Read Tedim Chin JEREMIAH 24 Bible Online

JEREMIAH 24 - Tedim Chin bible

JEREMIAH 24

¹Babylon Kumpi Nebukhadnezzar in Jerusalem khua panin Jehoiakim’ tapa Judah kumpipa Jehoiakhin le Judah kumpi uliante, khutsiamte le sikseek siamte, Babylon khua-ah sal dingin a paikhiatpih khit ciangin TOPA in hih maang hong musak hi. TOPA’ biakinn mai-ah theigah bawm nih dim ka mu hi.

²Bawm khat sunga theigahte, a min masate tawh kibangin limci mahmah hi. Ahih hangin a bawm khat pen sunga theigahte limci hetloin nektheih ding bang hi dek lo hi.

³TOPA in hong hopih a, “Jeremiah aw, bang mu na hi hiam?” ci-in hong dong hi. Kei zong, “Theigah ka mu hi. A limcite limci mahmah a, a limci lote limci lo lua ahih manin nektheih ding bang hi lo hi,” ka ci hi.

⁴Tua ciangin TOPA in, “TOPA, Israel mite’ Pasian in kong cihin-ah:

⁵Hih mun panin Khaldea mite’ gam a ka puakkhiat Judah mi saltangte hih theigah hoihte bangin a hoihin ka ngaihsun ding hi.

⁶Amaute limtakin ka kem ding a, hih gamah ka lakik ding hi. Amaute ka khangtosak ding a, ka susia kei ding hi; ka suan ding a, ka botkhia kei ding hi.

⁷Keimah TOPA ka hihlam theihtheihna lungsim ka pia ding hi. A lungsim khempeuh uh tawh kei kiangah hong kileh ding uh ahih manin amaute ka mi ahi ding uh a, kei pen amaute’ Pasian ka hi ding hi.

⁸“Ahih hangin TOPA in kong cihin-ah: Judah kumpipa Zedekiah le ama gam uk uliante a kipan hih gamah a omsuak Jerusalem khuasunga a omlai sunteng le Egypt gamah a tengte limci lo lua ahih manin a kine thei lo theigahte bangin ka bawl ding hi.

⁹Amaute ka hawlkhiatna ding mun khempeuhah mite in kihamsiatna-in a zat dingun simmawhna le zahkonate ka thuaksak ding a, amaute’ thuakna hangin leitung gam khempeuh ka lausak ding hi.

¹⁰Namsau tawh kithahna, kialpi, le pulnatnate ka tungsak ding a, amaute le a pu a pate’ kiangah ka piaksa gam sungah khat beek ka nungtasak nawn kei ding hi,” hong ci hi.