A sa le a vunte ahihleh giahphual pualamah mei tawh a hal hi.

¹²Tua ciangin a meihal biakna a go hi. A tapate in ama tungah a si pia uh a, amah in biakna tau tung kimkotah a theh hi.

¹³Amaute in meihal biakna ama tungah a nen nenin a lutang tawh pia uh a, amah in biakna tau tungah tuate a hal hi.

¹⁴Tua ciangin amah in a sungkuate le a khete sawp a, biakna tau tungah meihal biakna tawh tuate a halkhawm hi.

¹⁵Tua ciangin a masa-a khialhna hanga biakna mah bangin amah in mite’ biakna pia-in, mite a’ ding ahi khialhna hanga biakna keel la-in go a, khialhna hanga biak nadingin a pia hi.

¹⁶Tua ciangin meihal biakna paipihin ngeina kip omsa bangin a pia hi.

¹⁷Amah in zingsang a meihal biakna banah biakna paipihin, tua sung panin a khutdim la-in, biakna tau tungah a hal hi.

¹⁸Moses’ thupiak bangin amah in mite a dingin thunuama biakna bawngtal le tuutal zong a go hi. A tapate in ama kiangah a si paipih uh a, amah in biakna tau kimkotah theh a,

¹⁹bawngtal le tuutal thau, a mei thau, a gilpi tuam, a kalte, a sintuamte

²⁰le a thau, amaute in a iikte tungah koihin, amah in biakna tau tungah a thau a hal hi.

²¹Ahih hangin Aaron in a iikte le a taklam pheite, TOPA’ mai-ah vei-a biakna-in a vei hi.

²²Tua ciangin Aaron in mite’ lamah a khutte laamto-in thupha a piak khit ciangin khialhna hanga biakna le meihal biakna le thunuama biakna a piakna panin hong paisuk hi.

²³Kikhopna buk sungah Moses le Aaron hong tum uh a, hong pusuah khiat ciangun mite thupha pia a, mi khempeuh tungah TOPA’ minthanna vang hong kilang hi.

²⁴TOPA’ mai panin mei hong piangkhia-in meihal biakna le biakna tau tunga om sathau a kang hi. Mi khempeuh in a muh uh ciangin awng uh a, lei maingatin a kunsuk uh hi.