Read Tedim Chin JEREMIAH 11 Bible Online

JEREMIAH 11 - Tedim Chin bible

JEREMIAH 11

¹TOPA in kei hong hopih a,

²“Hih thuciamna thute ngai inla, Judah mite le Jerusalem khuamite kiangah va gen in.

³TOPA, Israel mite’ Pasian in kong cihin-ah, hih thuciamna a mang lo mi peuhmah in hamsiatna thuak ta hen, ci-in va gen in.

⁴Tua pen na pute na pate uh, sik haltuina meikhuk tawh a kibang Egypt gam pana ka lakkhiat ni-a ka thuciamna ahi hi. Tua ni-in, ka thu hong ngai-in kong thupiakna bangin na sep uhleh, note ka mi na hi ding uh a, kei pen note’ Pasian hi-in,

⁵tua bang na hih uhleh na pute na pate uh tungah ka ciamsa, tu-a na neih uh bawngnawi le khuaizu tui bangin a luanna gam kong pia ding hi, ci-in thu ka pia hi,” hong ci hi. Tua ciangin keimah in, “Hi ta hen, TOPA aw,” ci-in ka dawngkik hi.

⁶Tua ciangin TOPA in kei kiangah, “Hih thuciamna thute ngai-in a sep nadingun Judah gam khuapite le Jerusalem khua kongzing lakah va taangko in.

⁷Bang hang hiam cih leh Egypt gam panin ka lakkhiat pan a kipan tuni ciang dong ka thu hong mang un, ci-in na pute na pate uh tungah tam veipi nakpitakin ka hilh ngitnget hi.

⁸Ahih hangin amaute in ka thu hong mang loin a bil uh hong ngat lo uh a, a gitlohna lungsim uh a zui tentan uh hi. Hih thuciamna a zuih ding uh thu ka piak hangin hong nial veve uh ahih manin tua sunga thute a vekpi-in ka tungsak ding hi,” hong ci hi.

⁹Tua ciangin TOPA in hong hopih leuleu a, “Judah minamte le Jerusalem khuamite in kei hong langpang uh hi.

¹⁰Ka thu a ngai nuam lo a pu a pate uh’ mawhna lamah kilehhei khinzo uh a, pasian dangte’ na a sem dingin a zui khinzo uh hi. Israel mite le Judah mite in a pu a pate uh tawh ka bawlsa uh thuciamna a palsat khinzo uh hi.

¹¹Tua ahih ciangin TOPA in kong cihin-ah, en un, a pelh theih loh uh gimna amau’ tungah ka tungsak ding a, kei kiangah a hong kap liang uh zongin ka dawng nawn kei ding hi.

¹²Tua ciangin Judah mite le Jerusalem khuamite in meihal biakna tawh a biak uh a pasian-te uh’ kiangah pai-in a va thum ding uh hi. Ahih hangin hih gimna hong tun ciangin a honkhia thei tuan kei ding uh hi.

¹³Bang hang hiam cih leh, Judah aw, na khua om zahzah uh pasian na nei uh a, Jerusalem khua kongzing om zahzah mah, meihal biakna tawh Baal biakna ding a zumhuai biakna taute na bawl tazen uh hi.

¹⁴“Tua ahih manin Jeremiah aw, hih mite a’ ding thu ngetsak kei in la, amau’ tangin thumsak kei in. Bang hang hiam cih leh amaute in gim ngahin hong sap uh ciangin ka ngai kei ding hi.

¹⁵Ka itte in siatna a bawl khit uh ciangin ka biakinn sungah bang thu nei thei nawn ding ahi uh hiam? Nong kamkhapte uh le na biakpiakna sate un na kisiatna ding uh hong kipelhsak thei ding ahi hiam? Tua ciangin note na lungdam thei ding uh hiam?

¹⁶Nidang lai-in TOPA in note, a hing dikdek a gahpha oliv kung tawh kong genteh ngei hi. Ahih hangin kong hal ding a, na hiangte uh kangtumin ging huhu ding hi.

¹⁷Israel mite le Judah mite in meihalna tawh Baal bia-in hong hehsak uh a, hih bang siatna bawl uh ahih manin, amaute a phut keimah Vanglian TOPA in amaute’ tungah siatna a tunna ding thu ka piazo hi,” hong ci hi.

¹⁸Ka galte in kei a hong sawmna uh TOPA in nong hilh ciangin ke’n ka thei pan hi.

¹⁹A kigo dingin a kipaipih mawhna a nei lo tuuno bang ka hi hi. Amaute in, “Singkung a gahphat hun laitakin phuktan ni. Ama min a kiphawk nawn loh nadingin amah thatlum ni,” ci-in a gen uh a, kei hong sawmna uh ahihlam ka thei kei kha hi.

²⁰Ahih hangin thu a mantakin khenin, mihingte’ lungsim le a ngaihsutna uh a entel a Vanglian TOPA aw, amaute na thuhkikna kei hong musak in. Bang hang hiam cih leh nangma tungah ka thu kong ap khin hi.

²¹Tua ahih manin kei hong that nuamin, “TOPA’ min tawh thu hilh kei in. Na hilh leh kote’ khutlumin na si ding hi,” a hong ci Anathoth khuamite tawh kisai-in

²²Vanglian TOPA in, “En un, amaute gim ka pia ding hi. A tangvalte uh namsau-in si ding uh a, a tapate le a tanute uh kialin a puksi ding uh hi.

²³Anathoth khuamite tungah siatna tungsakin gim ka piak hun ciangin a suakta kuamah a om nawn kei ding uh hi,” a ci hi.