Read Tedim Chin JEREMIAH 3 Bible Online

JEREMIAH 3 - Tedim Chin bible

JEREMIAH 3

¹“Mi khat in a zi ma hen la, tua nu in zong amah nusia-in, midang khat’ zi va suak leh, a pasal masa in tua nu lakik thei ding ahi hiam? Tua gamteng a ninsak khin suak ding hi lo ahi hiam? Nang pen numei paktat suakin mi tampi tak tawh kingai khinzo napi-in, tu-in kei kiang hong zuankik ding na hi hiam, TOPA in kong ci hi.

²Khuadak inla mualsang dawnte en dih in. Hong kilup khoppih lohna mun koi laitakah om ahi hiam? Arab mite in a suam dingun gamlakah mi a ngak uh bangin lam gei-ah tu-in na luppih ding mi na ngak hi. Na paktatna le na gitlohna tawh hih gam na ninsakzo hi.

³Tua hang mahin guahtui kikangsak a, guah nunung hong zu lo hi. Ahi zongin numei paktatte tawh a kibang hinapi-in na maizum thei kei lailai hi.

⁴“Tumahin kei nong sam a, ‘Ka pa aw, ka neulai pek pan ka lawm na hi hi

⁵nang keima tungah heh tawntung ding na hi hiam? A tawp dongin lungham den ding na hi hiam?’ na hong ci hi. En in, tua bang na cih hangin, siatna na hih theih khempeuh na hih khinzo hi,” a ci hi.

⁶Kumpi Josiah in a uk laitakin TOPA in kei hong hopih a, “A zulhzau Israel, mualsang tung khempeuhah pai-in singliim nuai khempeuhah numei paktat bangin a om kawikawina na mu khinzo hiam?

⁷Hih teng a hih khit ciangin kei kiangah hong kileh kik ngawn ding hi, ci-in ka up hangin amah hong kileh kik tuan lo hi. Tua bangin a gamtatna pen numei ginalo a sanggamnu Judah in zong a mu hi.

⁸A zulhzau Israel, midang tawh a khialhna hangin kimakna lai pia-in, ka hawlkhiat zong amah in a mu hi. Ahih hangin numei ginalo Judah lau tuan loin, amah zong numei paktat khat mah a va suak veve hi.

⁹Tua bang hih ding amah in baih ngaihsut lel ahih manin suangtum le singtawng peuh bia-in khial a, gam a ninsak hi.

¹⁰Hih bang teng hinapi a sanggamnu, numei ginalo Judah, a lungsim takpi tawh hong kilehkik loin, a kilehkik hong kineihkhem bek hi, TOPA in kong ci hi,” hong ci hi.

¹¹Tua ciangin TOPA in kei hong hopih a, “A zulhzau Israel, numei ginalo Judah sangin a mawhna tamzaw hi.

¹²Pai inla leilu lam Israel gamah hih bangin va taangko in: ‘Hong kilehkik in, a zulhzau Israel aw, TOPA in kong ci hi. Hehna tawh nang kong en kei ding hi; bang hang hiam cih leh a hehpih thei pa ka hi hi, TOPA in kong ci hi. Ka heh tawntung kei ding hi.

¹³Na mawhna na phawk ding bek kisam hi. TOPA na Pasian na langpanna, singliim nuai khempeuhah gamdang pasian-te tawh na khialh kawikawina le ka thu nong man lohnate pulak in, TOPA in kong ci hi.

¹⁴Hong kileh kik un, a zulhzau ka tate aw, TOPA in kong ci hi. Bang hang hiam cih leh note pen keima mite na hi uh a, khuapi khat panin mi khat, beh khat sung panin nih cih bangin hong la-in, Zion khua-ah ka hong puak ding hi.

¹⁵“‘Ka thu a hong mang makaite ka hong pia ding a, amaute in pilna le siamna tawh note hong uk ding uh hi.

¹⁶Tua hun ciangin gam sungah note pungin na tam uh ciangin TOPA in kong cihin-ah, mite in, “TOPA’ Thuciamna Singkuang,” ci-in genin a nei nawn kei ding uh hi. Amaute in ngaihsun kha lo ding uh a, phawkkha loin, zong a goih beek kei ding uh hi. Tham loin zong a bawlkik nawn kei ding uh hi.

¹⁷Tua hun ciangin Jerusalem khua pen TOPA’ kumpi tokhom kici ding a, Jerusalem khua TOPA’ omna-ah gam khempeuh hong kikhawmin, amaute in amau’ mawhnopna lungsim uh a zui tentan nawn kei ding uh hi.

¹⁸Tua hun ciangin Judah mite in Israel mite hong pawlpih ding uh a, leilu lam gam salsuahna panin na pu na pate uh’ luah dingin ka piaksa gamah a paikhawm ding uh hi.

¹⁹“‘Israel aw, ka tapa bangin nang hong bawlin, gam khempeuh lakah a hoihpen gam nopci mahmah khat nang hong pia ning, ci-in ka ngaihsun hi.

²⁰Ahih hangin a thuman lo zi in a pasal a nusiat bangin Israel mite aw, TOPA in kong cihin-ah, no zong kei tungah nong thuman kei uh hi,’ ci-in va taangko in,” hong ci hi.

²¹Mualtung panin awging khat hong kiza a, Israel mite’ kahna le tauna awging ahi hi. Lam a pialna hang uh le TOPA a Pasian uh a mangngilhna hang uh ahi hi.

²²TOPA in, “Hong kileh kik un, a zulhzau ka tate aw, na zulhzauna uh kong damsak ding hi,” a ci hi. Amaute in zong, “En in, nang kiang kong pai uh hi. Bang hang hiam cih leh TOPA kote’ Pasian na hi hi.

²³Mualtungte le mualsangte’ tungah gamlum lialuanate zuaupi taktak hi a, Israel mite hotkhiatna ding TOPA eite’ Pasian’ kiang bekah om takpi hi.

²⁴“Ahih hangin i neu lai a kipan a zumhuai Baal pasian i biakna hangin i pu i pate’ biakna ahi tuulebawngte, a tapate le a tanute khempeuh uh i sum khinzo hi.

²⁵Tua ahih manin maizumin lum ni. I minsiatna silh ni. Bang hang hiam cih leh i neulai a kipan tuni ciang dong eite le i pu i pate pen TOPA i Pasian’ tungah i mawh khinzo hi. TOPA i Pasian’ thu i mang kei khinzo hi,” a ci uh hi.